Саяхан даа, сайд нар “дээлээ давхарлахад” Х.Булгантуяаг Боомт хариуцсан сайдаар томилж, МАН-ынхан үнсэж, үнгээд сүйд болоогүй юү. Тэгвэл МАН дахиад л Х.Булгантуяад чухал алба хариуцуулж, намынхаа эмэгтэйчүүдийг толгойлох эрхийг өчигдөр олголоо.

       Тодруулбал, МАН-ын дэргэдэх НАМЭХ-ны ээлжит хурал болж, эмэгтэйчүүдийн холбооны нэрээ сольж, дүрмээ шинэчлэв. Улмаар даргын сунгаагаа явуулж, МАН мандуулах ээлжит эмэгтэйгээ сонгов. НАМЭХ гэх нэрийг Монголын Социал демократ эмэгтэйчүүдийн холбоо болгон өөрчлөөд Х.Булгантуяа тус байгууллагын тэргүүлэхээр болсон. Үеийн үед МАН уг холбоогоо намынхаа ивээлд багтсан, улс төрд олон жил зүтгүүлэх эмэгтэйгээр удирдуулж, ирсэн уламжлалтай. Тиймдээ ч УИХ-ын гишүүн Боомт хариуцсан сайд Х.Булгантуяа, Соёлын сайд Ч.Номин, УИХ-ын гишүүн Д.Сарангэрэл нарыг өрсөлдүүлэхээр ярьж байсан ч Ч.Номинг нэр дэвшүүлэлгүй авч үлдээд, Х.Булгантуяаг Л.Оюун-Эрдэнэ нэр дэвшүүлж, Д.Сарангэрэл заалнаас нэр дэвшив. Харин Д.Сарангэрэл өөрийн хүсэлтээр нэр дэвшихээс татгалзаж, нэрээ татсанаар Х.Булгантуяа өрсөлдөгчгүй гишүүдийн дэмжлэг авлаа.

        Сангийн дэд сайдын статусаас нэр хүнд, хэргэм зэрэг нь асар хурдан дээшилж байгаа эмэгтэй яах аргагүй Х.Булгантуяа болов. УИХ-ын гишүүнээр томилогдсон даруйдаа намын дэд дарга болж, удалгүй Байнгын хороо удирдаж, саяхан “дээлээ давхарлаад” амжсан. Тэр одоо “гурван давхар дээлтэй” боллоо.

        Монголын Социал демократ эмэгтэйчүүдийн холбоо нь МАН-ын гол бүтэц, эмэгтэйчүүд нь улс төрд шат ахих боломжоо нэмэгдүүлдэг чухал холбоо. Тиймдээ ч уг холбооны тэргүүнд намын гишүүд нь ач холбогдол өгч, фракцууд өөрийн хүнээ томилох гэж чамгүй өрсөлдөөн өрнөдөг. Үндсэндээ хүний фракц хүчтэй байгааг илэрхийлэх МАН нэг шалгуур гэж ойлгож болно.

       Энэ удаагийн эмэгтэйчүүдийн холбоог хэний фракц удирдах вэ гэдэг нь олны анхааралд байв. Өөрөөр хэлбэл, Ерөнхий сайд, Ерөнхийлөгч нарын хоорондын толхилцол үргэлжилж байгаа юу, хэн нь хүчтэй вэ гэдэг маргаан олны дунд байв.  Тиймдээ ч Л.Оюун-Эрдэнэ, Х.Булгантуяаг сойж, Ерөнхийлөгч Д.Сарангэрэлийг дэвшүүлсэн. Харин Д.Сарангэрэл нэрээ татсан нь олны анхаарлын төвд үлдлээ. Ямартай ч, Ерөнхий сайд намын холбоодоо өөрийн мэдэлд авч эхэлсэн нь энэ удаагийн сунгаанаас тодорхой болов. Үндсэндээ уг холбоог тэргүүлэгч нь намаа төлөөлж, Их хуралд нэр дэвших эмэгтэй гишүүдийг эрэмбэлэх, эхний шат дамжлага гэсэн үг. Тус холбоог өнгөрсөн хугацаанд УИХ-ын гишүүн асан Д.Оюунхорол, Ц.Цогзолмаа, Д.Сарангэрэл нар толгойлсон бол энэ удаад Х.Булгантуяа удирдах нь.

       УИХ-ын гишүүн, Боомт хариуцсан сайд Х.Булгантуяа СДЭХ-ны тэргүүнд нэр дэвших мөрийн хөтөлбөрөө танилцуулах үеэр "Эмэгтэйчүүдийн хувьд улс төрд орно гэдэг зүрх зоригтой болохын тулд маш их уддаг юм билээ. Би 2010 онд анх НАМЗХ-ны Удирдах Зөвлөлд орсноос хойш 10 жил болж байж, УИХ-д нэр дэвшиж болох юм байна гэдэг итгэл үнэмшилтэй болж байсан. Маш олон хүмүүс надад итгэж, дэмжиж, чи чадна гэж урам зориг өгдөг байсан. Тиймээс би цаашид эмэгтэйчүүдийнхээ асуудлыг шийдвэрлэхэд шаардлагатай зүйлсийг судалж, мөрийн хөтөлбөртөө дараах зүйлсийг онцолж байна” хэмээн онцолсон байна.

     УИХ-ын гишүүн Х.Булгантуяа наймхан жилийн дотор “Петровис” ХХК-ийн Бизнес хөгжлийн газрын даргаас НАМЗХ-ны дэд тэргүүн, МАН-ын Нарийн бичгийн дарга, Сангийн дэд сайд, УИХ-ын гишүүн, Засгийн газрын сайд болтлоо дэвшиж чадсан товч бөгөөд дардан намтартай нэгэн.

       2020 оны ХОМ-ийг нь харвал, өөрийн орлого нь жилд 29 сая, гэр бүлийн орлого нь 118 сая төгрөг, 410 сая төгрөгөөр үнэлэгдэх нэг орон сууцтай, 75 сая төгрөгөөр үнэлэгдэх хоёр автомашинтай, 629 м2, 697 м2 бүхий 20 сая төгрөгийн хоёр газартай, 33 сая төгрөгийн хадгаламжтай, “Гарден Артс” ХХК-д хувьцаа эзэмшдэг гэж мэдүүлжээ. Харин 2015 онд буюу Сангийн дэд сайд байхдаа гэр бүлийн нийт орлого нь жилд 50 сая төгрөг, 790 сая төгрөгийн гурван орон сууцтай, 46 сая төгрөгийн хадгаламжтай, “Гартен артс” ХХК, “И Пи Си Эм” ХХК, “Си Эс Пи Эм” ХХК, “Тай Ки Тек” ХХК гэсэн дөрвөн компанитай гэж мэдүүлж байжээ. Өөрөөр хэлбэл, улс төрд орсноос нь хойш ХОМ-г нь илт буурсан буюу хоёр орон сууц, гурван компани хасагдсан гэж бүртгүүлсэн байна. Улс төрд хөл тавьсан хүмүүсийн хөрөнгө, орлого үлэмж өсдөг байтал Х.Булгантуяагийнх эсрэгээрээ буурсан гэж мэдүүлсэн нь анхаарал татна. Гэхдээ бодит байдал дээр түүний хөрөнгө орлого буураагүй буюу бизнесийн хамтрагч, гэр бүлийн хүнийх нь бизнес эсрэгээрээ цэцэглэж байгаа гэхэд болно.

Ийн Х.Булгантуяаг МАН-ын мандуулах ээлжит эмэгтэй Х.Булгантуяа болж, дээлээ даахааргүй болтлоо алдар цол нь нэмэгдэж байна даа.