Засгийн газрын шийдвэрийн дагуу төлбөрийн тэнцлийн алдагдал өндөр байгаа “Эрдэнэс тавантолгой” ХК-д өнгөрсөн аравдугаар сараас эхлэн зургаан сарын хугацаатай онцгой дэглэм тогтоосон. Улмаар тус компанийг ашигтай ажиллуулж, ам.долларын орох урсгал, нөөцийг нэмэгдүүлэхийн тулд Бүрэн эрхт төлөөлөгч томилон ажиллуулж буй. Харин тус компанийн өндөр дүнтэй төсөл, тендер бүрд өрсөлдөгчгүй шалгарч ирсэн “Norinco group” нэрээрээ алдартай “China North Industries Corporation” компанийн “Эрдэнэс тавантолгой” ХК-тай хийсэн оффтейк гэрээ нууц хэвээр үлдсэн нь иргэдийн дунд дуулиан болж байлаа. Тэгвэл Эргэлт.мн мэдээллийн сайтын Эрэн сурвалжлах нэгдлээс Эрдэнэс тавантолгой” ХК-ийн “Норинко интернейшнл” компанитай байгуулсан 388 сая ам.долларын оффтейк гэрээг ил болгож байна.

-БНХАУ-ЫН АРДЫН АРМИД ЗЭВСЭГ НИЙЛҮҮЛДГЭЭРЭЭ АЛДАРТАЙ “НОРИНКО ГРУПП” МОНГОЛД ТӨСӨЛ ХЭРЭГЖҮҮЛЭГЧ, ГҮЙЦЭТГЭГЧИЙН “ДҮР”-ЭЭР ОРЖ ИРСЭН НЬ-

                   Дэлхийд “Norinco group” нэрээрээ алдартай БНХАУ-ын “China North Industries Corporation” компанийн охин компаниуд сүүлийн хэдэн жилийн турш Монголын томоохон төсөл, тендерт өрсөлдөгчгүй шалгарч, ажиллажээ. Тус группийн Монгол дахь охин компанийн хэдэн жилийн өмнөөс Засгийн газартай концессийн гэрээ байгуулж, Тавантолгойн ордоос Ханги боомтын чиглэл хатуу хучилттай авто зам барьж, барьсан замаар нүүрс тээвэрлэж байгаа юм байна. Харин “Norinco group”-ийн “Норинко интернейшнл” компани “Эрдэнэс тавантолгой” ХК-тай хоёр ч оффтейк гэрээ байгуулсан нь иргэдийн анхаарлыг татаж байсан.

Өнгөрсөн 2022 оны хоёрдугаар сард “Эрдэнэс тавантолгой” ХК-аас “Нүүрс баяжуулах үйлдвэр”-ийн гүйцэтгэгч шалгаруулах 314 сая ам.долларын санхүүжилттэй тендер зарласан байдаг. Харин тус тендер “Норинко интернейшнл” компани шалгарч, “Нүүрс баяжуулах үйлдвэр”-ийг барьж өгснийхөө төлбөр буюу 314 сая ам.долларыг нүүрсээр авахаар оффтейк гэрээ байгуулсан.

                   Харин нөгөөх нь нефть дамжуулах хоолой төлбөрийг нүүрсээр авах оффтейк гэрээ. Монгол Улсын Засгийн газрын 2020 оны нэгдүгээр сарын 6-ны өдрийн хуралдаанаар Дорноговь аймгийн Алтанширээ суманд барьж буй “Газрын тос боловсруулах үйлдвэр” ТӨХК-ийн түүхий эд болон нефтийг Дорнод аймгийн 580 км урт дамжуулах хоолойгоор тээвэрлэх шийдвэр гаргасан байдаг. Улмаар нефт дамжуулах хоолойн тендерийг Уул уурхай, хүнд үйлдвэрийн яамнаас зарлаж, “Эрдэнэс тавантолгой” ХК-аас санхүүжүүлэхээр болсон. Харин тус тендерт “Норинко интернейшнл” компани шалгарч, 580 км дамжуулах хоолой барьж өгөх ажлынхаа төлбөрийг “Нүүрс баяжуулах үйлдвэр”-ийнхтэй адил буюу нүүрсээр авахаар болж мөн л оффтейк гэрээ байгуулсан юм.

-“НОРИНКО ИНТЕРНЕЙШНЛ” КОМПАНИЙН 388 САЯ АМ.ДОЛЛАРТОЙ ДҮЙЦЭХ НҮҮРСИЙГ БНХАУ-ЫН “ГЛОРИ ТАУН ХОЛДИНГС” ХУДАЛДАЖ АВАХААР БОЛЖЭЭ-

Нефть дамжуулах хоолойн төлбөрөө нүүрсээр авахаар тохиролцсон “Норинко интернейшнл” компани оффтейк гэрээ байгуулж, дамжуулах хоолойн төлбөрт Монголоос нийлүүлэх нүүрсийг БНХАУ-ын “Глори таун холдингс” компанид борлуулахаар болжээ. Тухайлбал, “Эрдэнэс тавантолгой” ХК-ийн гүйцэтгэх захирал Б.Ганхуяг, “Норинко интернейшнл” компанийн Уул уурхай, газрын тосны газрын ерөнхий менежер Жоу Дянбин, “Глори таун холдингс” компанийн төлөөлөгч Ван Жуншү нарын гарын үсэг зурж, баталгаажуулсан оффтейк гэрээнд тусгаснаар БНХАУ руу гаргах нүүрсний үнийг тухайн улирлын нүүрсний жишиг үнээр үнэлэх юм байна. Улмаар гэрээ байгуулсны дараа сараас буюу  2022 оны тавдугаар сард 12.2 сая ам.доллартой дүйх нүүрс нийлүүлж эхлэн 2024 он дуустал нийт 368,660,800 сая ам.доллартой дүйх нүүрс нийлүүлэхээр тооцжээ.

                     Оффтейк гэрээнд дурдсан нүүрс нийлүүлэх төлөвлөгөөг хүснэгтээр харуулъя.

                 Нүүрс нийлүүлэх оффтейк гэрээнд дурдсан тооцооллоор 3,420,000 тонн нүүрс нийлүүлэх юм байна. БНХАУ руу гаргаж, “Глори таун холдингс” компанид борлуулах нүүрсийг Өмнөговь аймгийн Цогтцэцэий сумын нутагт байрлах Тавантолгойн нүүрсний ордын Цанхийн блок зэрэг газраас олборлохоор тусгасан бөгөөд ачилтыг нь Цанхийн Уурхайн ам гэх газраас хийх аж. Мөн тус оффтейк гэрээнд худалдан авагч тал буюу “Глори таун холдингс” компани тээврийн автомашин, жолоочийнхоо 50 хувийг Монголын авто тээврийн компаниас бүрдүүлэх бөгөөд БНХАУ руу нийлүүлэх нийт нүүрсний 50-аас доошгүй хувийг Ханги-Мандал боомтоор гаргахаар тусгасан байна.