Төрийн соёрхолт яруу найрагч Р.Чойном, төр, нийгмийн нэрт зүтгэлтэн, цогт эх оронч, яруу найрагч О.Дашбалбар, Монголын зохиолчдын эвлэлийн шагналт яруу найрагч, сэтгүүлч Л.Ганзул  нар эл өдөр мэндэлжээ.

       Р.Чойном 1936 оны энэ өдөр Хэнтий аймгийн Дархан сум, О.Дашбалбар 1957 онд Сүхбаатар аймгийн Наран сум, Л.Ганзул 1976 онд Булган аймгийн Баян-Агт суманд төрсөн юм. Монголын үе үеийн яруу найрагчдад үлгэрлэж, өөрсдийн зохиол бүтээлээрээ шинэ үеийн мэдлэг, боловсролтой уншигчдыг "төрүүлж" байсан гурван яруу найрагч нэгэн өдөр мэндэлсэн нь ихэд содон тохиол. Энэ тохиол бүрэлдсэн өдрийг яруу найрагч төрдөг өдөр хэмээн нэрлэж ч болох юм.

      Төрийн соёрхолт яруу найрагч Р.Чойномд анх эцэг нь Чойномусурияа хэмээх нэр хайрлаж, цагийн эрхэнд нэрээ товчлон Чойном гэж бичсээр уг нэрээрээ алдаршсан түүхтэй. Р.Чойном хүнд хэцүү цаг үеийг өөрийн үгээр сөрж, ард олны өмнөөс нийгмийн хар бараантай үзгээрээ тулалдаж явсан билээ. Тэрээр амьд ахуйдаа "Гал морин цаг", "Залуу нас", "Сүмтэй бударын чулуу", "Тал", "Улаан дэвтэр", "Хүн" зэрэг бүтээл туурвиж, 1979 оны дөрөвдүгээр сарын 24-нд 43 насандаа таалал төгссөн. Хожим 1990 онд нэрт яруу найрагч Р.Чойномд Монгол Улсын Төрийн шагналыг нэхэн олгосон юм.

       Харин нэрт яруу найрагч О.Дашбалбар дунд сургуульд байхаасаа л шүлэг сонирхож, бичих болсноор өөрийн яруу найраг, утга зохиолын гэгээн замд орсон гэдэг. Тэрээр хойд хөршийн Омскийн хөдөө аж ахуйн ТМС, Горькийн нэрэмжит утга зохиолын дээд сургууль төгсөж, МЗЭ-ийн гадаад харилцааны мэргэжилтэн, “Утга зохиол урлаг” сонины сэтгүүлч, 1990 оноос МҮЧЗЭ-ийг байгуулж, тэргүүлэгчээр нь ажиллаж байв. Түүний “Гол ус намуухан урсана”, “Газрын төлөөх тулалдаан эхэллээ”, “Оюуны санааны яруу найраг” зэрэг номыг нь Англи, Монголын уран зохиол судлаач, орчуулагч Саймон Вэккхам Смит англи хэлнээ орчуулан хэвлүүлсэн байна. Нэрт яруу найрагч О.Дашбалбар 1999 онд зуурдаар нас барсан юм.

      Яруу найрагч Л.Ганзул агсан “Нэгэн цагийн галбир”, “Сэтгэл бүрдийн тойром”, “Улирлын гүн” зэрэг яруу найргийн ном хэвлүүлж, МЗЭ-ийн болон Г.Сэр-Одын нэрэмжит шагналыг хүртсэн юм. Мөн тэрээр “Жиндээх салхигүй хорвоо”, “Марал буусан шөнө”, “Төгөлдөр гоо”, “Хайр” тэргүүт сонсогчдын дунд нэр хүндтэй олон дууны шүлгийг бичиж, уншигч, сонсогчдодоо уянга төгөлдөр яруу найрагч хэмээн алдаршсан билээ. Тэрээр 2018 онд зуурдаар амиа алдсан юм.