Нийслэлчүүд дүүжин тээврээр зорчих нь үлгэр болсон уу, ХОТЫН ДАРГА АА

Б. Бадралмаа:
Улс төр- Тэрслүү үг

2021-04-27, 1199

Үе үеийн хотын дарга амлалтдаа хүрдэг байсан бол өдийд Улаанбаатар хотын иргэд дүүжин бүхээгээр зорчиж, хурдан галт тэргээр очих газраа саадгүй хүрдэг гээд нийслэлчүүд жаргаж байхаар байлаа. Гэвч дарга нарын амлалт, хөрсөн дээрээ буудаггүй, цаасан дээр төсөл болоод л замхарчихдаг сул талтай.

Хамгийн сүүлд гэхэд л Нийслэлийн Засаг дарга бөгөөд Улаанбаатар хотын захирагч асан, одоогийн Шадар сайд С.Амарсайхан нийслэлийн түгжрэл бууруулахад хамгийн зөв шийдэл нь дүүжин гүүр буюу “Cable car” төсөл хэмээж байлаа. Түүний хэлснээр Баянхошуу, Ханын материалаас III, IV хорооллын эцэс хүртэлх 4.9 км замыг иргэд дүүжин бүхээгээр туулах бөгөөд ингэхдээ Баянхошууны тойрог, Ханын материал, Гэмтэл, согог судлалын үндэсний төв гэсэн гурван буудалтай. Нийт 157 кабинаар иргэд үйлчлүүлж, Ханын материалаас III, IV хороолол хүртэл 16 минут орчим зорчино гэх тооцоолол гаргаад байв.

Харин урд шугам буюу Долоон буудал-Дарь эх-Сансарын тойрог хүртэлх 2.9 км замтай байх бөгөөд нийт 78 кабинаар үйлчилнэ. Туулах хугацаа найман минут байна гэж байлаа. Улмаар нийслэлийн Засаг дарга С.Амарсайхан тухайн үед А/198 дугаартай захирамж гаргаж, ажлын хэсэг томилогдсоноор төслийн бэлтгэл ажлыг эхлүүлсэн билээ.

Төслийг агаарын дүүжин тээврийн технологиор дэлхийд тэргүүлдэг Францын “ПОМА” компани хэрэгжүүлнэ гээд хоёр тал гарын үсэг зуралцаж байсан удаатай. Энэ төслийн нийт зардал нь 60.7 сая евро буюу 180 орчим тэрбум төгрөг болох тооцоо гаргаж, Францын Засгийн газрын газрын хөнгөлөлттэй зээлийн хүрээнд санхүүжилтээр шийднэ. Франц Улсын тал үндсэн зээлийн төлөлтөөс 12 жил чөлөөлөх нөхцөлтэйгээр 60.7 сая еврогийн зээлийг олгох бөгөөд хөнгөлөлттэй зээл нь жилийн 0.07 хувийн хүүтэй, 40 жилийн хугацаатай байхаар тооцсон байдаг. Ингээд төслийг хоёр чиглэлийн агаарын замыг 1.5-1.6 жилийн хугацаанд барих боломжтой хэмээгээд байсан.

Гэвч өдгөө энэ төслийн сураг тасарч, хаана ямар ажил хийж байгаа нь тодорхойгүй болжээ. Тэр бүү хэл энэ төслийн ТЭЗҮ-ийг 2020-2021 ондоо багтааж боловсруулна гэсэн тооцоолол гаргаж, хөрөнгө мөнгө зарцуулаад байсан ч одоо ор тас мартагджээ. Сүхбаатарын талбайд дүүжин бүхээгний загварыг танилцуулж, өнөө маргаашгүй хэрэгжүүлнэ хэмээж байсан ч өнөөдөр талбайд байрлуулсан мөнөөх бүхээг нь ч байхгүй болжээ. Хотын даргын ажлыг хүлээж авсан шинэ хотын дарга Д.Сумъяабазар дүүжин бүхээгний талаар А гэж ганц дуугарсангүй. Энэ байдлаараа бол мөнөөх хотынхоо дээгүүр дүүжин тээврээр зорчих нь “Улаанбаатар метротой болно” гэдэг шиг мянгуужингийн замаар оров бололтой.

Үүнийг Нийслэлийн Зам, тээврийн асуудал хариуцсан төслүүдийн удирдагч Б.Одсүрэнгээс “Энэ төслийг би сайн мэдэхгүй. Ковидын нөхцөл байдлын үед бүгд амарчихсан байгаа. Маш нарийн ажил байдаг юм шүү. Миний хариуцсан ажил биш” гэх тайлбар өгч байх жишээтэй. Эндээс дүүжин тээврийн хэрэгслийг Монголд нэвтрүүлэх ажлыг Д.Сумъяабазар үргэлжлүүлэхгүй нь тодорхой харагдаж байна. Өөрөөр хэлбэл, дүүжин гүүртэй болно гэдэг нь сонгуулийн өмнөх шоу байсан нь тодорхой боллоо.

Энэ жил цар тахлын нөхцөл байдлаас шалтгаалж, хатуу хөл хорио дэглэмд шилжсэн тул хотын даргын чихнээс холуур өнгөрсөн сэдэв нь түгжрэлийн асуудал байлаа. Гэвч энэ хэвээрээ нийслэлд хөл хорио тогтоож, иргэдийн хөдөлгөөнийг бүрэн хязгаарлачихгүй нь тодорхой. Тиймээс л энэ асуудлыг байнга анхаарч гарц гаргалгааг шийдэх нь нэн тэргүүний асуудал баймаар.

Харамсалтай нь, нийслэлд хөл хорио энэ хэвээр үргэлжлэх юм шиг хотын удирдлагууд нүдэн балай чихэн дүлий сууцгаах болжээ. Сургууль, цэцэрлэг хэвийн ажиллаж, амьдралын хэвийн горимдоо шилжихэд асуудлууд ар араасаа ундарч эхэлнэ гэдгийг нэг нь ч тооцоолоогүй сууцгааж байх. Уг нь түгжрэлийг шийдэх олон гаргалаа ярьж, шинэ санаа, дэвшилтэт технологи нэвтрүүлнэ гэж байсан нь саяхан. Хэрвээ ярьсан нь хөрсөн дээр бууж, дэвшилтэт нийтийн дээвэр нэвтэрчихсэн байсан сан бол ковидын энэ хүнд үед хэрэг болохоор байжээ. Үе үеийн хотын дарга нарын амласан метро, цахилгаан галт тэрэг, дүүжин бүхээг Монголд нэвтэрчихсэн байсан бол өдийд авто машины QR код, нийтийн тээврийн цагийн хуваарь гэж мунгинахгүй л байх байлаа.

Нийслэлчүүд дүүжин тээврээр зорчих нь үлгэр болсон уу, ХОТЫН ДАРГА АА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2021-04-28 23:43:11

Зочин: дүүжин тээвэр монголд тохирно. Монголд сүртэй салхи байхгүй.

Шинэ мэдээ

Нийтлэлчид