Арабын Нэгдсэн Эмират Улсын нийслэл Дубай хотод өнгөрсөн нэгдүгээр сард “PUBG mobile” видео тоглоомын дэлхийн аварга шалгаруулах тэмцээн болж өнгөрсөн. Тус тэмцээнд манай орны “ZEUS” баг амжилттай оролцож, хүрэл медаль хүртсэн билээ. Энэхүү үйл явдал Монголын видео тоглоомын хөгжилд асар их нөлөө үзүүлж байна. Үүнтэй холбоотойгоор “PUBG mobile” тоглоомыг сонирхох залуусын тоо эрс нэмэгдсэн. Гэвч өдгөө л монголчуудын хараанд өртөж буй тус тоглоом нь өнгөрсөн онд дэлхийд хамгийн өндөр эрэлт, борлуулалттай байсан шилдэг 10 тоглоомын жагсаалтад багтаагүй юм. 2017 онд нээлтээ хийснээсээ хойш “PUBG mobile” видео тоглоомын хандалт жил ирэх тусам буурч байгаа нь дээрх жагсаалтад нөлөөлжээ. Өнгөрсөн онд хамгийн их эрэлт, борлуулалттай байсан шилдэг 10 видео тоглоомыг танилцуулж байна.

10. Tony Hawk’s Pro Skater

       Урьд өмнөх скүүтэрийн спортыг харуулсан тоглоомуудаас ялгаатай нь уг тоглоом нь орчин үеийн графикийг маш сайн ашиглаж чадсан. Тони Хоук гэх нэртэй скүүтэрчний зодог тайлах болсон бэртэл гэмтэл болон спортынх нь тухай гайхалтай түүхийг шинэчлэн найруулсан “Tony Hawk’s Pro Skater” видео тоглоом нь “PlayStation”, “XBox” болон компьютер дээр хоёр цуврал гарчээ.

9. Fall Guys

       “Fortnite”, “PUBG” зэрэг тулаантай тоглоом тоглосоор уйдсан тоглогчид өнгөрсөн жил бага багтаамж эзлэх, жижиг тоглоомууд сонирхох болжээ. Энэ үеэр хүүхэлдэйн киноны загвар, дүрслэлтэй нэгнийгээ шоглож, өрсөлддөг “Fall Guys” видео тоглоомыг “PlayStation” консол болон компьютер дээр тоглож байгаа юм.

8. Microsoft’s Flight Simulator

       Нислэг үйлдэхэд хэрэгтэй физик онол нь бодит амьдралд хэрхэн бууж буйг харуулсан “Microsoft’s Flight Simulator” видео тоглоомыг онгоцны нисгэгч мэргэжлээр сурч байгаа хүмүүс ихээр тоглож байгаа гэнэ. Дэлхийн олон улс орон болон тухайн улсуудын онцлогийг өндөр нягтаршилтай дүрс бичлэгээр харуулсан уг тоглоомыг дэлхийгээр аялах хүсэлтэй хүмүүс ч тоглоход сонирхолтой байна хэмээн хөгжүүлэгч компаниас мэдээлжээ. “Microsoft’s Flight Simulator” тоглоом нь одоогоор зөвхөн компьютер дээрх загвартай бөгөөд хөгжүүлэгч компаниас тун удахгүй “XBox” консолын загварыг гаргана хэмээн мэдээлсэн байна.

7. Call of Duty: Warzone

       Видео тоглоом сонирхогчдын эртний танил “Call of Duty” цуврал видео тоглоомын 2019 онд гарсан хамгийн сүүлийн цуврал нь өнгөрсөн онд нэлээдгүй эрэлттэй байжээ. “PUBG”, “Fortnite” видео тоглоомоос ялгаатай нь тулааны талбарын стратеги, системийг илүү тусгасан юм. “Call of Duty: Warzone” тоглоом компьютер болон “Xbox”, “PlayStation” консол дээрх загвараа гаргаад байна.

6. Ori and the Will of the Wisps

       “Ori and the Will of the Wisps” видео тоглоомын эхлэлд гол дүрийн баатар Ори ойгоос нэгэн шар шувууг олж, улмаар өсгөж, том болгодог байна. Цаг хугацааны эрхэнд шар шувуу том болж, төрсөн ой руугаа буцах болоход Ори түүнийг төрсөн газарт нь хүргэхээр тоглоомын адал явдал эхэлнэ. Орчин үеийн бусад тоглоомоос ялгаатай нь “Ori and the Will of the Wisps” тоглоом “Grand Theft Auto” тоглоомтой төстэй томоохон ертөнцийг дотроо агуулж буй. Уг тоглоомыг компьютер болон “Xbox”, “Nintendo Switch” зэрэг консол дээр тоглох боломжтой.

5. Animal Crossing: New Horizons

       “Animal Crossing: New Horizons” тоглоомд амьтдын хамтаар эзэнгүй аралд хаягдсан нэгэн охины тухай гарна. Хөл хорионы үед видео тоглоом сонирхогчид өөрийн хүслээр амьдралаа өөрчилж, шинээр амьдрал босгож буй уг тоглоомд өндөр үнэлгээ өгчээ. Зөвхөн “Nintendo Switch” консол дээр загвартай ч өнгөрсөн оны хамгийн эрэлттэй видео тоглоомууд дундаа тавдугаар байрт жагссан байна.

4. Among Us

       Сансрын хөлөг доторх хууран мэхлэгч буюу харь гарагийн хүнийг олж, онгоцноос гаргах ёстой “Among Us” тоглоом өнгөрсөн оны хоёрдугаар хагаст хамгийн их эрэлттэй байсан. Тоглогчид нэгнийгээ мэдэх боломжгүй бөгөөд худлаа ярих, хууран мэхэлснээр хөлгийн гишүүнийг ч хөлгөөс гаргаж магадгүй юм. “Among Us” тоглоомыг “Discord” компаниас хөгжүүлж, тоглоом доторх гишүүдийн хурлыг текст хэлбэрээр бичилгүй ярьдаг болгож өөрчилсөн. Уг тоглоомыг ухаалаг гар утсан дээрээ ч тоглох боломжтой.

3. Last of Us part-2

       Дэлхий даяар вирус тархаж, амьд үхдэлүүдийн эрин ирж буйг харуулсан уран зөгнөлт “Last of Us” видео тоглоомын эхний анги нээлтээ хийж, олон сая тоглогчдоос маш сайн гэх үнэлгээ авсан. Тэр хэрээрээ тоглоомын хоёрдугаар ангийг хүлээж байлаа. Харин өнгөрсөн оны гуравдугаар сард нээлтээ хийсэн уг тоглоомын хоёрдугаар анги нь видео тоглоом сонирхогчдын хүлээлтэд хүрээд зогсохгүй илүү давж гарсан талаар олны танил тоглогчид дурджээ. “Last of Us” тоглоомыг зөвхөн “PlayStation” консол дээр тоглох боломжтой.

2. Spider-man: Miles Morales

       Маш олон видео тоглоом сонирхогчид хүн аалзыг Питер Паркерын дүрээр таньдаг. Гэвч энэ удаад өнгөт арьст өсвөр насны жаал хүү Майлз Моралесийн Нью-Йорк хотын гэмт хэрэгтэй тэмцэж буй түүхийг харуулах болно. Урьд өмнөх хүн аалзын тоглоомуудаас ялгаатай нь видео тоглоом доторх байгаль, хотын орчныг илүү бодитой болгож, хамрах газрын хүрээг нь тэлсэн аж. “Spider-man: Mes Morales” тоглоом одоогоор “PlayStation” консол дээрх загвараа гаргаад байна.

1. Hades

       Эртний Грекийн домогт өгүүлснээр аянгын бурхан Зевс, далай тэнгисийн бурхан Посейдон нарын дүү болох Хейдсийг газар доорх ертөнцийн эзэн гэдэг. Сүүлийн 10 жилийн хугацаанд түүх, домгоос сэдэвлэсэн видео тоглоом зах зээлд хамгийн өндөр борлуулалт, эрэлт авч буй. Үүнтэй адилаар өнгөрсөн онд нээлтээ хийсэн “Hades” видео тоглоом газар доорх ертөнц буюу тамын эзний түүхийг өгүүлнэ. Эртний Грекийн домгоос сэдэвлэсэн өнгөрсөн оны хамгийн шилдгээр шалгарсан энэхүү тоглоомыг “Nintendo Switch” консол болон компьютер дээрээ суулган, тоглох боломжтой юм.