“Clubhouse” аппликэйшн сүүлийн нэг сарын хугацаанд iOS үйлдлийн систем дэх хамгийн эрэлттэй хайлтын нэг болоод зогсохгүй гадаад, дотоодын олны танил эрхмүүдийн өдөр тутмын хэрэглээнд нэвтэрчээ. Үүнтэй холбоотойгоор iOS үйлдлийн системтэй гар утас, төхөөрөмжийн эрэлт ч нэмэгдсэн байна.  

      “Clubhouse” аппликэйшнийг зөөврийн радио, подкаст хэлбэрээр ашиглаж, яриа, хэлэлцүүлэг өрнүүлдэг. Тус аппликэйшнд бүртгүүлэхийн тулд хэрэглэж буй хэн нэгэн хүнээс танд хүсэлт ирэх хэрэгтэй. Хэрэглэгч бүртгүүлснийхээ дараа өөрийн сонирхлоор дуу хөгжим, уран зохиол, шинжлэх ухаан гэх зэрэг каталогиос сонголт хийх бөгөөд сонголт хийсний дараа хэрэглэгчид тухайн каталогитой холбоотой ярианы өрөөнүүд гарч ирнэ. Өрөөнд өрөөг үүсгэгч, хөтлөгч, сонсогч зэрэг төрлүүд бий. Өрөөг үүсгэгч болон хөтлөгч нь хэн, хэзээ ярих боломжийг хангаснаар яриа, хэлэлцүүлэг өрнөдөг. Олны танил эрхмүүдийг хамруулж, олон сая хэрэглэгчдийг нэгтгэж чадсан “Clubhouse” аппликэйшний талаарх сонирхолтой баримтуудыг хүргэж байна.

-“Clubhouse”-д сүүлийн нэг сарын хугацаанд зургаан сая гаруй хэрэглэгч нэгдсэн бөгөөд 10 сая гаруй хүн татаж авсан байна.

-Уг аппликэйшнийг анх Пол Дэвисон, Рохан Сет нар өнгөрсөн 2020 оны гуравдугаар сард зохион бүтээж, дөрөвдүгээр сарын 8-наас цахим сүлжээгээр цацсан юм.

-“Clubhouse” iOS үйлдлийн систем хэрэглэгчдийн хүртээл болсноосоо хойш буюу өнгөрсөн оны тавдугаар сард 10 сая ам.доллароор үнэлэгдсэн. Харин өнгөрсөн нэгдүгээр сарын 28-нд нэг тэрбум ам.доллароор үнэлэгджээ.

-“Clubhouse” аппликэйшн нээлтээ хийснээс хойш дэлхийн хамгийн баян хүн Элон Маск, реппер Дрейк, жүжигчин Кэвин Харт, “Фэйсбүүк” сүлжээг үүсгэн байгуулагч Марк Зукерберг зэрэг эрхмүүд ашиглаж эхэлсэн аж.

-Өнгөрсөн хоёрдугаар сарын 2-нд автомашин үйлдвэрлэгч “Тесла” компанийн ерөнхийлөгч, дэлхийн хамгийн баян хүн болох Элон Маск “Clubhouse”-д хэлэлцүүлгийн өрөө нээж, одон орон, орон зайн тухай хэлэлцүүлэг хийжээ. Тэрбээр уг хэлэлцүүлгийн өмнөхөн тус аппликэйшнд 100 сая ам.долларын хөрөнгө оруулалт хийсэн байна.

-“Фэйсбүүк” сүлжээг үүсгэн байгуулагч Марк Зукерберг “Clubhouse"-ын идэвхтэй хэрэглэгчдийн нэг бөгөөд өнгөрсөн долоо хоногт хийсэн мэдэгдэлдээ “Фэйсбүүк”-д “Clubhouse”-тай адил каталог нэмж оруулна хэмээсэн юм.

-Тус аппликэйшнийг хэрэглэгчид удахгүй нэмэгдэх хэрэглэгдэхүүнүүдийг ашиглаж, зар сурталчилгаа үзэж, түүнийгээ хуваалцсанаар орлого олох боломжтой гэнэ.

-“Clubhouse”-ыг үүсгэн байгуулагч Рохан Сетийн охин нь алхах, ярих чадваргүй төрөлхийн хөгжлийн бэрхшээлтэй бөгөөд Рохан Сет охиндоо ертөнцийн сонин хачин, асар их мэдлэгийг дэргэд нь хүргэхийн тулд уг программыг зохион бүтээсэн тухайгаа нэгэн ярилцлагынхаа үеэр дурджээ.