Хөвсгөл аймгийн төвөөс баруун хойд зүгт 200 километрт Ханх сумын баруун урд зүгт 30 километрийн зайд нэгдүгээр сарын 12-ны өглөө хэд хэдэн удаа газар хөдөлсөн билээ. ОБЕГ-ын өгсөн мэдээллээр чичирхийлэл одоо ч Ханх суманд мэдэгдсээр байгаа аж. Газар хөдлөлтийн улмаас Ханх суманд газар хагарч, байшин барилгын хана цуурч, дэлгүүрийн лангууны бараа нурсан байна. Хүний амь нас эрсдээгүй бөгөөд цочролд орсон иргэдэд эмнэлгийн тусламж үзүүлжээ.

Тэгвэл 11 жилийн өмнө яг энэ өдөр буюу 2010 оны нэгдүгээр сарын 12-нд Гайти Улсад рихтерийн шаталбараар долоон баллын газар хөдөлсний төв нь нийслэл Порт-о-Пренст байснаас гурван сая хүн орох оронгүй хоцорч, эмнэлэг, орон сууцны мянга мянган барилга нурж сүйдсэн байна. Газар хөдлөлтийн улмаас 160-230 мянган хүн амь алдсан байна. Шоронгоос оргосон гэмт хэрэгтнүүд хотоор дүүрч энд тэндгүй хулгай дээрэм, тонуул газар авсан. Газар хөдлөлтийн нийт хохирлыг 5.6 тэрбум ам.доллар гэж тооцжээ. Гаднын олон орон Гайтид тусалсан ч орон гэргүй болсон 80 мянга гаруй хүн 2016 он хүртэл дүрвэгсдийн лагерьт амьдарсан гэдэг.