АНУ-ын Калифорни мужийн Сан Диего хотын амьтны хүрээлэнгийн хоёр гориллоос коронавирусийн халдвар илэрсэн талаар тус мужийн захирагч Гэвин Ньюсом мэдээллээ. Тодруулбал, өнгөрсөн лхагва гарагт хүрээлэнгийн горилл ханиалгаж эхлэхэд түүний ялгадсаас шинжилгээ авчээ. Коронавирусийн шинжилгээг Үндэсний мал эмнэлгийн лаборатори авч, хариуг баталсан байна. Амьтны хүрээлэнгийн захирал Лиса Питерсоны мэдээлснээр “Амьтны хүрээлэнгийн нэг ажилтнаас коронавирус илэрсэн. Тухайн ажилтан гориллуудад халдвар тараасан байна” хэмээсэн юм.

       Одоогийн байдлаар “Ковид-19” вирус нь таван төрлийн амьтанд илрээд буй бөгөөд мичний төрлийн амьтад уг вирусээр өвчлөх тохиолдол их байгааг судалгаагаар тогтоожээ. Өмнө нь арслан, бар, нохой, муур зэрэг амьтдад илэрсэн юм.