Хятадын Коммунист намын 20 дугаар их хурал Бээжин хотод эхэлж, төрийн томчууд нь олны нүдэнд үзэгдэхээ больж, дэлхийн анхаарал БНХАУ-д төвлөрөөд байна. Тус их хурлаар ХКН-ын Ерөнхий нарийн бичгийн даргаар 2012-2022 оны хугацаанд буюу хоёр удаагаа сонгогдон ажиллаж байгаа Ши Жиньпиний албан тушаалын тухай хуралдаж буй. Хятадын “Шинэчлэлийн эцэг” гэгддэг Дэн Сяопины номлол буюу одоогийн БНХАУ-ын Үндсэн хуульд “Удирдагч хүн 10 жил ажиллаад албаа өгөх ёстой” гэж заасан байдаг. Өөрөөр хэлбэл, сүүлийн 10 жилийн хугацаанд БНХАУ-ын даргаар ажилласан Ши Жиньпиний унах цаг нь ХКН-ын энэ удаагийн их хурал.

                           Ердөө өнгөрсөн жил үүсгэн байгуулагдсаныхаа 100 жилийн ойн баярыг нижгэр, сүртэй гэгч нь тэмдэглэж байсан ХКН-ын 20 дугаар их хурал олон улсын төсөөллөөс ч нэлээд ширүүн эхэлж байна. Жилийн өмнөх ХНК-ын ойн баяраар БНХАУ-ын дарга Ши Жиньпин “Хятад Улсад дунд зэрэг чинээлэг нийгмийг байгуулах 100 жилийн зорилгоо биелүүллээ. Өнгөрсөн 100 жилийн хугацаанд хийсэн Коммунист намын ажлын гол сэдэв нь үндэстнийг залуужуулах явдал байлаа” хэмээж ард түмнээ уярааж, доод албан тушаалтнууддаа “найр” тавьж байлаа. Гэсэн ч одоо болж байгаа намын их хурлаар Ши даргынхаа өмнөөс өмөлзөх нь бүү хэл, өмөөрч үг хэлэх ч хүн олдохгүй байгааг барууны хэд хэдэн хэвлэл бичжээ. Угтаа дэлхийн олон орон Ши Жиньпин БНХАУ-ын даргаар ажиллаж эхэлсэн цагаасаа ХКН-ыг  талцаж, хуваагдахад хүргэсэн гэж үздэг шиг өдгөө 20 дугаар их хурлаа хийж буй ХКН-ын “урвагч”-аа шүүж байгаа адил Ши Жиньпиний талаар хэлэлцэж байгаа гэнэ.

-ШИ БНХАУ-ЫГ ХЭРХЭН ӨӨРЧИЛСӨН БЭ-

                           2012 онд Хятадын Коммунист намын Ерөнхий нарийн бичгийн даргаар сонгогдож, ердөө жилийн дараа БНХАУ-ын удирдагчаар батламжлагдсан Ши Жиньпин эх орондоо өөрчлөлтийн салхи авчирч, дэлхийд тэргүүлэх эдийн засагтай орнуудын нэг болгосон гавьяатай. Ши Жиньпин БНХАУ-ын даргаар батламжлагдсаныхаа дараа орон даяар авлига, хээл хахуулийг арчихаа мэдэгдсэн. БНХАУ-д авлига, хээл хахуулийн хэрэгтэй холбогдсон төрийн албан тушаалтнуудыг “ялаа”, “бар” гэж нэрлэж, тэднийг “ангуучлах” тусгай газар байгуулсан байдаг. Дээрх үйлдэл тулгуурласан Ши Жиньпиний төлөвлөгөө амжилттай болж, улсынхаа 800 сая гаруй иргэнийг ажилгүйдэл, ядуурлаас аварсан түүнийг Дэн Сяопинээс хойших хамгийн агуу удирдагч гэх нь ч бий.

                           Харин эх орноо авлига, хээл хахуулиас салгасан Ши Жиньпинд БНХАУ-ын зарим гадаад харилцааг тасалж, цар тахлын цаг үед үр дүнтэй ажиллаж чадаагүй “гавьяа” ч байх аж. Энэ удаагийн ХКН-ын их хурлаар Ши Жиньпинийг албан тушаалаас нь огцруулах гол шалтгаан болж болзошгүй үндэслэлүүд нь БНХАУ-ын даргаар ажиллаж эхэлсэн цагаасаа хойш АНУ-тай таарамжгүй харилцаатай байсан асуудал. Мөн дотоодод цар тахлын дэгдэлтийг хязгаарлаж, чадалгүй эдийн засгийн хувьд асар их алдагдал хүлээсэн, ХКН-ыг дотор нь талцуулж, хуваасан зэрэг шалтгаан байгаа юм байна.

-ЗАСАН ХҮМҮҮЖҮҮЛЭХ ГАЗРААС АГУУ УДИРДАГЧ БОЛСОН НЬ-

Ши Жиньпин 1953 оны зургадугаар сарын 15-нд Бээжин хотод төрсөн. Түүний аав Ши Жоншюн нь Хятадын анхны төрийн удирдагчдын нэг, улс төрийн зүтгэлтэн байсан бөгөөд аав нь Хятадын соёлын хувьсгалын үеэр хэлмэгдүүлэлтэд өртөж амиа алдсанаас хойш тэдний гэр бүл ядуу тарчиг амьдарсан аж. Хоногийн хоолтойгоо арай гэж золгож, олдсон болгоныг нь хийж, бөөсөндөө баригдсан хөнжил нөмөрч байсан гэдэг Ши Жиньпин 16 насандаа засан хүмүүжүүлэх газарт хоригдож байсан түүхтэй. Өсвөр насандаа засан хүмүүжүүлэх газарт хоригдож байсан Ши “Хятадын онцлогтой социализм” хэмээн өргөжин тэлж байсан Хятадын Коммунист намд элсэж, улс төрийн гараагаа эхлүүлж байв. Бөөстэй хөнжилнөөс өдөн дэрэнд очсон “уярам” түүхтэй Ши Жиньпинд ард түмэн нь сайн. Түүнийг БНХАУ-ын дарга, ХКН-ын Ерөнхий нарийн бичгийн дарга болсны дараа жилд нь 95.15 сая хүн ХКН-д элсэж байв.

-“УНАДАГГҮЙ НОЁН” ШИ ЖИНЬПИН-

                           Дээр дурдсан Ши Жиньпиний өмнөх агуу удирдагч байсан Дэн Сяопин номлолдоо “Коммунист намын гишүүд 68 нас хүрээд залуу үедээ халаагаа өгөх ёстой” гэсэн байдаг. Харин Ши Жиньпин энэ жил 68 нас хүрч буй. Үүнээс Шиг татан буулгах, өөр хэн нэгэн засгийн эрхийг авахаас илүүтэй “Шинэчлэлийн эцэг”-ийн номлолоор Ши Жиньпин өөрийн хүсэлтээр огцрох ёстой болох юм. Хэрэв Ши огцорч, БНХАУ-ын даргын сонгууль болох болбол ХКН-ын Ерөнхий нарийн бичгийн даргын төлөө Ерөнхий сайдын орлогч Ху Чунхуа, намын Нарийн бичгийн дарга Чен Миньэр, намын Төв хорооны дарга Дин Шюэсян нар хүчтэй өрсөлдөх яриа ч байна. Мөн БНХАУ-ын одоогийн дэд дарга Ван Чишан ч Засгийн эрх авахад ойрхон байгааг хэдэн хэвлэл онцолжээ. БНХАУ-ын дарга унахад түүний оронд сонгогдох олон нэр байв ч Ши ХКН-ын их хурлаар орсон ч , ороогүй ч “насан туршийн эрх мэдэлтэй” гэнэ.

                           2018 онд Бүх Хятадын Ардын төлөөлөгчдийн их хурлаар удирдагч Ши Жиньпинд  бүх насаараа эрх мэдлээ хадгалах боломж олгох хууль, эрх зүйн орчин бүрдүүлэх талаар хэлэлцэж, шийдвэрлэсэн. Ардын төлөөлөгчдийн их хуралд оролцсон 3000 орчим төлөөлөгч БНХАУ-ын Үндсэн хуулиас Төрийн тэргүүний эрх мэдлээ хэрэгжүүлэх хугацааны тухай хуулийг хасахад 100 хувь саналаа өгсөн байдаг. Дээрх Төрийн тэргүүний эрх мэдлээ хэрэгжүүлэх хугацааны тухай хуулийг “Шинэчлэлийн эцэг” Дэн Сяопин нь Мао Зэдуны бүх насаараа засаглах дэглэмээс зайлсхийж, Үндсэн хуульд тусгасан гэдэг. Түүнчлэн хуулийн төслийг хассанаас гадна “Ши Жиньпиний үзэл санаа”-г Үндсэн хуульд оруулахаар хэлэлцэж, бүрэн дүүрэн дэмжсэн байдаг. ХКН-ын 20 дугаар их хурал дуусах болоогүй байгаа ч дэлхий хэдийнэ Ши Жиньпинд “алга ташиж”, олон улсын хэвлэлүүд ч Ши Жиньпин дахин БНХАУ-ын дарга, ХКН-ын Ерөнхий нарийн бичгийн даргаар сонгогдож, Мао Зэдун, Дэн Сяопин давж, Бүх Хятадын бүү хэл, дэлхийн түүхэнд нэр нь үлдэх агуу удирдагч болох нь “баараггүй” гэдэгтэй санал нийлж байгаа гэнэ.