Төрийн айлчлал нэр дор БНХАУ-ын дарга Ши Жиньпин, ОХУ-ын Ерөнхийлөгч Владимир Путин хоёрт уулзаж, аль аль талдаа хэцүүдсэн улсаа эдийн засаг, геополитикийн гацаанаас гаргах тохироо хийж байна. Зүүн Европт ОХУ Украин руу цэргээ оруулснаас хойш эдийн засаг нь бараг агших үзүүлэлттэй гарч байгаа БНХАУ-ын дарга Ши “найз”-аасаа дайны зогсоохыг “гуйх” гэж байгаа бол, Олон улсын эрүүгийн шүүхэд гэм буруутай нь тогтоогдож, дайны гэмт хэрэгтэн болсон ОХУ-ын Ерөнхийлөгч Владимир Путинд БНХАУ-ын тусламж хэрэгтэй байгаа аж.

-УКРАИНЫ ХЯМРАЛЫГ ШИЙДВЭРЛЭХ 12 ЗҮЙЛ БОЛОН ОХУ, БНХАУ-ЫН ЭДИЙН ЗАСГИЙН БОЛОМЖ, ГАРГАЛГАА-

                   БНХАУ-ын дарга Ши Жиньпиний Москвад хийх төрийн айлчлал өчигдөр албан ёсоор эхэлсэн. Айлчлалынхаа хүрээнд БНХАУ-ын дарга, ОХУ-ын Ерөнхийлөгчтэй уулзаж, “Украины хямралыг шийдвэрлэх 12 зүйл” нэртэй төлөвлөгөө хэлэлцсэн байна. Кремлийн ордонд дөрвөн цаг орчим үргэлжилсэн хоёр орны тэргүүний уулзалтаар өөр хэд хэдэн асуудал яригдсан нь ОХУ, БНХАУ-ын худалдаа, эдийн засагтай холбоотой байв. Тухайлбал,

• ОХУ-д үйл ажиллагаа эрхлэхээ больсон барууны аж ахуйн нэгжүүдийг БНХАУ-ын бизнес эрхлэгчдээр солих,
• ОХУ, БНХАУ хиймэл оюун ухаанаар дэлхийн тэргүүлэгч гүрэн болж чадна,
• Умард тэнгисийн замын төсөлд хоёр талаас Ажлын хэсэг гаргана,
• ОХУ Ази, Латин Америкийн орнуудын худалдаанд юань ашиглахыг дэмжинэ,
• БНХАУ, ОХУ-ууд спортын хамтын ажиллагаагаа нэмэгдүүлнэ,
• БНХАУ, ОХУ-ын хөдөө аж ахуйн салбарын худалдаа эргэлт 7.0 тэрбум ам.долларт хүрсэн талаар ярилцжээ.

​

Төрийн айлчлалын хүрээнд ОХУ, БНХАУ-ын тэргүүнээс гадна хоёр талын өргөтгөсөн бүрэлдэхүүнтэй яриа хэлэлцээ хийсэн бөгөөд ОХУ-ын талаас Шадар сайдууд, эдийн засгийн байгууллага, “Росатом”, “Роснефть” зэрэг компанийн удирдлага хамт оролцож, гарц, боломжуудын талаар хэлэлцсэн гэв.

-ТАЛУУД НЭГНЭЭ ДЭМЖИЖ АЖИЛЛАХАД БЭЛЭН ГЭВ-

                   Хоёр орны тэргүүлэгчийн уулзалтад БНХАУ-ын дарга Ши Жиньпин “Эрхэм ноён таны урилгаар төрийн айлчлал хийж байгаадаа баяртай байна. Одоогоос 10 жилийн өмнө БНХАУ-ын даргаар сонгогдсоныхоо дараа анхны айлчлалаа ОХУ-д хийж байснаа санаж байна. 10 жилийн турш бид маш нягт харилцаа тогтоож ажилласан. Хятад, Оросын харилцааны өнөөгийн хөгжил түүхэн гүн гүнзгий логиктой юм. Хоёр том хөрш орон, стратегийн иж бүрэн түншийн хувьд манай хоёр орон дипломат харилцаа, гадаад бодлогодоо нэг нэгнээ  чухал байранд тавьдаг. БНХАУ бие даасан дипломат бодлого баримталдаг. Хоёр орны харилцааг бэхжүүлэх бол Хятад улс өөрийн орныхоо язгуур ашиг сонирхол, дэлхийн хөгжлийн ерөнхий чиг хандлагад тулгуурлан гаргасан стратегийн шийдвэр, сонголт юм" гэжээ.

                   Харин ОХУ-ын Ерөнхийлөгч Владимир Путин “Эрхэм ноён Ши Жиньпин та тавтай морил. Таныг БНХАУ-ын даргаар улиран сонгогдсонд дахин баяр хүргэе. Өнгөрсөн 10 жилд БНХАУ нийгмийн олон салбараа эрчтэй хөгжүүлж, дэлхийг гайхшруулсан амжилт оллоо. Энэ нь Ши Жиньпин даргын удирдлагатай салшгүй холбоотой бөгөөд БНХАУ-ын тогтолцоо, засаглалын системийн давуу талыг нотолж байна. Хоёр талын хамтын хичээл зүтгэлээр сүүлийн жилүүдэд олон салбарын харилцаа, хамтын ажиллагаа баялаг амжилт олсон. БНХАУ-тай ажил хэрэгч хамтран ажиллаж, олон улсын үйл хэрэгт идэвхтэй байр сууринаас оролцож, дэлхийн олон туйлт хөгжил, олон улсын харилцааны ардчиллыг нэмэгдүүлэхийн төлөө ажиллахад ОХУ-ын тал бэлэн" гэв.

-ТУСЛАМЖ ЭРСЭН ШИ, ГЭМТ ХЭРЭГТЭН ПУТИН-

ОХУ, БНХАУ-ын тэргүүний уулзалт үнэхээр хачирхалтай болж байгааг шинжээчид хэлж байна. Ши дарга сав л хийвэл гарыг барьж инээгээд л, Путин өөрийн биеэр замчилж, автомашинд нь хүртэл суулгаж өгч байгаа сурагтай. Хоёр орны нөхцөл байдал хэцүүдэж, нэгнээсээ “аврал гуйж” байгаа хоёр ийн нэгэнтэйгээ харьцаж байгаа юм байна.

                   Олон улсын эрүүгийн шүүх ОХУ, Украины дайны асуудлаар хэлэлцсэн. 380-аад өдрийн өмнө Зүүн Европт эхэлсэн тус дайны талаар олон улсаас нотлох баримт, мэдээлэл хүргүүлсний дүнд Олон улсын эрүүгийн шүүх ОХУ-ын Ерөнхийлөгч Владимир Путиныг дайны гэмт хэрэгтэнд тооцож, баривчлах шийдвэр гаргасан. БНХАУ-ын даргын төрийн айлчлал эхлэхээс өмнө ч ОХУ-ын Ерөнхийлөгч Владимир Путин өөрийг нь баривчлах шийдвэртэй зэрэгцэн Украинд айлчлаад ирсэн. Тэгвэл Кремльд БНХАУ-ын дарга Ши Жиньпинтэй уулзаад түүний Украины дайныг зогсоох төлөвлөгөөг авч хэлэлцэнэ гэдгээ Путин мэдэгджээ. ОХУ, Украины дайнтай холбоотойгоор хоёр орон эдийн засаг, гадаад харилцааны тал дээр их хэмжээний хохирол амссан. Монголоос бусдад нь хилээ хаалттай байлгаж буй БНХАУ-ын гадаад худалдаа ч дайнтай холбоотойгоор гацаанд орсон. Тэгвэл эдийн засгаа сэргээх хүсэлтэй БНХАУ-ын дарга  Ши Жиньпиний төрийн айлчлал дайны гэмт хэрэгтэн болсон ОХУ-ын Владимир Путины хэрэг давхцаж, хэн хэндээ үр шимээ өгөхөөр болж байна. Төрийн айлчлал өнөөдөр үргэлжлээд өндөрлөх юм.