“Үйлс бүтэмж” эмэгтэйчүүдийн эмнэлэгт мэс засалд орж байсан 37 настай эмэгтэй зүрх нь зогсож, амиа алдсан харамсалтай хэрэг өнгөрсөн арваннэгдүгээр сард гарсан байдаг. Тодруулбал, талийгаач Э нь тус эмнэлэгт эмэгтэйчүүдийн мэс засалд хагас унтуулгатай орж байх явцдаа амьсгал нь тасалдаж, бие нь муудсан байдаг. Мэс заслыг удирдаж байсан “Үйлс бүтэмж” эмнэлгийн багийнхан Яаралтай түргэн тусламжийн 103 дугаарт дуудлага өгч, Улсын Хоёрдугаар төв эмнэлэгт хүргэсэн ч эмэгтэй амьсгал хураасан юм.

“ҮЙЛС БҮТЭМЖ” ЭМНЭЛГИЙН АЖИЛТАН: МЭС ЗАСАЛД ОРЖ БАЙСАН ХҮН НАС БАРСАН УЧРААС ЭМНЭЛЭГ АЖИЛЛАХГҮЙ БАЙГАА

      Тэгвэл талийгаачийг хавдар болох гэж байгаа тул нэн яаралтай мэс засалд ор гэж ятгасан “Үйлс бүтэмж” эмнэлгийн эмч нарыг хууль хяналтын байгууллагаас шалгаж байна. Хэрэг гарсан өдрөөс хойш тус эмнэлгийн хоёрдугаар салбар болох Баянзүрх дүүргийн 14 дүгээр хорооны “Цагаан хуаран” хотхонд байрлах эмнэлгийг хааж, үйл ажиллагааг нь түр хугацаанд зогсоожээ.

Энэ хэргийн талаар “Үйлс бүтээмж” эмнэлгийн холбогдох албан тушаалтантай холбогдож, тодруулахад “Манай эмнэлгээр үйлчлүүлж байсан эмэгтэй нас барсан учраас эмнэлгийг хааж, цагдаагийн байгууллагаас шалгаж байгаа. Эмнэлгийг маань хэзээ нээх, үйл ажиллагаа нь хэзээнээс эхлүүлэхийг сайн мэдэхгүй байна. Ерөнхий эмч болон холбогдох хүмүүсийг хууль хяналтын байгууллагаас шалгаж байгаа. Талийгаач эмэгтэй манай эмнэлэг дээр бус, улсын эмнэлэгт хүргэгдээд амиа алдсан. Ямар мэс засалд орж байсныг хэлэх боломжгүй. Манай эмнэлэг тусгай зөвшөөрөлтэй, олон жил үйл ажиллагаагаа тогтвортой явуулж байгаа” хэмээн өөр мэдээлэл өгөхөөс татгалзсан юм.

ТАЛИЙГААЧ ЭМЭГТЭЙД ӨВЧНИЙ ТҮҮХ Ч НЭЭГЭЭГҮЙ МЭС ЗАСАЛ ХИЙЖЭЭ

       Талийгаач эмэгтэй нөхөр, хүүхдийн хамт орон нутагт амьдардаг байжээ. Тэрээр Өмнөговь аймгаас мэс засалд орохоор ирсэн байж. Хачирхалтай нь, талийгаачид мэс засал хийж эхэлсэн ч ямар онош тавьсан, юуны хагалгаа хийж байсан эсэх нь тодорхойгүй байгаа гэнэ.

Энэ талаар эх сурвалжийн мэдээлснээр “Талийгаач 37-хон настай, гурван хүүхдийн ээж, ихэр эмэгтэй байсан. Эмэгтэйчүүдийн эмнэлэгт үзүүлээд, хавдар болох гэж байна гэсэн учир мэс засалд орохоор орон нутгаас ирсэн юм билээ. Гэтэл оношилсон, мэс засал хийхээр эхлүүлсэн эмч нь өвчний түүхийг нь ч нээгээгүй байсан гэсэн. Яагаад стор нээгээгүй гэдгээс шалгаж эхэлж байгаа байх” гэлээ.

ЦЕГ: ХЭРГИЙГ БАЯНЗҮРХ ДҮҮРГИЙН ЦАГДААГИЙН НЭГДҮГЭЭР ХЭЛТЭСТ ШАЛГАЖ БАЙГАА

Энэ хэргийн талаар Цагдаагийн байгууллагаас тодруулахад "2023 оны арваннэгдүгээр сарын 11-нд Баянзүрх дүүргийн 14 дүгээр хорооны нутаг дэвсгэрт байрлах хувийн эмнэлгээс “Эмэгтэй хүн хоёрдугаар эмнэлэгт хүргэгдэн ирээд нас барсан” гэх дуудлага, мэдээлэл бүртгэгдсэн. Тус дүүргийн цагдаагийн газрын нэгдүгээр хэлтсээс шалгахад амь хохирогч хувийн эмнэлэгт эмчилгээ хийлгэн, улмаар хагалгааны дараа ухаан алдаж, хоёрдугаар эмнэлэгт хүргэгдэн ирээд амиа алдсан байсан. Уг хэрэгт мөрдөн шалгах ажиллагаа явуулж байна. Хэргийг Баянзүрх дүүргийн нэгдүгээр хэлтэст шалгаж байна" гэлээ.

“ҮЙЛС БҮТЭМЖ” ЭМНЭЛГИЙН ЗАХИРАЛ Ж.АЛИМАА НЬ “ӨРГӨӨ” АМАРЖИХ ГАЗАРТ ЭХ БАРИГЧ ЭМЧЭЭР АЖИЛЛАДАГ БАЙЖЭЭ

37 настай эмэгтэй амиа алдсан “Үйлс бүтэмж” эмнэлгийн захирал буюу ерөнхий эмчээр Ж.Алимаа гэх эмэгтэй ажилладаг ажээ. Тэрбээр “Өргөө” амаржих газарт эх барих, эмэгтэйчүүдийн эмчээр олон жил ажилласан туршлагатай эмч аж. Тэрбээр гавьяаныхаа амралтад гарч, хувийн эмнэлэгтээ ажиллаж байжээ.

Эх сурвалжийн бидэнд өгсөн мэдээллээр Ж.Алимааг талийгаач эмэгтэйн хэрэгт шалгаж байгаа аж.

ТАЛИЙГААЧИЙН НӨХӨР П: МӨРДӨН ШАЛГАХ АЖИЛЛАГААНЫ НУУЦ ЗАДРУУЛЖ БОЛОХГҮЙ ГЭЭД ГАРЫН ҮСЭГ ЗУРУУЛСАН

Бид энэ хэргийн талаар талийгаачийн нөхөр П-тэй холбогдож, тодруулахад “Манай эхнэр “Үйлс бүтээмж” эмнэлэгт мэс засалд орох явцдаа амиа алдсан. Хэргийн мөрдөн шалгах ажиллагаа үргэлжилж байгаа учраас би нарийн мэдээлэл өгч болохгүй байна. Мөрдөн шалгах ажиллагааны нууц задруулахгүй гээд гарын үсэг зурсан” гэлээ.

Энэхүү мэдээллийг сэрэжлүүлэг болгох үүднээс бэлтгэн хүргэлээ. Иргэд та бүхнийг баталгаагүй газарт эрүүл мэнд, амь насаа даатгахгүй байхыг анхааруулж байна.