"ХОТЫГ УТААГҮЙ БОЛГОНО" ХЭМЭЭН РЕКЛАМДАЖ БАЙСАН  ШАХМАЛ ТҮЛШИНД ХОРДСОЖ ҮХСЭЭР БАЙХ УУ

      Хотын утаа арай дэндлээ. Улаанбаатараар дүүрэн хоолой нь хорсож, хий ханиалгасан хүмүүс өглөө бүр утааны зураг олон нийтийн сүлжээнд байршуулж, угаартаж байгаагаа, хордож байгаагаа илэрхийлсээр байна. Идэр ес эхлэхээр галлагаа нэмэгдэж, утааны хэмжээ өнөөдрийнхөөс хэд дахин ихсэх нь тодорхой. Тэр үед хэчнээн нь угаартаж, хэд нь хордсноо мэдэхгүй өвчилж явах бол гэхээс зүрх халширмаар. Сайжруулсан шахмал түлшийг рекламдаж эхлэхдээ дарга нар “Хотыг утаагүй болгоно, хот утаагүй боллоо” хэмээн түлшний уут барьж, зургаа даруулж, маазарч байсан. Тэдний ингэж үхэн хатан рекламдаж байсан сайжруулсан хэмээх хортой түлшийг түлсэн иргэд гэр бүлээрээ хамт амьдардаг муур, нохойтойгоо угаартаж, нас барсаар байна. Энэ намар гэхэд эрүүл саруул сайхан амьдарч байсан 30 настай эмэгтэй гурван хүүхэдтэйгээ угаартаж, нас барсан. Угаартаж нас барсан хүн бүрийн амийг, утаатай байгаа өдөр бүрийн тоогоор шахмал түлшийг баруун, солгойгүй магтаж, үнсэх нь холгүй байсан дарга нар хариуцлага хүлээх хэрэгтэй байна. Хариуцлага гэдгийг зөвхөн албан тушаалаасаа огцрохыг хэлэхгүй.Тэд бидэнд утаагүй ганц шөнийг, олон өдрийг бий болгож өгөх ёстой. Одоогоос найман жилийн өмнө Ерөнхийлөгч асан Х.Баттулга “Хотын утаа энэ чигээрээ байх юм бол 2024 онд  нас барагсдын тоо хэд дахин нэмэгдэнэ” хэмээж байв. Тэр хугацаа нь сар гаруйханы дараа буюу ес эхлэхэд болох нь ээ. Улаанбаатарт эрүүл, аюулгүй, тайван амьдрах амьдралын баталгаа алга. Дарга нарын утаагүй болгоно гэж шахсан шахмал түлш Улаанбаатарыг бүр илүү утаатай, хортой болгосоор байна. Сүүлийн үед утааны талаар, утааг бууруулах талаар ярихадаа өнөөх шахмал түлшээ дурдахаа больж. Мөн л хуучин шигээ зуух, яндан тараах, зөв хэрэглүүлэх тухай ам уралдан ярьж байгаа нь харамсалтай. 

20 МЯНГАН АЙЛД ЦАХИЛГААН ХАЛААГУУР ТАВЬЖ, 80 МЯНГАН ӨРХӨД ЗУУХ ТАРААНА ГЭВ

        УИХ дахь МАН-ын бүлгийн ээлжит хуралдаанаар Нийслэлийн Засаг даргын Нийгмийн бодлого, байгаль орчин, агаар орчны бохирдлын асуудал хариуцсан орлогч дарга О.Номинчимэг утааны талаар мэдээлэл өгөв. Тэрбээр "Нийслэлийн шинэ баг томилогдоод нэг сар болж байна. агаарын бохирдлыг бууруулахад хурдан хугацаанд ямар арга хэмжээ авах талаараа бодлогоо тодорхойлоод явж байна. Нэн тэргүүнд гэр хорооллыг орон сууцжуулх хуулийн төслийг Их хуралд өргөн барьсан. Сэлбэ, Баянхошуу дэд төвийг орон сууцжуулах ажил байгаа. Эхний ээлжинд 20 мянган айлыг орон сууцад оруулах төлөвлөгөө байна. Хоёрдугаар агаарын бохирдол гэр хорооллын болон авто машины утаанаас үүдэлтэй агаарын бохирдол байна. Учир нь насжилт өндөртэй машин их байгаа нь үүнд нөлөөлж буй. Хоёрдугаарт богино хугацаанд авах арга хэмжээ байна. Тавантолгой түлш ХК-ийн хэрэглэгчдэд үйлчлэх төвөөс жил болгон урьдчилан сэргийлэх арга хэмжээ авч байна. Гэр хороололдп 198 мянга орчим өрх байна. 82 мянга нь стандартын бус зуухтай байна. Үүнээс үүдэлтэй угаар, утаа алдалт их байна. Сая энэ асуудлыг нийслэлийн 2023 оны төсвийн тодотгол дээр ярьсан. Улмаар янданг бууруулах арга хэмжээ авна. Нөөц боломж дээрээ тулгуурлан 20 мянган айлыг цахилгаан халаагуур руу шилжүүлнэ. Мөн амьжиргааны түвшин доогуур зуухны асуудалтай 70-80 айл өрхөд мянган нэн яаралтайгаар давхар шаталттай зуух ашиглуулах төсөл хөтөлбөр гаргаад явж байна" гэв.