Шведийн байгаль орчны тэмцэгч Грета Тунберг өөрийн твиттер хуудсандаа тариаланчдын жагсаалыг дэмжиж жиргэсний дараа сөрөг жагсагчид түүний зургийг шатааж эсэргүүцлээ илэрхийлжээ.

Дуучин Рианна болон Грета Тунберг нар өөрийн цахим хуудсандаа тариаланчдыг дэмжиж буйгаа илэрхийлсэн бөгөөд энэ үйлдэлд Засгийн газар дургүйцлээ илэрхийлж, энэтхэгчүүд эсэргүүцэн жагсжээ. Тэд Грета болон дуучин Рианнагийн зургийг, мөн “Олон улсын оролцоог тэвчихгүй” хэмээн лоозон барьж жагссан байна.  

“Бид Энэтхэгийн тариаланчидтай эв санааны нэгдэлтэй байна” хэмээн Грета жиргэсэн. Үүний дараа Энэтхэгийн эрх баригч Бхаратия Жаната намыг удирдагчид “Энэ бол Энэтхэг рүү халдаж буй олон улсын халдлага” гэжээ. Мөн энэ хэргийг шүүхэд шилжүүлж, цагдаа нар шалгаж байна гэв.

Пүрэв гарагт мөрдөн байцаах мэдээг сонсоод Грета “ Би одоо ч тариаланчдын талд зогсож, тэдний тайван жагсаалыг дэмжиж байна” хэмээн ахин жиргэжээ.

Арваннэгдүгээр сараас хойш Хөдөө аж ахуйн шинэ журмыг эсэргүүцсэн олон мянган тариаланчид Дели хотын ойролцоо жагсаж эсэргүүцлээ илэрхийлээд байгаа юм.

Өнгөрсөн долоо хоногт жагсаал хүчирхийллийн шинжтэй болж, Дели хотоос гарах замыг хааж, интернет холбоог нь таслаад байгаа аж.