Өнгөрсөн хоёр улирал дараалан “Улирлын хамгийн үнэ цэнтэй тоглогч”-ийн шагналыг хүртээд буй өнөөгийн сагсан бөмбөгийн супер оддын нэг Яннис Антетокоунмпог чөлөөт агент болсонтой холбогдуулан тус спортыг сонирхогчдын дунд олон таавар гарч байгаа билээ. Тэр дундаа тус тоглогчийн “Лос-Анжелес Лейкерс” багт нэгдэх болов уу гэсэн таамаг давамгайлж байна. Чөлөөт агентын зах зээл эхэлсэнтэй холбогдуулан тус багийн супер од Энтони Дэвисийн гэрээний хугацаа дууссан. Гэвч “Лейкерс” багийн зүгээс одоогийн шилдгүүд болох Леброн Жеймстэй хоёр жилийн гэрээний сунгалт хийж, Энтони Дэвистэй таван жилийн хугацаатай гэрээ байгуулав. Энэ нь багийн хөгжөөн дэмжигчдэд Яннистай гэрээ байгуулах нөхцөл бүрдэж, цалингийн цэс хүрэхгүй нь гэсэн хар төрүүлээд амжжээ.

       Хэрэв Энтони Дэвисийн гэрээ хүлээлтийн төлөвтэй байх үед Яннисыг нэгтгэх магадлал илүү өндөр байв. Гэвч Энтони Дэвис таван жилийн гэрээг үзэглэхдээ цалингаа багасгасан мэдээлэл байна. Мөн Леброн Жеймс жилийн өөрийн цалингийн цэсээ багасгаж, зөвхөн өөрийн зүгээс гэхэд 10-аас 15 сая ам.долларын цалингийн “алдагдал” гаргажээ. Энтони Дэвис болон Леброн Жеймс нар маш өндөр дүнд хүрч болох гэрээнээсээ татгалзаж, ийм шийдвэр гаргасан нь одоо ч Яннис Антетокоунмпог багтаа нэгтгэх хүсэлтэй холбоотой талаар тоймчид онцолжээ. Тус хоёр тоглогч Яннис руу өдөр бүр залгаж, байр байдлыг нь асууж, ятгаж байгаа талаар албан бус мэдээлэл байгаа билээ. Ямартай ч Яннис “Лейкерс” багт нэгдэхээр шийдвэл супер одын асар өндөр дүнтэй гэрээ хийх бус, ирэх жилийн аваргын цомыг өргөх л зорилго өвөртлөхөөр байна. Дэлхийн даяарх сагсан бөмбөг сонирхогчид түүнийг хэнийг сонгохыг нь тэсэж ядан хүлээж байгаа гэхэд хилсдэхгүй ээ.