• Өнөөдөр 2024-03-29

Харанхуйгаас гэрлийг олж харахуй буюу “Шуудан хороо”-г тэмдэглэх нь

2021-07-03,   971

Хэнк шартаж сэрснийхээ өглөө эртлэн босож, ажлын зүг одно. Архинд дуртай, залхуу байвч ажил хийх ёстой гэдгээ мэддэг учир бусдаас илүү идэвхтэй нэгэн аж. Тэр амьдралын зовлон зүдгүүр, хар бараантай тэмцэхийн оронд түүнтэйгээ эвлэрч чадсан хамгийн шилдэг “Абсурд дүр” ч байж мэднэ. Өөрийн абсурд болоод амьдралын утга учиргүйд  эвлэрсэн нь Хэнри Чинаскиг гэгээрэлд хөтлөх бөгөөд зохиолын үндсэн утга нь гэгээрсэн нэгний төгсгөлгүй абсурд өгүүллүүдээр төгсөх юм.

АНУ-ын зохиолч Чарльз Буковскийн анхны роман “Шуудан хороо”-г орчуулагч Н.Ганбат орчуулж, “Болорсудар” хэвлэлийн газраас эрхлэн өнгөрсөн жил гаргасан билээ. Уншигчдын зүгээс уг романы зохиолч Буковскид “Бохир реалист” гэх нэр ч  өгөөд амжсан.

Романы ерөнхий үйл явдал шуудангийн газар ажилладаг Хэнри Чинаскийн талаар өрнөнө. Архидсан, бэлгийн хавьталд орсон, бөөлжсөн, залхуурсан, үхэхийг хүссэн тухайгаа бичжээ гэх мэт олон шүүмжлэл уг зохиолыг дагадаг. Зарим нь зохиолчийн хувийн амьдралтай холбож, туулсан хар бараанаа бичсэнээс хэтрэхгүй гэж тайлбарлах нь бий.
 

Түүнээс гэрэл гэгээг олж харсан уншигч харьцангуй цөөн болов уу. Зохиолын гол дүр Хэнк бол агуу философич гэдгийг дурдах нь зүй. Гэхдээ энэ тухай зохиол дээр хөндөөгүй бөгөөд Хэнкийн ердийн, архичин амьдралыг өгүүлнэ. Гэвч архи уух, ажлаа цалгардуулах үйлдлүүдийнхээ зэрэгцээ өөртэйгөө ярьж, философидож чаддагийг нь магтууштай. Өөртэйгөө маргаж, өөртөө ялагдах зэргээр түүний философилог шинжүүд илэрдэг.

Тэрбээр нэгэн удаа ажлынхантайгаа хүссэн зүйл, хүсэл биелбэл авах зүйлсийн тухай ярихдаа “Би тийм бага гарын хулгайч биш. Авбал энэ хорвоог тэр  чигт нь авна, үгүй бол юу ч хэрэггүй” хэмээн хэлсэн нь магад түүнийг өөрийгөө энгийн нэгэн архичин гэж бодох бодлоос аварч байна.

Хүн төрөлхтөн хэзээ ч хүссэн зүйлээ авч чадахгүй. Хүссэн зүйлийнх нь мөн чанар угаас оршдоггүйг сайн мэднэ. Гэвч энэ талаар ямар нэгэн бодол үгүй, бодох ч хүсэлгүй бөгөөд түүнд зөвхөн өнөө шөнийг аргацаах шил архи, хүүхэн хоёр л хэрэгтэй. Түүнд бусдын адил ирээдүйгээ төлөвлөх, хэрэггүй зүйлд санаа зовох шаардлага үгүй. Нэг талаараа тэр гэгээрчээ.


Харанхуйгаас гэрлийг олж харахуй буюу “Шуудан хороо”-г тэмдэглэх нь
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188