“Оюутолгой” ХХК-ийн 66 хувийг эзэмшдэг Канадын “Turquiose Hill” компани энэ оны эхний есөн сарын тайлангаа олон нийтэд ил болгожээ. Энэ хугацаанд Оюутолгойн ил болон далд уурхайд 200 мянган ажилтан ажилласан нь өнгөрсөн зургадугаар сарын хагас жилийн үзүүлэлттэй харьцуулахад ахицтай байгаа ч, нийт ажилтны 50-иас доош хувь нь ажиллаж байгаа юм.

Оюутолгойн ил уурхайн олборлолт 2013 оноос эхэлсэн. Харин хоёр дахь үе шат буюу 6.75 тэрбум ам.долларын өртөгтэй 200 км хонгил, 1.3 км гүнд өргөтгөл хийснээр баяжмалын гарцыг гурав дахин нэмэгдүүлж, нэг жилд 500 мянга гаруй тонн хүргэх төлөвтэйг олон улсад онцолсоор ирсэн.

-НЭМЭЛТ ЗАРДЛЫГ БАТЛАХГҮЙ БОЛ ГҮНИЙ УУРХАЙН БҮТЭЭН БАЙГУУЛАЛТ УДААШРАХ ЭРСДЭЛТЭЙ БАЙНА-

          “Turquiose Hill” компанийн энэ оны эхний есөн сарын тайланд “Оюутолгой” ХХК ажилтнуудынхаа эрүүл мэндийг хангах үүднээс “Ковид-19”-ийн эсрэг хатуу протоколууд мөрдөж байна. Одоогийн байдлаар компанийн бүх ажилтан коронавирусийн эсрэг вакцины бүрэн тунд хамрагдаж, гурав дахь бүүстэр тунгийн вакцинжуулалтын аян өрнөж байгаа” онцлон тодотгожээ. Иймд 2021 оны эцэс гэхэд “Оюутолгой”-н ажиллах хүч эргэн хэвийн хэмжээнд очно гэж тооцоолсон байна.

          “Turquiose Hill” компаниас “Оюутолгой”-н далд уурхай бүтээ байгуулалтад үзүүлэх мөнгөн дүн өнгөрсөн аравдугаар сарын 14 буюу гуравдугаар улирлын эцэс гэхэд 140 сая ам.доллароор нэмэгдсэн. Гэсэн ч дээр дурдсан хэмжээний дэмжлэгээс “Оюутолгой” ХХК-ийн ТУЗ-ийн гишүүд татгалзсан учир үнэлгээний шатандаа эргэн шилжиж, дэмжлэг үзүүлэхгүй боломжгүй болсон аж. Тиймээс “Оюутолгой” ХХК-д зардлыг үргэлжлүүлэн хянах, зах зээлийг зохих ёсоор нь шинэчлэх шаардлага тавьж байгаа юм.

-2021 ОНЫ III УЛИРАЛД 41 МЯНГАН ТОНН ЗЭС, 130 МЯНГАН УНЦ АЛТ ОЛБОРЛОЖЭЭ-

          “Turquiose Hill” компани III улирлын тайландаа “Сайн үр дүн гаргасан” талаараа онцолсон байна. Үүнд Оюутолгойн ил болон далд уурхайгаас III улиралд 41,935 тонн зэс олборлосон нь өмнөх оны мөн үеийнхээс 16 хувиар, II улиралтай харьцуулахад 14 хувиар өсжээ. Мөн тус улиралд 130,799 унц алт олборлосон нь өмнөх оны мөн үеийнхээс 14 хувиар өссөн байна.

          Тэгвэл III улирлын нийт орлого нь 622.8 сая ам.доллар болсон нь 135.6 хувиар өссөн сайн үр дүн үзүүлсэн аж. Энэ талаар “Turquoise Hill Resources” компанийн гүйцэтгэх захирал Стив Тибоулт “Оюутолгой”-н хамт олон цар тахлын үед үүсээд байгаа хүнд нөхцөл байдалд байгаа ч, 2021 онд гүйцэтгэх үйлдвэрлэлээ алдалгүй үргэлжлүүлж байна. 2021 оны долдугаар сараас эхлэн гүний үйлдвэрлэл эхлүүлэх техникийн бэлтгэл ажил дуусаж, бэлэн болсон” талаар өгүүлсэн байна.

-ОЮУТОЛГОЙН ЗЭСИЙН УУРХАЙН ӨРГӨТГӨЛИЙН АЖИЛ УДААШИРЧ, ЗАРДАЛ НЬ ӨСӨХ ХАНДЛАГАТАЙ БАЙНА-

          Сүүлийн хоёр сар гаруйн хугацаанд олон улсад үргэлжилж байгаа эрчим хүчний хомстол, хямралтай холбоотойгоор зэсийн нийлүүлэлт удааширч байгаа. Тэгвэл үүнд Оюутолгойн зэсийн уурхайн өргөтгөлийн асуудалд нөлөөлж байгаа талаар дэлхийн томоохон эдийн засагчид онцолжээ. Үүнд “Рио Тинто” группын үйл ажиллагаа явуулж байгаа Оюутолгой зэсийн уурхайн өргөтгөлийн ажил удааширч, зардал нь өсөх хандлагатай байгааг анхааруулсан юм. Мөн үүнтэй холбоотойгоор “Оюутолгой” ХХК-ийн дийлэнх хувьцааг эзэмшигч “Рио Тинто” группын мэдэлд байдаг “Turquoise Hill Resources” компанийн хувьцаа өнгөрсөн сард 15 хувиар унасан.

-2023 ОНЫ ЭХНИЙ ХАГАСААС ОЮУТОЛГОЙД ГҮНИЙ УУРХАЙН АНХНЫ ТОГТВОРТОЙ ҮЙЛДВЭРЛЭЛ ЭХЛЭХ БОЛОМЖТОЙ-

          “Рио Тинто” компаниас “Оюутолгой” төслийн гүний уурхайн бүтээн байгуулалтын ажил удаашрах эрсдэлтэй байгаа талаар мэдэгдэл гаргасан билээ. Уг мэдэгдэлд

“Оюу Толгой” ХХК-ийн ТУЗ “Оюутолгой” төслийн далд уурхайн бүтээн байгуулалтад шаардлагатай нэмэлт төсвийг энэ сард багтааж батлахгүй бол “Оюутолгой” төслийн гүний уурхайн ажил удаашрах эрсдэлтэй байна. “Turquoise Hill Resources” компанийн хамгийн сүүлчийн мэдээллээр 2023 оны эхний хагасаас гүний уурхайн анхны тогтвортой үйлдвэрлэл эхлэх боломжтой байгаа” талаар мэдэгдсэн юм.

          2016 онд батлагдсан ТЭЗҮ-д гүний уурхайн зардал 5.3 тэрбум ам.доллар, ашиглалтад орох хугацаа 2021 оны нэгдүгээр сар гэж тусгасан. Гэсэн ч гүний уурхайн зардал 1.45 тэрбум ам.доллароор өсөж, хугацаа 2022 оны аравдугаар сар болж хойшлоод байна. Аравдугаар сарын 15-нд хугацаа нь дахин гурван сараар хойшилж байгааг “Рио Тинто” компаниас мэдэгдсэн юм.