Фүжинүма Саторү бол 29 настай, цагийн ажил хийж, ээжийнхээ хамтаар аж төрдөг ямар ч нийгмийн идэвхгүй нэгэн. Түүнийг бага сургуулийн сурагч байхад ангийнх нь нэгэн охин ор сураггүй алга болж, бусдын гарт амиа алдсан байдалтайгаар олдсон юм. Нэгэн өдөр санамсаргүйгээр үүнийг санан дурсаж явсаар гэртээ ортол ээж нь хэн нэгэнд хорлогдсон байх аж. Ээжийнх нь амиа алдсан хэрэгт цагдаагийн байгууллагынхан Саторүг сэжиглэж, түүнийг эрэн сурвалжилж, хайж эхэлдэг. Тэрбээр айж сандарсандаа цагдаа нараас зугтсаар нэг л мэдэхэд ухаан алдаж, сэрэхдээ танил дотно атлаа алс хол гэмээр мэдрэмжийг авдаг.

       “Амьдрал гэнэтийн явдлаар дүүрэн” гэдэг шиг маш этгээд хэргийн дараа Саторү 18 жилийн өмнөх үе рүүгээ ирсэн юм. Уг үйл явдлыг үгүйсгэхийг хүсэх ч эхний хэдэн өдрөө туршилт хийсээр 29 насандаа буцаж очиж чадахгүйгээ мэднэ. Хэдий өөрийнх нь туулж, өнгөрүүлсэн амьдрал ч хэдийнээ өөрийнх нь бус санагдах амьдралаа шинээр эхлүүлж, өмнө нь туулсан замаа өөрчлөхөөр шийднэ. Өмнөх амьдрал руугаа эргэж очихоосоо өмнө санан дурссан ангийнхаа охин Каяогийн үхлийн шалтгааныг судлахаар шийдэж, түүний амь насыг ч аврахыг хүсдэг. Мөн тэрбээр ээжийг нь хөнөөсөн нэгэн өмнө нь Каяог хөнөөсөн байж болохыг таамаглана.

       Харин Каяо бол гэр бүлийн хүчирхийлэлд өртсөн, сургуульдаа үргэлж шарх сорвитой ирдэг, дуу муутай охин. Саторү Каяогийн үхлийн шалтгаанд түүний гэр бүлийнхнийг сэжиглэх бөгөөд гэр бүлийнхнийх нь талаар мэдээлэл цуглуулж, судалж эхэлдэг. Улмаар Саторү Каяо хоёр нөхөрлөж, дотносно. 11 насандаа эргэн очсон Саторү гэр бүлийнхэндээ зодуулж, хөөгдөж гарсан Каяотой өвлийн хүйтэн шөнө дулаацахын тулд дэнлүүний гэрэлд сууж, түүний зовлон шаналлыг хуваалцахыг хичээнэ.

       Тэдний нөхөрлөл цааш үргэлжилж, Саторү Каяогийн амь насыг хөнөөсөн этгээд нь гэр бүлийнхэн нь биш гэдгийг мэдэх болно. 18 жилийн өмнөх цаг хугацаа руугаа эргэн очсон нийгмийн идэвхгүй Фүжинүма Саторүгийн бусдын амьдралд тусалж, өөрийнхөө ч амьдралыг өөрчлөхийг хүссэн түүхийн үргэлжлэлийг уншигч та бүхэнд үлдээе. Одоогоос дөрвөн жилийн өмнө Японы зохиолч Кей Санбегийн “Зөвхөн би л ор сураггүй алга болсон хот” зохиолыг Томохико Итоү анимэ болгон найруулж, “Би л байхгүй хот” нэрээр үзэгчдэд хүргэж байлаа. Үзэгчдийн дунд 8.39 гэж өндрөөр үнэлэгдсэн уг бүтээлийн гол дүр болох Фүжинүма Саторүгийн түүх хүний дотоод мөн чанар, эргэлзээ, хүлээлтийг хамгийн сайнаар харуулж чадсан хэмээн судлаачдын сайшаалыг хүртсэн юм.