“Ковид-19” вирусийн аюул спортын ертөнцийг ч заналхийлж байна. Улмаар спортын тэмцээнүүдийг хойшлуулж, эхлэх зайлшгүй шаардлагатай гэж үзсэн тохиолдолд үзэгчгүй зохион байгуулж байгаа билээ. Дэлхий дээрх сая сая спорт сонирхогчдын хүндлэлийг хүлээсэн алдартай тамирчдаас коронавирусийн халдвар авсан нь батлагдсан цөөнгүй тамирчин бий. Халдвар авч, халдвартайгаа тэмцэж буй тухайн тамирчдын төлөөллийг та бүхэнд хүргэе.

Кристиано Роналду

Португалийн хөл бөмбөгийн од Кристиано Роналду аравдугаар сарын 13-нд коронавирусийн халдвар авсан нь батлагдсан болохыг Португалийн хөл бөмбөгийн холбооноос мэдээлэв.  Өнөө цагийн хөл бөмбөгийн нүүр царай болсон нэрт тамирчны талаар "Сайн, шинж тэмдэггүй, тусгаарлагдсан байгаа" хэмээн мэдэгдсэн билээ.

Кэм Ньютон

"Нью Энгленд Петриотс" багийн хамгаалагч Кэм Ньютон аравдугаар сарын эхээр шинжилгээнд хамрагдаж, шинж тэмдэггүй хэвээр байгааг түүний аав нь мэдээлж байсан ч, Америкийн үндэсний хөл бөмбөгийн лигийн хүрээнд хийсэн гурав дахь шинжилгээгээр түүний хариу эерэг гарсан юм.

Дастин Жонсон

Гольфын спортын дэлхийн чансааг тэргүүлэгч Дастин Жонсон “Коронавирусийн сорилын хариу нь эерэг гарсан тул CJ цомын төлөөх тэмцээнээс хасагдлаа” хэмээн аравдугаар сарын 13-нд PGA Tour наадмын удирдах зөвлөлөөс мэдэгдэл хийсэн. Хэдий бие илааршиж байгаа ч, Жонсон CJ цомын тэмцээнд оролцож чадаагүй дээ харамсаж яваа гэнэ.

Жимми Жонсон

NASCAR цомын цуврал уралдааны долоон удаагийн аварга уралдааны авто машины нисгэгч Жимми Жонсон өнгөрсөн долоодугаар сард коронавирусийн халдвар авсан нь батлагдсан билээ. Улмаар түүнийг тусгаарлалтад авсан бөгөөд 663 уралдаанд завсаргүй оролцсон статустай байсан түүний амжилт тэр хүрээд дууссан юм. Гэвч түүний завсаргүй 663 удаа уралдсан нь уг спортын түүхэн дэх завсар авалгүй уралдсан хамгийн дээд амжилтыг тогтоосон аж.

Новак Жокович

Талбайн теннисийн эрэгтэйчүүдийн төрөлд дэлхийн номер нэг статустай теннисчин Новак Жоковичийн коронавирусийн шинжилгээний хариу эерэг гарсан талаар зургаадугаар сарын 23-нд хэвлэл мэдээлэл онцолж байв. Нэрт тамирчин Жокович халдвар авсан гэдгээ мэдэхээсээ өмнө европын хэд хэдэн хотоор аялж, нээлттэй тоглолтод оролцож, үдэшлэг зохион байгуулжээ. Хэвлэл мэдээлэл болон иргэдийн шүүмжлэлийн хариуд “Миний оролцооноос болоод халдвар авсан хүн бүрээс би уучлалт гуймаар байна. Тэр хүн бүрийн биеийн байдал сайн байгаасай хэмээн хүсэж байна” гэсэн юм.

Фредди Фриман

"Атланта Бравз" багийн анхны төлөөлөгч, бейсболлын спортын нэрт тамирчин Фредди Фриман долоодугаар сард халдвар авсан нь батлагдсан. Тухайн үед хянагч эмч нь түүний халуун 104.5 хэм байсныг онцолж байв. Нэрт тамирчин Фредди хэвлэл мэдээллийн байгууллагад өгсөн ярилцлагадаа “Би өнгөрсөн шөнө бяцхан залбирал үйлдсэн. Тэгээд өөрийн бурхандаа хандан би болоогүй тул намайг битгий авч яваарай” гэсэн тухайгаа дурдсан юм.

Руди Гоберт

Америкийн үндэсний сагсан бөмбөгийн холбооны “Юта Жазз” багийн тоглогч Руди Гоберт гуравдугаар сард коронавирусийн халдвар авсан нь олон нийтэд хүрсэн. Тухайн үед сагсан бөмбөгийн лигийн хүрээнд халдвар тархаагүй байсан юм. Олон нийтийн уур бухимдал, шүүмжлэл түүнийг чиглэсэн бөгөөд нэг багийнх нь хамтрагчид ч түүнээс холбоогоо тасалсныг эх сурвалж мэдээлсэн. Франц Улсад цар тахал дэгдсэн тухайн үед Францын сагсан бөмбөгийн шилдэг тамирчин Руди Гобертыг гарал угсаа, улс орноор нь шүүмжлэх хөгжөөн дэмжигчид олширсон. Энэ талаар Гоберт “Та бүхнийг энэ зүйлийг илүү нухацтай авч үзээсэй гэж хүсэж байна. Хэрэв бид хамтдаа хичээвэл ялж чадна хэмээн найдаж байна” гэсэн юм.