Спортын төрлүүд үргэлж шинэчлэгддэг тул тоглогчид, дүрэм зэргээс эхлүүлэн хуучнаараа үлддэг зүйл үгүй. Гэвч өмнө нь ямарваа нэгэн тоглогчийн тогтоосон рекордыг эвдэгдэхгүй гэдэгт үл итгэдэг спорт сонирхогчид цөөнгүй. Тухайн спортын төрөл дүрмээ шинэчилж, өөрчилснөөр хуучны нэгэн тоглогчийн амжилтыг давах, түүнтэй дөхөж очиход ч хүндрэлтэй болсон. Уншигч та бүхэнд өнөөг хүртэл хадгалсаар ирсэн спортын түүхэн дэх эвдэгдэшгүй таван рекордыг танилцуулж байна.

Мэргэжлийн сагсан бөмбөгийн лигт найман жил дараалан түрүүлсэн баг

       Америкийн үндэсний сагсан бөмбөгийн холбооны “Бостон Селтикс” баг 1959-өөс 1966 оны улирлуудад дараалан найман удаа аваргын цом өргөж байсан юм. Тухайн цаг үед өнөөгийнх шиг олон баг өрсөлддөггүйн зэрэгцээ “Бостон Селтикс” баг лигийн шилдэг тоглогчдыг багтаа цуглуулж, хадгалж чадсан нь энэ амжилтыг тогтооход гол нөлөө үзүүлсэн байна.

2632 тоглолтод амралтгүй дараалан оролцсон тамирчин

       Бейсболлын спортын нэрт тамирчин Кал Рипкэн Жуниор уг амжилтаа үзүүлэхийн тулд 16 жилийн турш бүх тоглолтод завсаргүй оролцжээ. Судлаачдын үзэж буйгаар “Өнөө цагийн тоглогчид бэртэл гэмтэлд ихээр өртөж, нэг улирлын бүх тоглолтод оролцож чадахгүй байгаа энэ цагт уг амжилтыг сэргээн шинэчлэх тоглогч дахиж төрөхгүй болов уу” хэмээсэн юм.

Сагсан бөмбөгийн лигийн нэг улиралд 50.4 оноо дунджилсан тоглогч

       Сагсан бөмбөгийн тамирчин өөрийн карьертаа 50 болон түүнээс дээш оноо авбал гайхалтай зүйл хэмээн тооцогддог. Харин Супер хүн хэмээгддэг Уилт Чемберлен АҮСБХ-ны 1961-ээс 1962 оны улиралд 50.4 оноо дунджилсан билээ. Тус спортын түүхэнд өнөөг хүртэл түүний энэ амжилттай ойртсон тамирчин үгүй.

Хоккейн спортын 2867 оноо авсан тамирчин

       Канадын нэрт тамирчин Уэйн Гретцки хоккейн спортынхоо карьерт нийт 2867 оноо авсан бөгөөд түүнээс өөр 2000 оноонд хүрсэн тоглогч үгүй билээ. Тэрбээр нэг улиралд 92 гоол оруулж, улирлыг 215 оноотой дуусгасан амжилтыг мөн  эзэмшдэг. Өнөөгийн хоккейн спортын гол төлөөлөгчдийн нэг ОХУ-ын тамирчин Алекснадер Овечкин түүний тухай “Ирээдүйн хоккейн спортод 2000 оноод хүрсэн нэгэн гарч, ирж магадгүй. Гэвч хэн ч оноо авах тал дээр түүн шиг хамгийн агуу нь болж чадахгүй” хэмээсэн юм.

АҮСБХ-ны 11 аваргын бөгжтэй тоглогч

       Найман жил дараалан аваргын цом өргөсөн “Бостон Селтикс” багийн хамгийн гол тоглогч нь Билл Рассел байв. Рассел “Селтикс” багийнхаа хамтаар найман жил дараалан аваргын цом өргөж, нэг жил завсарлаж, дахин гурван удаа аваргын цом өргөсөн байдаг. Тэрбээр бүх төрлийн спорт дахь хамгийн их аваргын шагналыг эзэмшдэг “ялагч” билээ.