Эргэлт.мн мэдээллийн сайт “Орон нутгийн сонгууль-2024”-ийг угтан аймаг, дүүргийн удирдлагууд дөрвөн жилийн хугацаанд хэрхэн ажилласан, ашиг сонирхлын зөрчил үүсгэсэн эсэх талаарх баримтыг цувралаар хүргэж буй. Тэгвэл энэ удаагийн дугаарт Сэлэнгэ аймгийн удирдлагуудыг онцоллоо. Тодруулбал, тус аймгийн Засаг дарга Н.Лхагвадорж болон ИТХ-ын төлөөлөгч Ж.Отгонхүү нарын мод үржүүлгийн бизнесээ хэрхэн цэцэглүүлж, төрийн тендер түүж байгаа талаарх зарим баримтыг хүргэе.

СЭЛЭНГЭ АЙМГИЙН ЗАСАГ ДАРГА Н.ЛХАГВАДОРЖИЙН БИЗНЕСИЙН ТҮҮХ

       Сэлэнгэ аймгийн Засаг дарга Ш.Оргил эрүүл мэндийн шалтгаанаар 2021 онд өөрийн хүсэлтээр албан үүргээсээ чөлөөлөгдснөөр Нацагдоржийн Лхагвадорж Засаг даргаар томилогдсон. Сэлэнгэ аймгийн Мандал сумын уугуул, эрх зүйч мэргэжилтэй. 2009 оноос Мандал сумын ИТХ-д төлөөлөгчөөр сонгогдож, Мандал сумын НАМЗХ-ын дарга, НАМЗХ-ын бага хурлын гишүүн, 2012-2017 Мандал сумын МАН-ын хорооны тэргүүлэгч, Сэлэнгэ аймгийн МАН-ын хорооны гишүүн, Мандал сумын МАН-ын хорооны дарга, Сэлэнгэ аймгийн ИТХ-ын төлөөлөгч, тэргүүлэгч гэх сонгуульт албан тушаалд томилогдож байсан намтартай. 2016- 2020 онд Сэлэнгэ аймгийн Мандал сумын Засаг даргаар ажиллаж байжээ. Үүнээс өмнө тэрбээр УИХ-ын гишүүн Ж.Эрдэнэбатын

      Тэрбээр улс төрд орохоосоо өмнө “Жарвай” мод үржүүлгийн компани байгуулж, ерөнхий захирлаар ажиллаж байсан. “Жаврай” ХХК нь Сэлэнгэ аймгийн Мандал сумандаа буюу Зүүнхараад ойн цэвэрлэгээ хийж хорих ангиудад түлээний мод нийлүүлдэг, хөрөө рам ажиллуулдаг, тарьц, суулгацны үржүүлэг хийдэг юм байна. Мөн Сэлэнгэ аймгийн Мандал суманд Жаврай ХХК-ийн захиалгаар есөн давхар гурван блок “Шинэ Мандал-2” хотхны ажлыг эхүүлсэн. Үүнээс гадна бетон зуурмагийн үйлдвэр ажиллуулж 40 айлын орон сууцны хотхон барьсан, “Баян суудал” амралтын баазтай гэх мэтээр бүх л салбарт үйл ажиллагаа явуулдаг. Н.Лхагвадорж 2016 онд Мандал сумын Засаг дарга болсноосоо хойш “Жаврай” ХХК-аа төрсөн дүү Н.Отгонбаярынх нь нэр дээр байдаг боловч Н.Лхагвадоржийн эхнэр Т.Жаргал нь удирддаг ажээ.

Улмаар Сэлэнгэ аймгийн Засаг дарга Н.Лхагвадоржийн хамаарал бүхий “Жаврай” ХХК нь “Тэрбум мод” үндэсний хөдөлгөөнп тарьц, суулгац нийлүүлэхээр 100 мянган ширхэг суулгацны гэрээг байгуулсан байдаг. 2022 онд 49 мянган суулгацыг нь нийлүүлсэн гэх тоон мэдээлэл байна. Тэгвэл “Жаврай” ХХК-ийн түлээний мод дүнз нийлүүлэх тендерт шалгарсан баримтыг хүргэе.

Тодруулбал,

• УБТЗ ХНН-ийн Дэр мод үйлдвэрлэх зориулалттай сумын дүнз худалдан авах тендер-737 сая төгрөг
• УБТЗ ХНН-ийн Дэр мод үйлдвэрлэх зориулалттай сумын дүнз худалдан авах тендер-380 сая төгрөг
• Дэр мод дүнз нийлүүлэх 395 сая төгрөгийн тендер
• Дэр модны дүнз нийлүүлэх 220 сая төгрөгийн тендерт шалгарсан байна.

СЭЛЭНГЭ АЙМГИЙН ИТХ-ЫН ТӨЛӨӨЛӨГЧ Ж.ОТГОНХҮҮГИЙН ТЕНДЕР ТҮҮСЭН ТҮҮХ

     Сэлэнгэ аймгийн ИТХ-ын төлөөлөгч Ж.Отгонхүү мөн л мод үржүүлгийн компаниараа төрийн тендер түүж, түрүйвчээ зузаатгаж байгаа нэгэн аж. Ж.Отгонхүү нь МУИС-ийг төгсмөгцөө Сэлэнгэ аймгийн Засаг даргын Тамгын газарт мэргэжилтэн болж, удалгүй тушаал дэвшин УДББОБЗХ-ийн дарга, ХБХ-ийн дарга, ГХБХБГ-ын дарга, Сэлэнгэ аймгийн мэргэжлийн хяналтын газрын даргаар тус тус томилогдсон гэх товч намтартай. Түүний аав Б.Жамсран Тужийн нарсыг байгуулсан гавъяат ажилтан, ойн инженер гэдгээр нь олон нийт сайн мэднэ. Ж.Отгонхүүгийн хувьд аав Б.Жамсрангийн хамт “Ойн ан төв” мод үржүүлгийн газрыг эзэмшдэг хэмээн хөрөнгө орлоготоо мэдүүлсэн байна.

       “Ойн ан төв” компани нь мөн л “Тэрбум мод” төслийн хүрээнд тарьц суулгац нийлүүлэх жагсаалтын эхний 20-т эрэмбэлэгдсэн байна.

        Түүнчлэн Тэрбум модны тарьц суулгах нийлүүлэх жагсаалтад Жамсрангийн Наранчимэгийн “Ойн хүрэм” компани мөн багтсан байна. Угтаа бол Ж.Отгонхүүгийн төрсөн эгч мөн л мод үржүүлгийн бизнестэй гэсэн үг. Судлаад үзвэл Ж.Наранчимэгийн “Ойн хүрэм”, Ж.Отгонхүүгийн “Ойн ан төв” хоёр компани Сэлэнгэ, Сүхбаатар, 4-р баг, Баянхаан, 1 гэх хаяг дээр хамт бүртгэлтэй юм байна. Ингэхдээ тэд “Ойн хүрэм” компаниараа дамжуулж, төрийн тендерийг түүдэг байна. Тодруулбал,

• Мандал сумын ойжуулалт хийх-33 сая төгрөг
• Ерөө сумын ойн сангийн талбайн 58 дугаар хэсэглэлийн 60га талбайд ойжуулалт хийх-240 сая
• Мандал сумын ойн сангийн талбайн 49 дүгээр хэсэглэлийн 50 га талбайд ойжуулалт хийх-240 сая
• Ерөө сумын ойн сангийн талбайн 60 дугаар хэсэглэлийн 70га талбайд ойжуулалт хийх-240 сая
• Гачууртын амны ойд шилмүүст, навчит модны суулгацаар ойжуулах-160 сая
• Мандал сумын 30 га-д ойжуулалт хийх-173.8 сая
• Баруунбүрэн сумын 50 га-д ойжуулалт хийх-173.8 сая
• Алтанбулаг сумын 80га-д ойжуулалт хийх/10,12 хэсэглэл/-173.8 сая
• Мандал сум, Шаржалга-I /50га / хамгаалалтын ойн зурвас байгуулах -129 сая
• Мандал сум, Шаржалга-2 /50га / хамгаалалтын ойн зурвас байгуулах -129
• Мандал сум, Шаржалга-3 /60га/ хамгаалалтын ойн зурвас байгуулах -192 сая
• Орхон сум хамгаалалтын ойн зурвас байгуулах- 225 сая
• Орхонтуул сум хамгаалалтын ойн зурвас байгуулах -225 сая төгрөгийн тендерт тус тус шалгарсан байна.

        Сэлэнгэ аймгийн ИТХ-ын хурлын төлөөлөгч Ж.Отгонхүүгийн хамаарал бүхий этгээдийн компани тендерийг ингэж түүдэг. Түүний балаг ингээд зогсохгүй. Тодруулбал, Сэлэнгэ аймгийн Засаг дарга асан Ш.Оргил ЦЕГ-ын Санхүү, аж ахуйн газарт хэлтсийн дарга асан, хурандаа А.Энхбат, ИТХ-ын төлөөлөгч Ж.Отгонхүү нар иргэдийн хууль бусаар түүсэн их хэмжээний дэрвэгэр, жиргэрүү ургамлыг хурааж авсан. Тэгмэгцээ хурааж авсан дэрвэгэр жиргэрүү ургамлаа хамаарал бүхий этгээддээ хямд үнээр худалдан борлуулж, худалдан авсан хамаарал бүхий этгээд нь цааш нь хятадуудад өндөр үнээр дамлан худалдаалж ашиг олсон гэх хэргээр хуулийн байгууллагад шалгуулж байлаа.