Боксын таван жингийн дэлхийн аварга Мөнгө хочит Флойд Мэйведер ирэх оны хоёрдугаар сарын 21-нд Юүтүбэр Логон Полтой тулалдах болсноо цахим хаягаараа дамжуулан мэдэгдэв. Юүтүбэр Логан Пол Флойдыг олон сарын турш цахим сүлжээгээр "Тэр тулалдаж чадахгүй. Жинхэнэ тулаан гэж мэдэхгүй. Зөвхөн мөнгөний төлөө л тулалддаг" хэмээн шүүмжилсэн билээ. "TMZ Sport" агентлагийн мэдээлснээр тулалдах хүсэлтийн анх Логан Пол өнгөрсөн есдүгээр сард тавьсан гэнэ. Харин нэрт тамирчин асан Флойд хариуг өгч, тулааны товыг зарлажээ.

       Өдгөө 43 настай нэрт боксчин асан Флойд замналынхаа туршид 50 тулаанд оролцож, нэг ч ялагдалгүйгээр зодог тайлсан билээ. Тэрбээр 2017 онд нэрт холимог тулаанч Конор МкГрегортой тулалдсан бөгөөд тус тулаан нь тулааны спортын түүхэн дэх хамгийн өндөр бооцоотой тулаан болсон юм. Харин Юүтүбэр Логан Пол боксын спортоор хичээллэдэг нэгэн. Гэвч тэрбээр мэргэжлийн тулаанд ганцхан удаа оролцож, Юүтүбэр KSI-д ялагдсан ажээ. Нэг нь бүхий л амьдралынхаа туршид боксын спортоор хичээллэж, нэг ч ялагдалгүй амжилттай бол нөгөө нь Юүтүб сувгаар дамжуулан хошин дүрс, бичлэг хийдэг эсрэг мэргэжилтэй уг хоёрын тулааныг дэлхийн олон сая тулааны спортын хөгжөөн дэмжигчид тэсэн ядан хүлээж байгаа гэнэ.