Допингийн асуудал энэ намрын халуун сэдэв байлаа. Допингийн эсрэг үндэсний төвийн дарга нь хориотой бизнесийн гол толгойлогч байсан нь илэрч, хууль хяналтын байгууллагаас шалгаж эхлээд байна. Дэлхийн улс орон тамирчдаа сэргээшээс хамгаалахын тулд хариуцлагатай ажиллаж байхад манай улс бүр сурталчилж, шахаж, тамирчдаа хорлож байна гэсэн үг л дээ, үндсэндээ.

ДОПИНГИЙН ЭСРЭГ ҮНДЭСНИЙ ТӨВИЙН ДАРГА АСАН Ж.ХАТАНБААТАРЫН БҮЛЭГЛЭЛИЙГ ШАЛГАЖ БАЙНА

      Эрүүгийн цагдаагийн алба болон АТГ-аас өчигдөр Допингийн эсрэг үндэсний төвийн тэргүүн Ж.Хатанбаатарын гэр болон албан өрөөнд шалгалт хийсэн байдаг. Шалгалтаар Ж.Хатанбаатарын өрөөнөөс нэр, хаяг нь тодорхойгүй сэргээшийн төрлийн бодис илэрсэн байдаг. Мөн тэрбээр бөхчүүдийн шинжилгээний хариуг өөрийн цахим хаягаар авч, нэр бүхий бөхчүүдээс авлига авч байж болзошгүй нөхцөл байдал тогтоогдоод шалгалтын ажиллагааг явуулж байна.

       Эх сурвалжуудын бидэнд өгсөн мэдээллээр олон жилийн өмнөөс Допингийн эсрэг үндэсний төвийн тэргүүн Ж.Хатанбаатар үндэсний баяр наадмаар барилдаж шөвгөрсөн бөхчүүдийг шинжилгээг авч БНСУ-ын олон улсад итгэмжлэгдсэн лабораторит шинжилгээг нь явуулдаг. Ингээд сар гаруйн хугацааны дараа хариуг нь хүлээн авдаг. Ингэхдээ өөрийн удирдаж байгаа Допингийн эсрэг үндэсний төвийн албан ёсны хаяг бүхий газрын цахим хаягаар биш өөрийнхөө хувийн хаягаар мэдээллийг нь авдаг. Авсан мэдээллээ олон нийтэд зарлахдаа нэр бүхий допингийн шинжилгээнд бүдэрсэн хариутай бөхчүүдийн нэрийг эрх мэдэл албан тушаалаа урвуулан ашиглаж нуун дарагдуулдаг байж болзошгүй байгаа гэнэ. Асуудлыг цааш нь хөвөрдвөл допинг хэрэглэсэн бөхчүүдээс их хэмжээний мөнгө авдаг. Бүр гэмт хэргийн бүлэглэлийн шинжтэй зүйл байгааг ч үгүйсгэх аргаггүй гэнэ.

      Тэгвэл хууль хяналтын байгууллагынхан Ж.Хатанбаатарын гэрээс сэргээшийн төрлийн бодисоос гадна их хэмжээний бэлэн мөнгө олжээ. Одоогийн байдлаар мөнгөний эх үүсвэр тогтоогдоогүй бөгөөд шалгалтын ажиллагааг явуулж байна. Мөн шалгалтын явцад Ж.Хатанбаатар бөхчүүдийн шинжилгээний хариуг хүлээж авсан мэйл хаягаа устгаж, өөрийгөө цэвэрлэсэн байжээ. Хууль хяналтын байгууллагынхан БНСУ-ын Элчин сайдын яамаар дамжуулан, хууль хяналтын байгууллагад нь хүсэлт тавьжээ.

      Эх сурвалжийн бидэнд өгсөн мэдээллээр “Ж.Хатанбаатарын устгасан мэйлийг сэргээхээр хоёр улсын хууль хяналтын байгууллага ажиллаж байна. Одоогоор БНСУ-ын цагдаа нар допингийн шинжилгээ авсан эмнэлгийн мэйлийг шалгаж байгаа” гэв.

“АЛДАР” СПОРТ ХОРООНЫХНЫГ ДОПИНГИЙН АСУУДЛААР ШАЛГАЖ ЭХЭЛЖЭЭ

       Ноцтой нь, допингийн асуудал үндэсний спортоос хальсан. Монгол Улс дэлхийд данстай болчихлоо гэсэн үг. Азийн наадамд зодоглож, тулалдсан “Алдар” спорт хорооны хоёр ч тамирчнаас допинг илэрлээ. Тодруулбал,

        Ханжоугийн Азийн наадамд оролцсон Монголын хоёр тамирчин допингт бүдэрлээ. Тодруулбал, тус наадмаас алтан медаль хүртсэн, ирэх олимпийн найдвар гэгдээд буй боксчин Б.Чинзоригоос метадиеноны метаболит, хүндийн өргөлтийн залуу тамирчин Б.Эрдэнэзулаас дростанолоны метаболит илэрсэн гэх. Тамирчдаас илэрсэн хоёр бодис нь хоёулаа WADA буюу Дэлхийн допингийн эсрэг агентлагийн хориотой эмийн жагсаалтын S1 буюу бүх цаг үед хориотой ангилалд багтдаг аж. Мөн допинг илэрсэн хоёр тамирчин нь хоёулаа "Алдар" спорт хорооных байгаа нь анхаарал татаж байна. 

       Иймд асуудал “Алдар” спорт хорооныхонд байна уу гэдгийг хууль хяналтын байгууллагаас углуургаар нь шалгаад эхэлсэн гэнэ. Мөрдөн шалгах ажиллагааны явцад маш ноцтой сэжүүрүүд илэрч байгаа сурагтай. Тодруулбал, “Алдар”-ын багш, дасгалжуулагчид тамирчиддаа допинг шахдаг, зөвлөдөг байж болзошгүй мэдээлэл иржээ. Ямартай ч хууль хяналтын байгууллагынхан допингийн асуудлыг нухацтай гэгч нь шалгаж байна. Шалгах “даалгавар”-ыг ч Засгийн газар, салбар хариуцсан сайдаас нь өгсөн бололтой.

“АЛДАР” СПОРТ ХОРООНЫ ХҮНДИЙН ӨРГӨЛТИЙН ДАСГАЛЖУУЛАГЧ А.ОТГОНЖАРГАЛ, Ч.МАРТ ГЭХ ГЭР БҮЛИЙН ХОЁРЫГ ТАМИРЧДАД ДОПИНГ ШАХДАГ ХЭРГЭЭР ШАЛГАХ УУ

        Хамгийн ноцтой нь, “Алдар” спорт хорооны хүндийн өргөлтийн дасгалжуулагчид тамирчдад допинг шахдаг, зөвлөдөг байж болзошгүй ажээ. Тодруулбал, тус хорооны хүндийн өргөлтийн дасгалжуулагч, дэслэгч Ч.Март, А.Отгонжаргал нар эл хэрэгт холбоотой байж болзошгүй гэнэ.

        Эх сурвалжийн бидэнд өгсөн мэдээллээр “Хүндийн өргөлтийн дасгалжуулагч А.Отгонжаргал, Ч.Март гэж гэр бүлийн хоёр бий. Уг хоёр дасгалжуулагч нь “Алдар” спорт хороонд олон жил харьяалагдаж,тамирчдыг дасгалжуулж байгаа. Хамгийн сүүлд допинг илэрсэн хүндийн өргөлтийн тамирчин Б.Эрдэнэзул нь энэ хоёр хүний унаган шавь. Ийм учраас шавьдаа допинг шахсан, “30 хоногийн дараа биеэс чинь гарчихна” гэх зэргээр зөвлөж, хуурсан байж болзошгүй юм билээ. Үүнийг хууль хяналтын байгууллагаас шалгаад тогтооно биз. Гэхдээ ОУХМ А.Отгонжаргал, туслах дасгалжуулагч, дэслэгч Ч.Март нар олон жилийн өмнөөс бөхчүүдэд тариа тарьдаг, зардаг гэх асуудал ам дамжсаар ирсэн. Энэ нь илрэхгүй, хууль хяналтын байгууллагаас ч шалгахгүй явсаар өнөөдөрт хүрсэн байх магадлалтай. Харин одоо допингийн асуудал өндрийг авсан учир шалгаж, тогтооно биз” гэлээ.

     Мөн нэрээ нууцлахыг хүссэн хэд хэдэн эх сурвалж хүчний дасгалжуулагч А.Отгонжаргал, Ч.Март нарын допинг шахдаг, тамирчдад зөвлөдөг, зардаг асуудлыг хууль хяналтын байгууллагаар шалгуулахаар өргөдөл, гомдлоо хүргүүлж байгаа гэсэн. Түүнчлэн тус дасгалжуулагчдын удирдлага дор бэлтгэл, сургуулилалтаа хийдэг тамирчид ч мэдээллийг хууль хяналтын байгууллагад хүргүүлж байгаа бололтой.