Төрийн шагналт, Ардын жүжигчин Н.Сувд 1948 оны эл өдөр Улаанбаатар хотод мэндэлжээ. 1972 онд ЗХУ-ын ВГИК-ийг тайз дэлгэцийн жүжигчний мэргэжлээр төгсөж, өнөөг хүртэл тайз, дэлгэцийн бүтээлд идэвхтэй ажиллаж, “Мандухай сэцэн хатан” киноны Мандухайн дүрээрээ үзэгчдийн сэтгэлд хоногшиж, ард түмний хайртай жүжигчдийн нэг болсон билээ.

       Тэрбээр 1973 онд Н.Островскийн “Инжгүй хүүхэн” жүжгийн анхны тайзны дүрээ Ларисагийн дүрээр бүтээж, анхныхаа дэлгэцийн бүтээлд 1972 онд “Эхлэл” кинонд Хорлоогийн дүрээр мөнхөрчээ. “Мандухай сэцэн хатан” киноны Мандухайн дүрд тоглож, төрийн шагнал хүртэхдээ 41 настай байсан бөгөөд энэ жил “Анна Каренина” жүжигт дүр бүтээж, дахин үзэгчдийнхээ хайр, хүндэтгэлийг хүлээгээд байна.