С.Зоригийг хөнөөсөн гэмт хэрэгтнүүд үнэхээр Т.Чимгээ, Б.Содномдаржаа нар мөн үү, эсвэл тэднийг эрүүдэн шүүж ял хүлээлгэсэн үү. Эрүүдэн шүүсэн нь үнэн бол Т.Чимгээ, Б.Содномдаржаа нарын хэргийг сэргээн шалгаж эхлэх үү, сэргээлээ гэхэд хэнд ашигтай вэ. Эсвэл хэсэг бүлэг хүмүүс эрүүдэн шүүсэн гэх хэрэг зориудаар зохион дэвэргэж, С.Зоригийн хэргийг гацаах, гэм буруутнуудыг хэргээс холдуулах гэж байна уу гэх олон асуултууд энэ өдрүүдэд хариултаа хүлээж буй. Өнөөдөр Улсын дээд шүүх Б.Хурц, Г.Эрдэнэбат нарын есөн хүн Т.Чимгээ, Б.Содномдаржаа нарыг эрүүдэн шүүсэн эсэхтэй холбоотой асуудлыг хаалттай хэлэлцсэн. 

 

Үүнээс өмнө буюу энэ сарын 8-нд Ерөнхий сайд Л.Оюун-Эрдэнэ С.Зоригийг хөнөөсөн хэргээр ял эдэлж буй Т.Чимгээтэй хорих ангид уулзсан. Гарч ирээд “Сүүлийн үед Б.Баасанцогт гэдэг хүн гарч ирсэн. Хэргүүдийг Б.Баасанцогт өөрийн компьютертээ хойшлуулахаар төлөвлөдөг байсан хэрэг илэрсэн. Хэрвээ Б.Баасанцогт шүүхийн хараат бус байдалд хөндлөнгөөс оролцсон нь тогтоогдвол том асуудал болж хувирна” гэж мэдэгдсэн. 

 

Ингээд өмгөөлөгч Б.Баасанцогт хувийн компьютертээ “Б.Хурц нарын шүүх хурал 2020 оны зургадугаар сарын 8. Шүүх нь таслан сэргийлэх арга хэмжээг өөрчлөх, ингэснээр цагдан хорих, эсхүл шүүхийн харьяалал өөрчлөх, хэрвээ шүүсэн нөхцөлд хэргийг С.Зоригийн хэргийг шинээр илэрсэн нөхцөл байдалд тооцож шийдвэрлэх” гэсэн схем зурсан байсан баримтыг олон нийтэд ил болгосон. Тэгвэл Б.Хурцтай хамт шүүгдэж буй УЕП-ын орлогч прокурор асан Г.Эрдэнэбат “Бидний хэрэг Б.Баасанцогтын зурсан энэ схемээр явагдсан” гэх агуулгатай тайлбар хийлээ. Өөрөөр хэлбэл, “Б.Хурц, Г.Эрдэнэбат нарын есөн хүнийг эрүүдэн шүүсэн хэрэгт холбогдуулах нь анхнаасаа зохион байгуулалттай, төлөвлөгөөтэй өрнөсөн юм байна” гэсэн юм.

 

Тухайлбал, Г.Эрдэнэбат “Сүүлд өмгөөлөгч Б.Баасанцогтын компьютерээс баримт задарч, дуулиан боллоо. Тэрний өмнө надад маш том хардлага байсан. Юу гэхээр, намайг 2020 оны тавдугаар сарын 27-нд яллагдагчаар татсан. Намайг мөрдөн байцаагч дуудаад “Та энэ хэргийг зохион байгуулсан байна” гэхэд би зөвшөөрөөгүй. “Та нар ийм ийм баримтыг нэмж авч өгөөчээ, үүнийхээ дараа намайг буруутгах эсэхээ шийд. Та нарын цуглуулсан баримт дотор миний баталсан тогтоол, гаргасан шийдвэр, прокурорын зөвшөөрөл гэх мэт зүйлс алга аа. Би ямар ямар зөвшөөрөл өгсөн, ямар тогтоол баталсныг тагнуулын байгууллагаас аваад баримтдаа хавсарга” гээд хүсэлт гаргасан. Тэр ажил ерөөсөө хийгдээгүй. Зургаадугаар сарын 5-нд намайг дахиж дуудаж байцаалт авсан. Би нөгөө л “Ийм  ийм баримтыг шалгаж өгөөчээ” гэдэг зүйлийг ярьсан. Мэдүүлгээ өгөөд харих гээд зуслангийн зам дээр явж байтал мөрдөн байцаагч араас утасдаад “Би нэг зүйл дээр таны гарын үсгийг дутуу үлдээсэн байна” гэсэн. Ингээд зам зуур намайг зогсоож үлээлгээд, энэ хооронд мөрдөн байцаагч араас хүрээд ирсэн. Тэр гарын үсэг зуруулах зүйл нь намайг прокурорт шилжүүлэх тухай мөрдөгчийн санал байсан. Ингээд би ерөөсөө тав хоногийн дотор мөрдөгдөөд, яллагдагчаар татагдаж мөрдөн байцаалтын шатанд ажлын тав хоног оролцоод хэрэг маань прокурорт шилжсэн. Ингээд зургаадугаар сарын 5-нд прокурорт шилжсэн чинь 8-нд нь яллах дүгнэлттэйгээ танилц гээд прокурор дуусан. Уг нь журмаараа бол прокурор хэргийг аваад уншиж судлаад, яллах дүгнэлтээ бичдэг юм л даа. Надад 80 гаруй хуудас яллах дүгнэлт бичсэн байсан. Миний хэргийн 40 хуудас материалыг зогсоо зайгүй уншаад 80 хуудас яллах дүгнэлт бичхэд миний бодлоор сар гаруй болно.

 

 

Ингээд хэрэг шүүх дээр очлоо. Шүүхийн гадаа их өвөрмөц жагсаал цуглаан болсон. “Энэ хүмүүсд ял өгвөл та нарыг шударгаар шүүсэн гэж үзнэ. Үгүй бол тооцохгүй”, “МАНАН-гийн шүүгч нар” гээд жагссан. Эрүүгийн эрхзүйн салбарт олон жил ажилласан хуульч хүнийхээ хувьд энэ ямар сонин процесс өрнөөд байна вэ, прокурор энэ хэргийг бүх талаас нь хянаж чадав уу, мөрдөгч миний хүсэлтийг хангасангүй, бас энэ жагсаал ямар учиртай вэ гэж бодсон. Шүүх хурал эхэлсэн чинь гадаа хүмүүс жагсаад байдаг, сошиалаар шүүгч нарын тухай маш худлаа, гүтгэлэгийн чанартай мэдээллүүд гараад байдаг. Би тэр шүүгч нарыг танихгүй. Ингээд Шүүх “Энэ хэргийг шийдье гэхээр олон баримт цуглуулаагүй дутуу байна, энэ хэргийг хуйвалдаад хийчихсэн гэж байгаа бол шүүхийн шийдвэрийн алба хаагчдаас эхлээд олон хүн татагдаагүй байна гээд буцаасан. Маш их хэл ам, шүүмжлэлд өртсөн. Энэ бүхний дараа Б.Баасанцогтын төлөвлөгөө гэдэг юм задарлаа гэхэд бүх юм яах аргагүй төлөвлөгөөний дагуу явсан юм байна гэж бодсон. Б.Хурц нарын хэргийг таслан сэргийлэх арга хэмжээг нь өөрчилнө. Харьяаллыг нь өөрчилж байгаад шийднэ. Шийдэнгүүт нь араас нь С.Зоригийн хэргийн шинэ нөхцөл байдлаар сэргээнэ. Ийм төлөвлөгөөтэй л шүүх хурал байсан юм байна” гэлээ.