XXXII удаагийн зуны олимпын наадмыг ирэх долдугаар сарын 23-наас наймдугаар сарын 8-ныг хүртэл, паралимпын наадмыг наймдугаар сарын 24-нөөс есдүгээр сарын 5-ны хооронд зохион байгуулах урьдчилсан тов гарсан. Монгол Улсын шигшээ баг ээлжит зуны олимпын наадамд оролцох 42 эрх цуглуулаад байгаа билээ. Олимпод оролцох эрхийн төлөөх тэмцээнүүд үргэлжлэхийн зэрэгцээ “Ковид-19” цар тахалтай холбоотойгоор ээлжит наадам цуцлагдах эсэх асуудал дахин яригдаж эхэллээ. Үүнтэй холбоотойгоор “Токио-2020” зуны олимпын наадмын эргэн тойронд өрнөж буй үйл явдал, мэдээллийг тоймлон хүргэж байна.

-ОЛИМПЫН НААДМЫГ ЗОХИОН БАЙГУУЛЖ БАЙГАА НЬ “АМИА ХОРЛОЖ” БАЙГААГААС ЯЛГААГҮЙ-

          2021 он гарснаас хойш “Токио-2020” олимпын наадам цуцлагдах өндөр эрсдэлтэй байгаа талаар ОУОХ, Япон Улсын эрх баригч Либерал намаас мэдэгдэж байв. Өчигдөр буюу зургадугаар сарын 22-ны байдлаар Япон Улсад “Ковид-19” цар тахлаар 785287 хүн өвчилж, 14423 хүн эндээд байгаа бөгөөд үүнтэй холбоотойгоор тус улсын иргэд ээлжит зуны олимпын наадмыг хойшлуулах, цуцлах хүртэл арга хэмжээ авах нь зүйтэй хэмээн байр сууриа илэрхийлж байна. Саяхан “Токио-2020” олимпын наадмын түнш Японы “Асахи Шимбүн” сониноос зохион байгуулсан олимпын наадмыг цуцлах эсэх санал асуулгын дүнд нийт судалгаанд оролцсон иргэдийн 80 хувь нь тус наадмыг хойшлуулах бус цуцлах илүү үр дүнтэй хэмээн үзжээ.

          Цар тахлын цаг үе дундах хүн төрөлхтний хамгийн том спортын наадам болох олимпыг зохион байгуулах эсэх асуудал эрчимтэй яригдаж буй. Үүнтэй холбоотойгоор Япон Улсын цахим худалдааны томоохон компани болох “Софтбанк”-ын гүйцэтгэх захирал Масаёоши Сон “Олимпын наадмыг зохион байгуулж байгаа нь амиа хорлож байгаагаас ялгаагүй. Улсын хэмжээний аюулгүй байдал, иргэдийн амь настай холбоотой энэ асуудалд нухацтай хандаж, болж өгвөл энэ удаагийн зуны олимпын наадмыг цуцлах нь хамгийн зөв сонголт болно” хэмээн байр сууриа илэрхийлсэн байна. Мөн зургадугаар сарын 17-нд “Токио-2020” зуны олимпын наадмыг зохион байгуулах комиссын ерөнхийлөгч Сэйко Хашимото “Онц байдал зарласан ч ээлжит зуны олимпын наадам зохион байгуулагдана гэдэгт 100 хувь итгэлтэй байж болно” хэмээн мэдэгдсэн юм.

          Гэвч томчуудын олимпын наадмыг зохион байгуулна, байгуулахгүй гэсэн маргааны дунд олон нийтийн дур сонирхол “хаягдаж” байна. “Олимпын наадам ядуу хүмүүсийг хөнөөж байна”, “Бид үхмээргүй байна”, “Олимпын наадмыг цуцал” гэсэн лоозон, самбар барьж, жагссан иргэд эсэргүүцлээ илэрхийлсэн билээ. Гэсэн хэдий ч амьд нас, эрүүл мэндээ төлөөлөн жагсаалд оролцсон иргэдийн дуу хоолой эрх баригчдын чихэнд хүрэлгүй байсаар “замхарсан”. Сүүлийн таван сарын хугацаанд Японы Токио, Хоккайдо, Саппоро зэрэг газруудад наадмыг зохион байгуулах эсэх санал асуулгад бүгдэд нь хойшлуулах, аль эсвэл цуцлах санал тэргүүлж байсан юм.

-ЯПОН УЛС “ЗҮҮН ДЭЭР ТОГТСОН БУДАА” ШИГ БОЛОМЖОО АЛДАХГҮЙ-

          1964 оны XVIII зуны олимпын наадам Япон Улсын нийслэл Токио хотод байгуулагдсанаас хойш 57 жилийн дараа олимпын галт бамбар тус улсад очиж байна. Хүн төрөлхтний хамгийн том спортын наадам гэгдэх олимпыг зохион байгуулах нь асар том нэр хүнд. Япон Улс дахин хоёр дахь удаагаа өөр дээр нь “нисэж” ирсэн энэ боломжийг алдахгүй. Өчигдөр буюу зургадугаар сарын 22-ны өдөр ээлжит зуны олимптой холбоотой хэд хэдэн мэдээллийг албаны эх сурвалжаас олон нийтэд дэлгэсэн.

          XXXII зуны олимпын наадмыг 10 мянга хүртэлх үзэгчтэйгээр зохион байгуулах гэнэ. Мөн энэ тухайд Япон Улсын Ерөнхий сайд Ёшихидэ Сүга “Олимп болон паралимпын үеэр онц байдал зарлавал олимпын наадмыг үзэгчгүйгээр зохион байгуулж магадгүй” тухай мэдээлсэн юм. Тэрбээр мөн өөрийн хувьд ч үзэгчгүйгээр зохион байгуулах сонирхолтой байгаа гэнэ. Олимпын наадмын галт бамбар Япон Улсыг тойрч яваа. “Нэгэнт хөдөлсөн бол зогсохгүй” гэдэг шиг хүн төрөлхтний хамгийн том спортын наадмыг зохион байгуулах энэ том нэр хүндийг Япон Улс “тавиад туучихгүй” нь лавтай. Хэрэв энэ удаагийн зуны олимпыг дахин хойшлуулах шийдвэр хүрвэл цуцлагдах эрсдэл бий болохыг судлаачид сануулж байгаа юм. “Ковид-19” цар тахлын нөхцөл байдал тухайн оронд хүндэрч, ээлжит олимпын наадмыг хойшлуулж, цуцлахад хүрвэл дэлхийн дайны үеүдэд л цуцлагдаж байсан зуны олимпын наадам дөрөв дэх удаагаа цуцлагдана. Харин үзэгчгүйгээр зохион байгуулах шийдвэрт хүрвэл хүн төрөлхтөнд анх удаагаа хамгийн том спортын наадам болох зуны олимпоо үзэгчгүй зохион байгуулж байгаагаараа онцлог болох юм.