Пакистаны Пешовар хотын эмнэлэгт хүчилтөрөгчийн дутагдал үүссэнээр зургаан иргэн нас баржээ. Тодруулбал амиа алдсан зургаан иргэний тав нь коронавирусийн өвчтөнүүд байсан тухай хэвлэл мэдээллийн байгууллагууд онцолж байна. Эрх баригчид өнгөрсөн амралтын өдөр хэвлэл мэдээллийн хурал зарлаж “Пешовар эмнэлгийн агааржуулалтын төхөөрөмж ажиллагаагүй болсноор ийм үр дүнд хүрлээ” хэмээн мэдээлсэн билээ.

       Уг хурлын үеэр мужийн эрүүл мэндийн сайд Таймур Салейм Жагра “Хэрэв эмнэлэгт хүчилтөрөгчийн нэмэлт хангамжтай байсан бол энэ харамсалтай хэрэг гарахгүй байх байлаа” хэмээсэн юм. Харин эмнэлгийн зүгээс тоног, төхөөрөмж ханган нийлүүлдэг компанийнх нь буруутай үйлдэл хэмээн үзэж, тус компанийн хариуцлагагүй үйл ажиллагаанд нь зохих ёстой хариуцлага тооцохыг хүслээ.

       Пакистан Улс орон даяараа коронавирусийн хоёр дахь давлагаатай нүүр тулж буй бөгөөд энэ хэцүү цагт ийм хэрэг гарсан нь олон нийтийн шүүмжлэлийг дагуулаад байна. Тус улсад одоогоор албан ёсны батлагдсан тохиолдол 400 мянга, нас барсан тохиолдол 8000 бүртгэгдээд байгаа юм.