Ирээдүйг зөгнөдөг гэгддэг Симпсоны гэр бүлийн тухай өгүүлэх “Симпсонс” хүүхэлдэйн кинонд 2021 оныг ямар байдлаар дүрсэлснийг уншигч та бүхэнд хүргэе.

      "Симпсонс" хүүхэлдэйн кинон дээрх 2021 оны нэгдүгээр сарын 20-ныг дүрсэлсэн анги дээр маш том иргэний дайн болж, олон сая хүн амиа алдаж буй тухай өгүүлжээ. Иргэний дайныг харуулсан үзэгдэлд зурагт самбарууд байх бөгөөд тэдгээрт “Байден уу, Харрис уу”, “Трамп уу, Путин уу”, “Аль нь ч байсан хамаагүй, нэгийг нь л сонго” хэмээх үгс байх юм. Энэ нь улс төрийн нэлээдгүй хэцүү, том асуудлыг хөмрүүлж, сонгох, сонгогдох эрх нь эцэстээ иргэний дайн үүсгэж болзошгүй талаар харуулжээ. АНУ-ын улс төрд Дональд Трамптай холбоотой асуудал дундрахгүй байгаа энэ үед дээрх зөгнөл олон нийтэд тийм ч сайхан санагдахгүй л болов уу.

      Харин "Симпсонс"-ын 2021 оныг зөгнөсөн ээлжит бөгөөд сүүлийн зөгнөл нь маш том хэмжээний сүйрэл, мөхлийн аюул. Томоохон хот, суурин газрууд сүйрэлд автаж, түймэр гарч, хүмүүс хоорондоо дайтаж, үхэгсэд амилж, хиймэл оюун ухаант роботууд дэлхийг эзлэхээр төлөвлөж буй тухай гарах юм. Ямар ч хүн үзсэн бие арзаймаар энэ зөгнөлд биелэх боломжгүй зүйлс олон бий. Үхэгсдийг амилуулж, хиймэл оюун ухаант роботуудыг хүнээс олон тоотой харуулсан нь Симпсоны ээлжит зөгнөлийг “хог дээр” гаргав. Гэвч энэ хүүхэлдэйн кино цаг үргэлж худлаа “бурчихдаг” эд бас биш.

       Анх 1989 оноос хойш комик, дэлгэцийн бүтээл хэлбэрээр олон нийтэд хүрсэн “Симпсонс” хүүхэлдэйн киноны цуврал нь нийт 695 анги гарахдаа ирээдүйд тохиох цөөнгүй үйл явдлыг зөгнөсөн байдаг. 2010 онд гарсан цувралын нэгэн ангид 2016 оны Нобелийн шагналтнуудын жагсаалтыг гаргадаг. Харин тус жагсаалт нь ирээдүйг зөв тааж, жагсаалтад багтсан Бенгт Холмстрём 2016 онд Нобелийн эдийн засгийн шагналыг хүртсэн. Мөн тус хүүхэлдэй “20 дугаар зуун” кино продакшныг дүрслэхдээ “Walt Disney” компанийн дор ажиллаж байгаагаар дүрсэлсэн. Гэтэл хүүхэлдэйн дээр үзүүлсэн дүрс биеллээ олж, 2019 онд “Walt Disney” компани “20 дугаар зуун” кино продакшныг 71.3 тэрбум ам.доллароор худалдаж авсан билээ. Дээрх хоёр жишээнээс гадна цөөнгүй үзэгдлүүд нь “Симпсонс” хүүхэлдэйн киног “зөн билэгч” болгосон. Ирээдүйг харж, зөгнөдгөөрөө алдаршаад байсан тус хүүхэлдэйн кино коронавирусийг хэдий нь зөгнөсөн байжээ.

     АНУ-ын зохиолч Билл Оаклигийн зохиолыг нь бичиж, 1993 онд цацсан нэгэн ангидаа 2020 оныг хорьж орхисон коронавирусийг зөгнөсөн аж. Тус зөгнөлд гарснаар 2020 онд Япон Улсад аймшигтай уушгины халдварт өвчин дэлгэрч, нэгэн халдвартай иргэн Японоос АНУ руу зорчин очсоноор дэлхий даяар халдвар тархаж, бүх хүн нэгнээсээ зай барьж, амны хаалт зүүж буйг дүрсэлсэн юм.