Европын хамгийн хуучин, ховор мотоциклийн цуглуулга бүхий “Ромбо Пасс” музейд өнгөрсөн шөнө гал гарсан байна. Тодруулбал, орон нутгийн цагаар үүрийн 04:40 цаг орчимд галын дохио дуугарч, гал сөнөөгчид Австри, Итали хоёрын хил дээр байрлах Альпийн нурууны Тиммельжоч даваанд байрлах тус музейд очсон боловч музей хэдий нь галд автсан байжээ. Музейд гарсан галын үеэр хүний амь нас хохирч, бэртэж, гэмтээгүй ч музейд хадгалагдаж байсан бүх ховор, содон мотоциклийн цуглуулга шатсан байна.

        Ихэвчлэн “Sunbeam”, “Brough Superior”, “Zundapp” зэрэг 230 гаруй ховор, үнэтэй мотоциклийн цуглуулгатай уг музейг ихэр ах дүү Албан Шайбер, Аттила Шайбер нар 2016 онд байгуулсан юм. Одоогоор гал гарах болсон шалтгаан тодорхойгүй байгаа бөгөөд цагдаагийн байгууллагаас үргэлжлүүлэн шалгаж байна.