ДАРХАН-УУЛ АЙМГИЙН ЗӨРЧЛИЙН ХЭРЭГ БҮРТГЭХ ТАСГИЙН АХЛАХ БАЙЦААГЧ: ШИНЖЭЭЧИЙН ДҮГНЭЛТ ЭЦЭСЛЭН ГАРААГҮЙ УЧИР ТОДОРХОЙ МЭДЭЭЛЭЛ ӨГӨХГҮЙ

      Дархан-Уул аймгийн цагдаагийн газар өсвөр насны хүүхэд ахуйн хэрэглээний газ үнэртэн нас барсан байж болзошгүй дуудлага мэдээлэл энэ сарын 11-нд бүртгэгдсэн байна. Дуудлагын дагуу Дархан-Уул аймгийн цагдаагийн алба хаагчид шалгалтын ажиллагааг эхлүүлж, хэргийн газар ажиллахад өсвөр насны хүүхэд газ үнэртэн газар дээрээ нас барсан байж болзошгүй байжээ. Энэ талаар Дархан-Уул аймгийн Цагдаагийн газрын Зөрчлийн хэрэг бүртгэх тасгийн ахлах байцаагч н.Чимэддорж “Шинжээчийн дүгнэлт эцэслэн гараагүй учир тодорхой мэдээлэл өгөх боломжгүй. Сүүлийн үед ахуйн хэрэглээний газ үнэртэж, донтож байгаа иргэд нэмэгдэж байгаа. Ахуйн хэрэглээний газ хэрэглэх нь Монгол Улсын Зөрчлийн тухай хуулийн 5.1.3-т заасан мансуурах гэсэн зүйл заалтаар шалгагддаг. Тэр дундаа өсвөр насны хүүхдүүд энэхүү буруу зуршилд донтож байгаа учир эцэг, эх, асран хамгаалагчид хүүхэддээ тавих хараа хяналтаа сайжруулах хэрэгтэй” гэсэн юм. 

ДАРХАН-УУЛ АЙМГИЙН ЭМЧ н.БУЯНДЭЛГЭР:АХУЙН ГАЗ ҮНЭРТЭЖ, НАС БАРСАН ХҮҮХДИЙН ЦОГЦСЫГ ЭМНЭЛЭГИЙН ЦОГЦОС ХАДГАЛАХ ӨРӨӨНД АВЧИРСАН

Мөн дээрх хэргийн талаар Дархан-Уул аймгийн нэгдсэн эмнэлэгийн эмчилгээ эрхэлсэн орлогч н.Буяндэлгэрээс тодрууллаа. Тэрбээр “Энэ сарын 11-нд өсвөр насны 2-3 хүүхэд гэрээс гадуур ахуйн газ хэрэглэж байгаад нэг нь газар дээрээ нас барсан байсан тухай дуудлагыг цагдаа нар бидэнд мэдэгдсэн. Дуудлагын дагуу хэргийн газар очиход талийгаач эмнэлгийн тусламж үйлчилгээ авах боломжгүй байсан учир моргт авчирсан. Шинжээчийн дүгнэлт гараагүй байгаа учир дэлгэрэнгүй мэдээлэл өгөх боломжгүй. Газ үнэртсэн бусад хүүхдүүдийг эмнэлэгт эмчлэх шаардлагагүй хэмээн үзсэн” гэлээ. 

Сүүлийн үед өсвөр насны хүүхдүүд ахуйн газ хэрэглэх нь нэмэгдсэн учир эцэг, эхчүүдэд анхааруулах үүднээс өмнө нь гарч байсан зарим мэдээллийг сэрэмжлүүлэг болгон хүргэж байна. 

      2017 онд Сэлэнгэ аймгийн Мандал сумын Түнхэл тосгоны нутаг дэвсгэрт ... тоот хашааны гадаа 05:00 цагийн орчим 16 настай О гэгч нь гэрийнхээ хашааны үүдэнд нас барсан байдалтай олдож байсан. Тус мэдээллийн дагуу Сэлэнгэ аймгийн Мандал сум дахь Цагдаагийн хэлтсийн Ажлын хэсэг очиж ажиллахад урьдчилсан байдлаар хохирогчийн цогцост хийсэн задлан шинжилгээгээр гадны нөлөөгүй, хордлогод орсоны улмаас нас барсан байж болзошгүй гэж дүгнэж байсан. Үүний дагуу мөрдөн байцаалтын ажиллагаа явуулахад Түнхэл тосгоны 14-16 насны "З”, "Х”, "Э”, "О” нар нь 2017 оны зургадугаар сарын 10-ны өдрийн орой 22:00 цагийн орчим хүнсний дэлгүүрээс ахуйн хэрэглээний шатагч хий худалдан авч улмаар талийгаач О нь үнэртэж хэрэглэсэн болох нь тогтоогдож байсан. 

     Мөн 2017 онд Хан-Уул дүүрэг 15-18 насны дөрвөн хүүхэд газ үнэртэн мансуурч, нас барсан хоёр тохиолдол бүртгэгдэж байв. 

       Сонгинохайрхан дүүргийн 31 дүгээр хороонд оршин суух хаягтай 18 настай эрэгтэй Б ахуйн газ үнэртэж нас барж байв. Тэрээр орцноос гарч авахдаа ухаан алдан унаж, биедээ ил харагдах гэмтэлгүй нас барсан байсныг цагдаа нар шалгаж, ахуйн хэрэглээний газ үнэртсэн байсныг тогтоож байсан.