Монгол Улсын Урлагийн гавьяат зүтгэлтэн, жүжигчин, найруулагч Л.Эрдэнэбулган таалал төгсжээ. Ард олондоо Хатанбаатар Магсаржавын дүрээр танигдсан тэрээр 1940 оны хоёрдугаар сарын 16-нд Булган аймгийн Бугат сумын Бухын гол хэмээх газар төрсөн аж.

       Тэрээр Улсын дуурь, бүжгийн театрт 10 гаруй жил гоцлол дуучнаар ажиллахдаа үндэсний болон дэлхийн сонгодог 20 гаруй дуурь дуулсан юм. Дэлхийн сонгодгуудаас П.И.Чайковскийн “Евгени Онегин”, Ж.Россинийн “Севилийн үсчин”, Ж.Бизений “Кармен”, Ж.Вердийн “Отелло” зэрэг дуурийг найруулан Монголын тайзан дээр толилуулжээ.