Хоёр сайдын хувь, хувьсгалын амьдрал, хүүхэд насны дурсамжид нь ижил зүйлс их олон бий. Ерөөс үл хагацах хувь заяатай гэмээр. Тухайлбал, Х.Нямбаатар, Л.Оюун-Эрдэнэ хоёрын хэн хэн нь Улаанбаатар хотод төрсөн боловч мөн хэн хэн нь аав, ээжийгээ дагаж Бэрх тосгонд очиж суурьшин, хөршүүд болсон ижил түүхтэй. Тухайн үед Х.Нямбаатарын аав нь Бэрх тосгоны жоншны уурхайд жолооч, ээж нь нягтлан байсан бол Л.Оюун-Эрдэнийн аав, ээж хоёр ч мөн тус уурхайд ажилладаг байсан гэх. Мөн Х.Нямбаатарын өвөө нь эх баригч бол Л.Оюун-Эрдэнийн өвөө нь лам байсан бөгөөд нэг нь шашны, нөгөө нь шинжлэх ухааны л гэхээс адилхан л хүн зоны төлөөх ажилтай хүмүүс байжээ. Түүнчлэн, Х.Нямбаатар, Л.Оюун-Эрдэнэ хоёрын хэн хэн нь өвөө амьтай, тэгсэн атлаа хавь ойрдоо л дүрсгүйгээрээ “зартай” хүүхдүүд байсан гэдэг. Л.Оюун-Эрдэнийн өвөө нь Х.Нямбаатарын аавд их сайн, толгой сайтай, гүйлгээ ухаантай гэж магтдаг байсан гэлцдэг юм билээ. Хамт шахуу нүүж очиж, хамар хашаанд амьдарч, хаашаа л явна дагадаг байсан дүү нь хожим Ерөнхий сайд, халцарсан өвдгийг нь үлээж өгдөг асан ах нь Хууль зүйн сайд болчихсон явна гэхээр сонирхолтой бөгөөд салшгүй хувь заяа мөн биз дээ.

Эсвэл “Бэрх тосгоны үеэл хөвгүүд улс төрд яаж томрохыг харуулъя” гэж хоорондоо гар барилцаж, харилцан нэгнээ дэмжиж байсан ч байж болох, мэдэхгүй. 

Ингэж хэн нь ч илүү биш, дутуу биш эрх мэдэл, албан тушаал хүртэж явсаар “Үеэлүүдийн үл хагацах хувь заяа” 2016 оны сонгуулиар албан ёсоор огтлолцож, тэд УИХ-ын гишүүн болцгоосон. Хүүхэд ахуйдаа хэн хэн нь өвөөдөө амь байсан шигээ гишүүн болмогцоо тэд нэгэн зэрэг намын дарга М.Энхболддоо амь болсон. Хүндлэлийн хоймортоо намын даргыгаа залчихсан, хэн хүнд магтаж, сайрхаж явсан тэд бас нэгэн зэрэг үзэл бодлоо хувиргаж, намын даргыгаа зүхэж эхэлсэн. Ингээд Бэрх тосгоны ахан дүүс гар нийлж “МАНАН дэглэмийн эсрэг тэмцэл” гээч нүсэр жагсаалыг удирдан зохион байгуулж, аядуу зөөлөн нь дэндсэн намын даргыгаа унагааж байв. Хайрлах, үзэн ядах нь хүртэл ийм ижилхэн байхад “Үеэлүүдийн үл хагацах хувь заяа” гэхгүй яах юм бэ.