Монгол Улсын 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслийг чуулганы нэгдсэн хуралдаанаар хэлэлцэж байна. Хэлэлцэж буй асуудалтай холбоотой гишүүд асуулт асууж, хариулт авч байна. 

УИХ-ЫН ГИШҮҮН О.НОМИНЧИМЭГ: УИХ арваннэгдүгээр сарын 15 гэхэд төсвөө батлахгүй бол тарна гэдэг мэдээлэл тарааж байна. Тиймээс энэ процессын асуудлыг тодорхой болгох хэрэгтэй байна. Төсвийн урсгал зардлыг танаад үр ашигтай байхаар долоо хоногийн дотор төсвөө хэлэлцэж болохгүй байгаа юм уу. 

УИХ-ЫН ЕРӨНХИЙ НАРИЙН БИЧГИЙН ДАРГА Б.БААСАНДОРЖ: Монгол Улсын төсвийн төслийг УИХ тусгай дэгээр хэлэлцдэг.  Бас хязгаартай асуулт асуудаг.  Төсвийн нэгдэх, хоёр дахь хэлэлцүүлэг дээр буюу хоёр сарын хугацаанд УИХ-ын 126 гишүүнээс хэн хүссэн нь чөлөөтэй зарчмын зөрүүтэй санал гаргах, саналаа хэлэх боломж байсан. Есдүгээр сарын 1-нд Засгийн газар төсвийн төслийг өргөн барьсан. Арваннэгдүгээр сарын 1 хүртэл хоёр сарын хугацаанд  санал гаргах боломжтой байсан. УИХ-д 2025 оны төсвийн төслийг буцаах боломж байсан.Өөрөөр хэлбэл, төсвийн нэгдүгээр хэлэлцүүлэг дээр төсвийг буцаах боломж байсан. Парламент олонхиороо асуудлыг шийдвэрлэдэг.  УИХ-ын гишүүд маань “Монгол Улсын 2025 оны төсвийн төсөл нь Төсвийн тухай хууль болон Төсвийн тогтвортой байдлын тухай хуульд заасан шалгуур, Дунд хугацааны төсвийн хүрээний мэдэгдлийн тусгай шаардлага, Улсын хөгжлийн жилийн төлөвлөгөөнд нийцсэн байна” гэж үзээд хоёдугаар хэлэлцүүлэгт шилжүүлсэн.