Өмнөд Солонгосын Ерөнхийлөгч асан Пак Гын Хэгийн давж заалдах шүүх хурал өнгөрсөн шөнө болж, түүний 30 жилийн хорих ялаас зургаан жилийг хассан байна. Мөн түүнд оноосон 20 тэрбум вонын торгуулиас хоёр  тэрбум воныг хасаж, 18 тэрбум вонын торгууль оноожээ.

Солонгосын анхны эмэгтэй ерөнхийлөгч Пакыг тус улсын дээд шүүхээс “Эрх мэдлээ хэтрүүлэн ашигласан, авлигал болон албадлагын гэмт хэрэгт буруутай” хэмээн үзэж, 2017 онд Ерөнхийлөгчийн суудлаас огцруулж, 30 жилийн хорих ял, 20 тэрбум вонын торгууль оноосон юм.

Ерөнхийлөгч асан Пак Гын Хэгийн хорих ялаас зургаан жилийн хугацааг хассанд тус улсын прокурорууд дургүйцлээ илэрхийлж, дахин давж заалдах шүүхэд хүсэлт гаргажээ.