Дэлхий дахинаа коронавирусийн цар тахлаас урьдчилан сэргийлэхийн тулд хүмүүс хоорондоо зай барьж, Засгийн газрын түвшинд иргэдийнхээ аюулгүй байдлыг хангах үүднээс QR кодыг идэвхтэй ашиглах болсон. Тэгвэл QR кодын талаар та юу мэдэх вэ.  “Эргэлт.мн” сайт QR кодын тухай сонирхолтой баримт, түүний гарал үүслийн талаарх мэдээллийг хүргэж байна.

       QR кодыг анх 1994 онд Японы “Тоёота” компанийн охин компани болох “Денсо Вэйв” компани нь тээврийн хэрэгслийн үйлдвэрлэл, эд ангиудад хяналт тавих зорилгоор зохион бүтээжээ. QR код нь ханз, кана, үсэг, тоон тэмдэгтүүдийг нийлүүлэн 7000 гаруй дүрсний нийлбэрээс бүтдэг учир энгийн нэгэн бар кодоос 10 дахин илүү хурдан унших чадвартай аж. Анх бүтээсэн цагаасаа хойш QR код нь хөгжиж, бүтээгдэхүүний гарал үүслийн мэдээллийг олох, мөн бүтээгдэхүүний дэлгэрэнгүй мэдээлэл, байршил, үйлдвэрлэсэн цаг хугацааг хянах боломжтой болсон юм.

       “Денсо Вэйв” компани нь анх QR кодыг зохион бүтээхдээ тус кодонд зориулан өмчийн эрх аваагүй бөгөөд бүх нийтийн хэрэглээ болгож, олон нийтэд зориулжээ. Ингэснээр иргэд өөрсдөдөө зориулсан хувийн QR кодтой болж, түүнийгээ эзэмших боломжтой болсон аж.

       QR код нь зохион бүтээгдсэнээсээ хойш 18 жилийн дараа буюу 2012 онд Дэлхийн дизайн, технологийн байгууллагын “Аж үйлдвэрийн шилдэг дизайн” шагналыг хүртсэн байна. Ухаалаг гар утсыг зохион бүтээж, олон нийт өргөнөөр хэрэглэх болсноос хойш QR кодын хэрэглээ эрс нэмэгджээ. Зөвхөн бараа, бүтээгдэхүүний гарал үүсэлд хяналт тавихад зориулагдаж байсан QR код 2010 оны сүүл үе гэхэд 1200 хувиар нэмэгдсэн байна. Өдгөө Япон Улсаас гадна АНУ-д QR кодын хэрэглээ өргөн байдаг бөгөөд тус кодыг ашигладаг иргэдийн гуравны хоёр нь эмэгтэй хүмүүс гэх судалгаа байдаг. QR кодын үүсэл, хөгжил зөвхөн хоёртын кодлолоор тогтохгүй 2004 онд бичил QR бүтээж, түүнээс хойш дөрвөн жилийн дараа тэгш өнцөгт модулиудтай iQR кодыг зохион бүтээсэн байна. Орчин үед QR кодыг гэмт хэрэгтнийг мөшгөх, хуурамч бичиг баримтаас хамгаалах зэрэгт ашиглах болсон. Анх QR кодыг зохион бүтээсэн “Денсо Вэйв” компаниас тус кодонд үргэлжлүүлэн сайжруулалт хийж байгаа юм.