• Өнөөдөр 2022-06-30

АН-ЫН ДАРГЫН СУУДАЛ ЗУЛЫН ГОЛ БОЛОХУЙЦ ҮНЭТЭЙ ГЭЖ ҮҮ

-АН-ЫН ДАРГА НАР МАН-ЫНХАНТАЙ ЗУЗААРЧ, ХЭРЭГ НАЙМААЛЦДАГ ГЭВ ҮҮ-

         Ардчилсан намын улс төр тийм үнэ цэнтэй гэж үү. Дандаа МАН-ын талд ажилладаг байсан Ардчилсан намын үе үеийн дарга нар нь гишүүд, сонгогчдынхоо гэдсийг цэвэрлэж, зулын гол болох хүртэл нь талцуулчихаад МАН-ын араар нуугдаж, эрх ашгийг нь гүйцэлдүүлэхэд ханцуй шамлан зүтгэдэг нь нууц биш. 

        Тэд намынхаа асуудлыг шийдэж чадахгүй, “Шийдье” гэх сэтгэлгүй 30 жил болжээ. Уг нь намын сөрөг хүчний үүргээ биелүүлж, МАН-ынхантай эрх ашгийн халаас нэгдээгүй байсан бол парламентад ижил тэнцүү суудалтайгаар “Ардчилсан нам” жинхэнэ ноёрхох байсан байлгүй. Харин одоо “Ардчилсан нам” хэмээх нэр ард түмний чихэнд хоосон сонсогдож, хэсэг хүмүүс намынхаа туг, далбаа, тамга тэмдгийг хэрүүл төдийхнөөр ашиглахаас өөрөөр гавихгүй юм. Ардчилсан намд элэгтэй, олон жил “Юм хийнэ дээ” гэж итгэж хүлээсэн иргэдийнх нь урам хугарч “Ардчилсан намын асуудал яасан дуусдаггүй юм бэ. Сонгосон даргаа ч УДШ-д бүртгүүлчихэж чадахгүй, арай л арчаагүй юм” хэмээн бухимдахад хүргэлээ. Тэдэнд хандаж хэлэхэд, Монголд Ардчилсан нам гэж байхгүй. Ардчилсан нам гэдэг зүгээр л МАН-ынхны хэрэгтэй үедээ гаргаж ирдэг, монголчуудын олон жил сонссон танил нэршил болж хувирчээ  гэхэд буруудах юм алга. Тэдний Ардчилсан намын дотоод асуудал гэх хэрүүлээс өөр юу хийж байгааг нь мэдэх битгий хэл таах арга алга. Үнэхээр Ардчилсан намаас хүлээх юу ч үгүй болсон шинжтэй. Дарга нар нь хүртэл урвагч, амиа хичээгч, худалч хүмүүс гэдгийг өнгөрсөн болон өнөө цагт даргалах гэж буй дарга нарынх нь үүх түүх, үйлдэл бүхэн  гэрчилнэ биз.

-МОНГОЛЧУУД МАН-ААС ӨӨР НАМ БАЙХГҮЙ ГЭДГИЙГ ОЙЛГОХ ЦАГ НЬ БОЛСОН-

             Тодруулбал, АН-ын даргаар бүртгүүлчих гээд хэдэн сар дуншиж байгаа Х.Баттулга МАН-ын дарга Л.Оюун-Эрдэнийн зөвлөхөөр ажиллаж байсан. Тийм учраас эрх ашиг нэгтэй болсон гэдэг нь тодорхой гэдгийг ард түмэн андахгүй. Түүнийг Ерөнхий сайдын зөвлөхөөр хэдхэн сар ажиллахдаа авлига, албан тушаалын хэргээ наймаалцаж, хэд хэдийг нь нам дараад авсан гэж ярьдаг. Мөн Ардчилсан Ерөнхийлөгч, АН-ын гишүүн асан Х.Баттулгыг “АН-ын даргад өрсөлдөнө” хэмээн орон нутгаар явахад нь “МАН-ын хамгаалалтаас гарч, АН-ын дарга болдог л юм бол шалгуулна, шалгана” гэх мэдээллүүд ар араас нь гарсаар байна. Харин тэр АН-ын дарга болоод МАН-ын хамгаалалтад бүр гүнзгий орно шүү дээ.  Тэрбээр Ардчилсан намын даргаар сонгогдохдоо 96 хувийн саналтай гарч ирсэн. Даанч  АН-ын даргаар ажиллах хугацаандаа дахиад л урвагчийн ажлаа хийж, сонгогч гишүүдээ хуурч, итгэлийг нь алдсаар л дараагийн даргат хүлээлгэж өгөх байлгүй. Түүнээс биш Ардчилсан намын нам шиг болгох тал дээр анхаарах нь юу л бол. Харин ч МАН-ынхны гарыг яаж бугуйг болгож ахиулах вэ гэдэгт санаархаж, нөгөөдүүл нь хоргоож байгаа биз.

            Мөн АН-ын даргын суудлаа “Өгнө, өгөхгүй” дээрээ тулаад буй С.Эрдэнэ ЭМДЕГ, ХНХЯ-нд ажиллаж байсан үедээ хийж байсан улс төрийн булхай, луйвраа АН-ын даргаар ажиллаж байхдаа сэмээрхэн даруулаад амжсан. Уг нь гол зорилго нь бүтсэн л баймаар юм. Яагаад ахин дахин тамга, тэмдгийг хэрүүл хийж, хорогдоод байгаа юм бол. Бас л дутуу зүйл, ярьсан, санасан, бодсон юм үлдэж дээ. 

          Ардчилсан намынхан өнөөдрийг хүртэл ийм хуурамч улс төр хийж, “Тэмцэлдэнэ” гэдэг үгээ мартаагүй хэсэг хүмүүсийг бужигнуулдаг хэвээрээ. Тодруулбал,  АН-ын УТЗ-ийн гишүүн Д.Түвдэндорж өгчидөр мэдээлэл хийх үеэрээ “Манай намын гишүүд яагаад бухимдалтай байна вэ гэхээр, бид хоёр жил доромжлууллаа. УДШ хоёр талд шийдвэр гаргаж, бидний дунд яс хаядаг. Хорхой биед нь хүрэхээр атирдаг шиг манай намын гишүүд бухимдлаа илэрхийлж, УДШ-д реакц үзүүлж байгаа юм. Түүнээс биш УДШ-ийг дарамталж, хөндлөнгөөс оролцох гэсэн санаа байхгүй. Манай намын гишүүдийн зарим нь гэдэс, гүзээгээ угаалгаад эхэлчихсэн байна лээ. Тэд цаашдын болзошгүй арга хэмжээнд бэлдэж байгаа биз. Зулын гол болно гэж хэлэхэд хаашаа юм.Гэхдээ ширүүн тэмцэлд орох бэлэн байгаа. Тийм учраас эрх баригчдийн гар хөл болж, шүүх байгууллагынхаа нэр хүндийг унагааж, өөрсдийн бие бүрэлдэхүүнийг огцрох хүртэл арга хэмжээнд орохгүй байхын тулд шударга хуулиа дагаж, АН-ын дүрмийн дагуу бүх гишүүдийн саналаар сонгосон Х.Баттулгыг АН-ын даргаар бүртгэх ёстой. Нэг намын асуудлыг шийдэж чадахгүй байсаар нийгмийн бухимдлыг хүргэж, тэмцэл будилаан руу түлхэхгүй байхыг шүүх, засаглалын байгууллагаас хүсч байна” хэмээсэн юм. 

   Харамсалтай нь Улсын дээд шүүхэд Х.Баттулгыг бүртгүүлчих гээд "үхтэлээ" зүтгэж байгаа гишүүд, сонгогчид хохироод л үлдэнэ дээ. АН-ын дарга нар иргэдээ хуур, “Ардчилал, Ардчилсан нам” хэмээн цээжийг нь дэлдүүлж, цөсийг нь хөөргөчихөөд бүхэл бүтэн намаа МАН-ын сонгуулийн нэг штаб болгож ашигладаг. Бид ийм хуурамч улс төрийг орхих цаг нь болжээ. 

 

АН-ЫН ДАРГЫН СУУДАЛ ЗУЛЫН ГОЛ БОЛОХУЙЦ ҮНЭТЭЙ ГЭЖ ҮҮ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188