Энэ удаагийн “Оюунт Монгол” буланд маань Монголын гранж, альтернатив рок хөгжмийн урсгалын анхдагчдын нэг болох “Нисванис” хамтлагийн гитарчин С.Хосбаяр оролцлоо.

Монгол Улсын Соёлын тэргүүний ажилтан, Coke’n Beat хөгжмийн наадмын шилдэг гитарчны шагналт тэрбээр өдгөө уран бүтээлээ туурвихын зэрэгцээ “Degi’s music school” амьд хөгжмийн сургуульд гитар хөгжмийн багшаар ажиллаж буй. Энэ удаад С.Хосбаяр өөрийг нь амьд хөгжимд уруу татаж, энэ төрөл рүү салж, хагацахгүй болтол нь “шингээсэн” 10 бүтээлчийг нэрлэсэн юм.

PINK FLOYD

          Өөрсдийн тоглодог хөгжмийн урсгалдаа төдийгүй орчин үеийн урлагт маш том нөлөө үзүүлсэн хамтлаг гэж боддог. Өвөрмөц хөгжмийн найруулга нь гүн ухаанлаг дууны үг, огторгуйн, ид шидийн гэмээр дуугаралттайгаа нийлээд өөрсдийн давтагдахгүй хэв маягаа бүтээж чадсан юм. “The Dark Side Of The Moon” сэдэвт цомог, “Echoes” 23 минут үргэлжлэх бүтээл, “The Wall” хөгжимт кино зэргийг нь та бүхэнд санал болгож байна.

DAVID GILMOUR

          “Pink Floyd” хамтлагийг түүний гитарын тоглолтоос салгаж төсөөлөшгүй. Bluesy аялгуулаг, хүчтэй сэтгэл хөдлөл гаргасан гитарын соло нь түүнийх гэж амархан танигдахаар байдаг. “Comfortably numb”, “Time”, “Shine on you crazy diamond” зэрэг дууны соло нь их алдартай.

QUEEN

          Британийн алдарт рок хамтлаг. Миний хувьд мэдээ орсон цагаасаа л дуунуудыг нь дагаад аялдаг байсан. Freddie Mercury-н хүчтэй хоолой, Brain May-н цэмцгэр гитарийн тоглолт мөн хамтлагийн гишүүд бүгдээрээ хоолой салгаж дуулах зэрэг нь хамтлагийн өнгө төрхийг тодорхойлж өгдөг. “Bohemian Rhapsody” гэж хамтлагийн түүх болон Mercury-н тухай их гоё кино өнгөрсөн 2018 онд гарсан.

JIMI HENDRIX

          Амеркийн алдарт хөгжимчдийн нэг. Түүнийг дэлхий нийтээрээ бүх цаг үеийн шилдэг гитарчин гэдэгтэй ерөнхийдөө санал нэгддэг. Hendrix нь өөрийн цаг үеийн болон өөрийн цагаасаа хойших бүх гитарчдад нөлөөлж чадсан ховор хөгжимчдийн нэг юм. Гитар сайн тоглож суръя гэж бодвол Hendrix-ийг тойрох аргагүй. Түүний дууг нь сонсож, дагаж тоглож, суралцах хэрэгтэй.

THE BEATLES

          Ливерпүүлийн алдарт дөрвийг мэдэхгүй хүн ховор. Хэрэв John, Paul, George, Ringo нар нийлж хамтлаг байгуулаагүй бол рок хөгжмийн түүх хүмүүсийн мэддэгээс арай өөрөөр явах байсан болов уу. Дуунууд нь сонсох бүр илүү гоё, сайхан болдог хамтлаг. Олон хүнийг хөгжим рүү “хальтарч”, ороход хүргэсэн агуу уран бүтээлчид.

THREE KINGS OF THE BLUES GUITAR

          Blues гитарын хаад хочтой нэг цаг үеийн алдарт B.B. King, Albert King, Freddie Kink гурвыг дагаж, гитар тоглож суралцсан нь надад blues хөгжмийг ойлгох, гитарын чадвараа ахиулахад маш их тус болсон. “Thrill is gone”, “3 o’clock in the morning”, “Born under bad sign”, “as the years go passing by”, “have you ever loved a woman” дуунууд нь сонсоход амралт болдог.

MARTIN ZENKER (Jazz bassist)

          Мартин багшийн 2014-2016 онд жазз хөгжмийн хичээлд суусан нь миний хөгжмийн амьдралд нүд нээсэн үйл явдал байлаа. Жазз гэж урлагийг Мартин багшаар дамжуулж олон хүн сонсож, мэдэрч, суралцаж байгаа юм шүү.

Б.ГАНБАТ (УГЗ, удирдаач, гитарчин)

          Монголын анхны гитарчдын нэг Ганбаа багшаар анх 2004 онд гитар зөв тоглох, хөгжмийн онолын хичээл заалгаж байсан нь хөгжимчин болох суурь болсон. “Цэнхэр залаа”, “Сансрын хөлөг”, “Охидын бүжиг”, “Долоон бурхан” зэрэг гитарын гоцлол зохиолуудтай нь анх танилцаж байсан сан.

ROBBEN FORD

          Robben Ford америкын modern blues, жазз гитарчин, уран бүтээлч. Сүүлийн хоёр жил Robben-ийг сонсож, хэв маягаас нь  суралцаж тоглож үзэж байна. Мэргэжлийн түвшний хувьд Robben Ford мундаг.

АТКА (Гитарчин)

          Монголын хамгийн мундаг гитарчдын нэг. Миний мэдэх жинхэнэ сешион хөгжимчин. Атка ахтай хамт хэдэн тоглолтод оролцож, бэлтгэл хийсэн нь их туршлага болж үлдсэн юм.