Засгийн  газар 2023 оныг “Авлигатай тэмцэх жил” болгон зарлаж, Авлигатай тэмцэх таван ажиллагаа буюу "5Ш" ажиллагааг хэрэгжүүлж эхэлсэн. Үүний нэг нь сүр дуулианаас хэтэрдэггүй “Шувуу ажиллагаа” юм.

     “Шувуу ажиллагаа”-ны хүрээнд 92 хүнийг албадан авчирч, хянан шалгаж, хэргийг нь хүлээлгэж, тохирох ял шийтгэлийг нь хүлээлгэнэ гэж байлаа.

   Энэ хүрээнд ХХААХҮ-ийн сайд асан Т.Бадамжунайг эхний “шувуу” болгож тунчиг сүртэй Филиппин Улсын Сэбу хотоос эх оронд нь авчирч, албадан баривчилсан. Т.Бадамжунай Завхан аймагт 2012 оны тавдугаар сард жижиг дунд үйлдвэрийг дэмжих нэрээр ямар ч төсөл сонгон шалгаруулахгүйгээр 500 сая төгрөгийг долоо хоногийн дотор төсвөөс гаргаж, нэр бүхий 108 иргэн, аж ахуйн нэгжийн данс руу шилжүүлсэн. Ингэхдээ эрх мэдэл, албан тушаалаа ашиглаж, ах, дүүгийнхээ халаасны компани руу шургуулсан байж болзошгүй. Мөн нүүрсний хулгай, хөгжлийн банкны гэх хэрэгт ч холбоо хамааралтай гэгддэг.

      Уг хэрэгт шалгагдаж эхэлсэн даруйдаа тэрбээр Дорнод аймгаар  дамжиж, хувийн машинаар хил даван зугтаад таван жил сураггүй болсон байдаг.  Түүний хэргийг улирал дамнан хэлэлцэж, эцэст нь түүнийг цагдан хорихгүйгээр хилийн хориг тавин шалгаж байна. Томоохон хэргүүдэд холбогдоод буй Т.Бадамжунайг хоёр улирал дамнан шалгаж байгаа ч одоо хүртэл ямар нэгэн шийдвэр гараагүй хэвээр байгаа. Үүнийг улс төрийн хүрээнийхэн түүнийг улс төрийн тохиролцоо хийсэн гэх “бор шувуу” нисгээд буй. Т.Бадамжунайн дараа Н.Удаанжаргал, Ч.Сайханбилэг нарыг авчрах ёстой байсан ч тэднийг тойрсоор ээлжит “шувуу”-г авчирлаа.  

     Харин Засгийн газрын ээлжит попролын эзэн Нүүрсний хулгайн хэрэгт шалгагдаж байхдаа БНХАУ руу зүсээ хувилган зугтсан гэх Д.Наранхүү байв.

      Д.Наранхүүг он гарснаас хойш зургаан сар  орчим эрэн хайж, зургадугаар сард БНСУ-д байгааг нь илрүүлсэн байдаг. Харин энэ сарын 26-ны өдөр “Шувуу ажиллагаа”-ны баг Д.Наранхүүг сүр дуулиантайгаар  АТГ-ын мөрдөгчид, Гадаадын иргэн харьяатын холбогдох албан тушаалтнуудаар “сугалуулан” авчирсан юм.

    Х.Нямбаатар сайд түүнийг “Шанхай, Макао, болон БНСУ-аар дамжин орогнож байсан. Мөн Д.Наранхүү пластик мэс заслаар нүүр царайгаа өөрчлөн зүсээ хувилгасан байсан бөгөөд хурууны хээгээр нь Д.Наранхүү мөн болохыг баталгаажуулсан” гэсэн байдаг.  Гэвч түүний зүсээ хувиргалт нь сахлаа ургуулсан төдий л зүйл байв. Инээдэм гэх үү, эмгэнэл гэх үү.  Сүржин эхэлж, даржин өрнөх “Шувуу ажиллагаа”-ны үнэн төрх л энэ л байлаа.  

   Д.Наранхүү нь “Нүүрсний хэрэг”-т холбогдоод буй УИХ-ын гишүүн Ш.Раднаасэд, “Эрдэнэс тавантолгой” ХК-ийн Гүйцэтгэх захирал асан Д.Ариунболд хоёрын гол хамтрагч байсан гэгддэг. Бид өмнө нь Д.Наранхүүгийн 10 компаниар нүүрс зөөж байсан тухай ноцтой баримтуудыг дэлгэж байсан билээ. Дэлгэрэнгүйг дараах холбоосоор уншина уу. https://ergelt.mn/news/22/single/36963

   Он дуусахад гуравхан сарын хугацаа үлдээд буй ч гурван хүн авчирч, ядаж нэгийг нь шийтгэж чадсангүй. Энэ байдлаараа “Шувуу” ажиллагаа дампуурч, үлдсэн 90 хүний хэрэг замхарч, “Авлигатай тэмцэх жил” биш, “Поп жил” болоод дуусах нь тодорхой болчихлоо.  Намрын хүндхэн ажлуудаас эхлээд УИХ-ын ээлжит сонгууль болох ирэх жилд эдгээр нэрс ч мартагдана. Эхлүүлсэн ажлаа дуусгадаг, үр дүнд хүрдэг баймаар  байна.