Олон улсын эдийн засгийн тагнуулын албанаас эхлүүлээд гаднын хэвлэлээр Монгол Улс дефолт зарлаж болзошгүй талаар мэдээлээд эхэллээ. Хагас жилийн тайлангаар 33.8 тэрбум ам.доллар гадаад өртэй болж, инфляц нь 16.1 хувьд хүрсэн манай орон дефолт зарлавал гадаад хөрөнгө оруулалт нам гацаж, импортын бүтээгдэхүүн татаж чадалгүй байсаар сарын цалин ч хоногийн хоолонд хүрэлцэхгүй болох нь.

 -"ШРИ-ЛАНКЫН АРААС МОНГОЛ УЛС ДЕФОЛТ ЗАРЛАНА" ГЭВ-

Саяхан 22 сая хүн амтай Шри-Ланка Улсын ДНБ нь 80 тэрбум ам.доллар давж, гадаад өр нь 51 тэрбум ам.долларт хүрч, дефолт зарласан. Харин Монгол Улс  нэг хүнд ногдох өрөөрөө Шри-Ланкатай харьцуулахад дөрөв дахин илүү болсон өрний асуудалтай, инфляц 16.1 хувьд хүрсэн нь Шри-Ланкийн араас орох үзүүлэлт болж байна. 

Монгол Улс 33.89 тэрбум ам.долларын гадаад өртэй. Энэ хэмжээний гадаад өр болон харьцаа, эргэн төлж чадахгүй байдлаас үүдэн дефолт зарлах эрсдэлтэй гэнэ.

EIU буюу Эдийн засгийн тагнуулын албанаас Шри-Ланка Улс араас инфляц, зээлийн өртөг нэмэгдэж, эдийн засгийн хямрал нүүрлэснээр Азийн хөгжиж буй орнууд гадаад өрийн эргэн төлөлтөө хийх боломжгүйд хүрч, дефолт болох эрсдэлтэй хэд хэдэн орныг танилцуулсан. Тэр дунд Монгол Улс "цохиж" явааг анхаарах ёстой болжээ.

EIU-ын тайланг дэлгэрүүлбэл, "Ази тивийн хөгжиж буй орнууд дундаас Монгол, Лаос, Мьянмар гурав дефолт зарлах эрсдэлд ойрхон байгаа" гэсэн юм. Тэгвэл зөвхөн Эдийн засгийн тагнуулын алба ч бус Тайванийн "EBC" гэх телевиз Монгол Улсыг дефолт зарлаж болзошгүй гэж мэдээлээд байна. Ингэхдээ "БНХАУ-аас авсан өрөө төлж чадаагүй" гэдгийг онцлон ярьж байх.

-МОНГОЛ УЛСЫН ГАДААД ӨРИЙГ АНГИЛБАЛ, ЗАСГИЙН ГАЗАР 8.3 ТЭРБУМ, МОНГОЛБАНК 2.6 ТЭРБУМ АМ.ДОЛЛАРЫН ӨРТЭЙ БАЙНА-

Эдийн засагч Ж.Дэлгэрсайханы манай сайтад өгсөн ярилцлагадаа дурдсан жишээгээр гадаад өрийг иргэн бүрд хуваавал, 3.4 сая хүн амтай Монгол Улсын иргэн бүр 31 сая төгрөгийн өртэй болжээ.

                Хэрэв энэ байдлаар гадаад өрөндөө "идэгдэж" ирэх намар дефолт зарлавал гаднын төсөл, санхүүжилт нам зогсож, валютын хомстол үүссэнээр Монгол Улс импортын бүтээгдэхүүн оруулж ирэх чадамжгүй болох талаар шинжээчид анхааруулж байна. Уг хэмжээнд хүрвэл оны эхний зургаан сард 16.1 хувьд хүрсэн инфляц "нүднээс гарч" иргэд сарын цалингаараа хоногийн хоолоо ч авч чадахгүй байх нөхцөл байдалд хүрэх нь.

Монголбанкнаас улсын нийт гадаад өр өмнөх оноос 2.5 хувиар өссөн талаар мэдээлсэн. Гадаад өрийг бүтцээр нь задалбал 25.5 хувь буюу 8.4 тэрбум ам.доллар нь Засгийн газрын гадаад өр аж. Харин улсын төв банк буюу Монголбанк нийт 2.6 тэрбум ам.долларын гадаа өртэй. Монгол Улс олон улсын зах зээлээс найман удаа бондын санхүүжилт татаад байгаа бөгөөд эдгээр нь гадаад валютаар гаргасан бонд юм.

2023 оны эцэст Хөгжлийн банк, Засгийн газрын баталгаатай босгосон Самурай бондын 30 тэрбум иен, Евробондын 500 сая ам.долларын өр төлөх хуваарьтай. Гэсэн ч хоёр бондын эргэн төлөлтийн "нүүр" үзэлгүй дефолт зарлах эрсдэлтэй нүүр тулж байна.