Нарсан ой эцсийн мөч хүртлээ монголчуудын уушгийг хамгаалж, “нас”-аа дуустал ургаж чадах болов уу эсвэл хүний гарын ая даахтай үгүйтэй болуутаа ачигдаж, машины тэвшин дээр бэхлүүлж, нийслэлчүүдийг баясгах ногоон байгууламж болох үүрэг аван Яармагийн хойд дэнжид “амь” тавих өдрөө хүлээн өдрөөс өдөрт өнгө зүс алдан гундаж байгаа модод шиг хаа нэгтээ бөхөлзөж байх болов уу гэх бодол биднийг Сэлэнгэ аймгийн Хүдэр сум руу хөдөлгөлөө.

          Энэ намаржин Ерөнхийлөгчийн санаачилсан “Тэрбум” мод хөтөлбөр хэрэгжиж, төрийн албан хаагчдыг хаа саагүй тонголзуулж, мод тарих арга хэмжээ зохион байгуулсан. Энэ үеэр Эрдэнэт, Дарханы замд мод ачсан машинууд холхилдож, эхэлсэн билээ. Нарсан ойгоос ачигдаж, нийслэлд хүрсэн эл моднууд Ерөнхийлөгчийн санаачилсан "Тэрбум" мод хөтөлбөрийн тоонд орох нь тодорхой.

Үргэлжлэлийг ЭНД дарж уншаарай.

          Сэлэнгэ аймгийн Хүдэр сум Шандын ам гэх газраас мод шилжүүлэн суулгах нэрийн дор байгаль орчны эсрэг гэмт хэрэг үйлдэж буй ноцтой асуудлыг манай сайтын сурвалжлах баг цувралаар мэдээллэж буй. Мод шилжүүлэн суулгах тусгай зөвшөөрөлтэй компанийн ажилтнууд уулын энгэрийн модыг хайр гамгүй сугалж, дөнгөж газрын хөрснөөс төө, дэлэм ургаж буй нялх модыг хүнд машины дугуйгаар хуга, няц дайрч, энд тэндгүй ухсан нүх нь харлаж үлдсэн нь энд хууль бусаар мод бэлтгэснийг нь бэлхнээ гэрчилнэ. Тэд гэрээгээр хүлээсэн ой сийрэгжүүлэх үүргээ биелүүлэх нь битгий хэл модны захаас эхлэн нарсыг нь хуу хамсан байлаа. Түүнд Сэлэнгэ аймгийнхан огт анхаарал хандуулаагүй нь илт. Уг асуудлыг хөндсөн эхний цуврал сурвалжилгаа нийтэлсэнтэй холбоотойгоор манай редакц, сэтгүүлчид олон газраас дарамт, шахалт ирж байгааг энд онцолъё. Тухайлбал, Ерөнхийлөгчийн тамгын газар, Ерөнхийлөгч У.Хүрэлсүхийн зөвлөх зэрэг нэр бүхий хүмүүс “Эргэлт.мн мэдээллийн сайтын хамт олныг хууль хяналтын байгууллагад шалгуулна” хэмээн хэвлэн нийтлэх эрх чөлөөнд илтэд халдаж, сүрдүүлж эхлэв.

          Бид уулын нялх модыг хуу хаман, хар нүх болгоод үлдээж буйг илчилсэн цуврал сурвалжилгаараа хэн нэгний нэр хүндэд халдаагүй, “Тэрбум мод тарих аян”-ыг харлуулах зорилго агуулаагүй гэдгээ албан ёсоор илэлхийлж байна.

 Үргэлжлэлийг ЭНД дарж уншаарай