Одоогоос 27 жилийн өмнөх энэ өдөр “Нирвана” хамтлагийн ахлагч, дуучин Курт Кобейн амиа хорлосон билээ. Өөрөөр хэлбэл Нирвана хамтлаг тарж, рок хөгжмийн гранж урсгал “эзэнгүй” болсон өдөр юм. Тэр өдрөөс хойш Нирванагийн суурь, сүнслэг чанарыг мэдэх нь дурсаж, мэдэхгүй нь зөвхөн хувцсан дээрээс л харж явсаар 27 жил өнгөрчээ. Ядах нь ээ хувцсан дээр ч өөрсдийн дүрээ бүтээсэн Нирвана. Миний л Нирвана.

Цөөн жилийн замналдаа дэлхийг шуугиулсан Нирвана

Курт Дональд Кобейн 1967 оны хоёрдугаар сарын 20-нд АНУ-ын Абердин гэх хотод мэндэлжээ. Тэр өнөөдөр амьд байсан бол 54 нас хүрэх байлаа. Гэхдээ үгүй. Төрсөн цагаасаа л амьд хөгжимтэй ойр өссөн нь түүнийг ирээдүйн “од” болоход нь ч нөлөөлсөн байж мэдэх. 19 настайдаа л олны хөлд дарагддаг гудамжны хананд “Бурхан бол ижил хүйстэн” гэж бичээд баривчлуулж байв. Хүн төрөлхтөнд илгээх гэсэн түүний ойлголт, үзэл бодол нь бурхан ч мөн хүмүүсийн адил, идэж, ууж, унтаж, сэрнэ. Тиймээс хүний л адил бэлгийн чиг хандлага, үзэл суртал нь ч өөр байж болох аж. Курт 1987 онд Нирвана хамтлагаа байгуулж, анхны дебютээ 1989 онд “Bleach” нэртэй цомгоороо эхлүүлж байв. Түүнээс хойш Нирвана хамтлаг “Nevermind”, “In Utero” зэрэг цомгоо хэвлүүлж, дэлхий даяар 50 сая гаруй хувийг борлуулсан юм. Тэр, бас тэд тэгж л дэлхийд танигдсан. Хэдий дэлхийд танигдсан ч төд удалгүй 1994 онд Курт амиа егүүтгэж, Нирвана хамтлаг тарсан. Бусад амьд хөгжмийн хамтлагууд шиг урт удаан хугацааны карьертай байгаагүй ч тэд олдсон цөөн жилийн карьертаа дэлхийг шуугиулж амжсан юм.

Нирвана буюу Буддын шашны нирваан дүр

Монгол хэлэнд нирвааныг тайлбарлахдаа “Гаслан зовлонг төрүүлэгч муу дур хүсэл. Үнэнхүү гэгээнд хүрч, ариусах хүсэл” хэмээн тайлбарласан байдаг. Харин өөрөөр буддын шашны лам хүнийг ч нас барахад нирваан дүр үзүүлэх гэдэг. Нирвана хамтлаг “Lithium”, “All Apologies”, “Jesus Doesn’t Want Me For A Sunbeam” зэрэг дуунууд нь бурхан, шашны үзлийг гаргасан бөгөөд энэ нь Курт болон Нирвана хамтлагийнхны үзлийг тунхагласан болов уу. Ялангуяа “In Utero” цомог дотроос үзэл суртлын “үнэр ханхалдаг”. Харин нирваан гэх дүрийн учир буюу шашны үзэл заасан бурхан болоочийн нирваан дүр Курт Кобейнтэй давхцаж мэдэх юм. Түүний амиа хорлолт одоог хүртэл нууц хэвээр л, хэн ч, юу ч нотолж, баталж чадалгүй өдийг хүрсэн. Цаашид ч тийм байх болов уу. Ихэнх хүмүүс Кобейны үхлийг хар тамхитай холбодог. Гэвч Кобейн хар тамхи, мансууруулах бодист хэтэрхий донтож байсан үеэ өнгөрөөж, амьд байх сүүлийн жилүүддээ үүний эсрэг тууштай тэмцэж байсан нэгэн.

Харин хамгийн гол нь яагаад үхлийг сонгох болсон бэ гэдэгт л оршино.

Нэгэн удаа Курт “Хүмүүс бүгдээрээ л адилхан хог новш” гэж байлаа. Магадгүй үүний адилаар тэрээр хүн төрөлхтнөөс уйдсан, аль эсвэл үнэхээрийн гэгээн буюу нирваан дүрийг ч олохоор “явсан” байж мэдэх юм. Тэр эрсэн зүйлээ олсон. Өдгөө хэн ч түүнийг мартахгүй, түүнийг таньж, мэддэг хүмүүсийн цуваа тасрахгүй. Миний мэдэх Курт Кобейн 27 жилийн өмнөх яг энэ өдөр амиа алдсан ч цаашид, ирээдүйд, өнө хожид дуу хөгжмөөрөө бидэнтэй цуг “амьдарсаар” байх болно.