Байт харвааны зуны олимпын наадамд оролцох эрх олгох сүүлчийн тэмцээн Франц Улсын нийслэл Парис хотод боллоо.

Тус тэмцээнд Монгол Улсын тамирчин, ОУХМ Б.Урантунгалаг оролцож, тавдугаар байр эзлэн “Токио-2020” олимпын наадамд оролцох эрхээ авсан байна.

Тэрбээр эхний тойрогт гоц мөргөж, удаах даваанд Швейцарын Д.Илианаг 6:0, 1/16 шатанд Казахстаны Т.Фаридаг мөн 6:0, 1/8 шигшээд Узбекистаны А.Зиодахоныг 6:0-ээр буулган авсан юм. Дунд шөвөгт Чехийн Х.Марид 4:6-гаар ялагдсан ч онооны чансаагаар тавдугаар байрт орсон аж.

Улмаар ОУХМ Б.Урантунгалаг хоёр дахь зуны олимпын наадамдаа оролцох эрхээ авснаар Монголын баг одоогоор 42 эрхтэй болоод байгаа юм.

Олимпын наадмын эрх олгох тэмцээнүүд зургадугаар сарын 29-нд өндөрлөх бөгөөд манай баг, тамирчид хүндийн өргөлтийн төрлөөр дахин нэг эрх авах боломжтой.