У.Хүрэлсүх улиран сонгогдсонтойгоо нийлээд Монгол Улсын Ерөнхий сайдаар 3.3 жил ажилласан. У.Хүрэлсүхийн Засгийн газар Улаанбаатарыг утаагүй болгох, “Эрдэнэт үйлдвэр”-ийг төрийн өмчид эргүүлэн авах, “Чингис” бондын 500 сая ам.долларын гадаад өрийг барагдуулахад идэвхтэй ажиллаж байснаараа тэр дундаа Ерөнхий сайдынхаа хүсэлтээр Засгийн газар бүрэн бүрэлдэхүүнээрээ огцорч байснаараа дурсагдаж үлджээ. Харин өдгөө Засгийн газрын хэрэгжүүлж буй ажлуудаас У.Хүрэлсүхийн Засгийн газрын эхлүүлсэн томоохон ажлуудаас хэд хэд нь “цох” дутаж байх юм. Эхлүүлсэн, дараагийн Засгийн газартаа үлдээсэн тэр ажлуудаас ганцыг ч хийхгүй байгаа нь одоогийн Засгийн газар “Эсэргүүцэж байгаа”-г харуулж байна.

-У.ХҮРЭЛСҮХИЙН ЗАСГИЙН ГАЗРЫН ЭХЛҮҮЛСЭН ГАЦААНД ОРСОН АЖЛУУД-

Үндэсний урлагийн их театр

         Ерөнхийлөгч У.Хүрэлсүх Ерөнхий сайдаар ажиллаж байхдаа захирамж гаргаж, Үндэсний урлагийн их театрыг барих асуудлыг судлах Ажлыг хэсэг гаргаж байв. Ажлын хэсгийг Барилга, хот байгуулалтын сайд асан Б.Мөнхбаатар, Соёлын сайд асан С.Чулуун нар ахалж, зураг төслийн ажилтай танилцсан байдаг. Зөвхөн Үндэсний урлагийн их театр барихаар төлөвлөж, 160 гаруй айлын газрыг чөлөөлсөн. Гэсэн ч орчин үеийн шаардлагад нийцсэн, шинэ техник, технологиор хангагдсан, үндэсний онцлог бүхий интерьер шийдэлтэй, урлаг, уран сайхны цогцолбор арга хэмжээ зохион байгуулах нөхцөл хангагдсан Үндэсний урлагийн ордон байгуулах У.Хүрэлсүхийн Засгийн газрын ажил одоо “гацаа”-нд орчихоод байгаа юм.

Төв цэвэрлэх байгууламжийг шинэчлэх

             У.Хүрэлсүхийн Засгийн газрын эхлүүлсэн хамгийн том ажлуудын нэг нь Төв цэвэрлэх байгууламжийг шинэчлэх ажил. Бүр прокурорын байгууллагаас муу дүн тавиад байсан Төв цэвэрлэх байгууламжид тухайн үеийн Засгийн газар бүрэн бүрэлдэхүүнээ очиж, нөхцөл байдалтай танилцаж, Засгийн газрын хуралдаанаар Улаанбаатар хотын Төв цэвэрлэх байгууламжийг шинэчлэх ажлыг эхлүүлсэн. Ажлын хэсгийг Барилга, хот байгуулалтын сайд асан Х.Баделханаар ахлуулж, Засгийн газар нь БНХАУ-ын “Экзим” банкнаас 300 сая ам.долларын зээл авч, бүтээн байгуулахаар яригдаж байв. Тэгвэл өдгөө бараг л “байгуулагдчихсан” Төв цэвэрлэх байгууламжийн сураг тасарчээ...

Газрын тос боловсруулах үйлдвэр

                У.Хүрэлсүхийн Засгийн газрын эхлүүлсэн, хамгийн их олны анхаарал татсан ажил нь Монголд газрын тос боловсруулах үйлдвэр барих ажил. Тус ажлыг 2017 онд эхлүүлж, “Монгол газрын тос боловсруулах үйлдвэр” байгуулж, 70 гаруй инженер, техникийн ажилтантай, нийт ажилтны 50 гаруй хувь гаднын оронд боловсрол эзэмшсэн, мэргэжлийн хүмүүсийг гаргаж, ажиллуулж байв. У.Хүрэлсүх Ерөнхий сайд байхдаа ч түүний Засгийн газрын гишүүд ч Дорноговь аймгийн Алтанширээ суманд байгуулагдах газрын тос боловсруулах үйлдвэрийн хэд хэдэн удаа очиж, танилцсан, ам сайтай байсан үе олон. У.Хүрэлсүхийн Засгийн газар бүрэн бүрэлдэхүүнээрээ огцроход “Монгол газрын тос боловсруулах үйлдвэр”-ийн ажил үндсэн технологийн 12 байгууламж, дагалдах байгууламж, дагалдах байгууламж, дэд бүтэц, үйлдвэр хотхон зэргээс бүрдэх төслийн ажил идэвхтэй явагдаж, бүтээн байгуулалт эхэлсэн байв. Тийм ч учраас У.Хүрэлсүх Ерөнхий сайдын хувиар тус газарт очиж ажиллахдаа “Монгол газрын тос боловсруулах үйлдвэр” 2023 онд ашиглалтад орж, жилд 1.5 сая тонн газрын тос боловсруулахыг мэдэгдэж байлаа. 22 жил гацаанд байсан газрын тос боловсруулах үйлдвэр шаваа тавьсанаас хойш хоёр жилийн дотор “биежсэн” ч одоо Засгийн газрын үед бүтээн байгуулалт нь зогсож, энэ жил ашиглалтад орох хуваартай байсан ч хэзээ ашиглалтад орох нь тодорхойгүй хэвээр байна.

Энэ мэтээр дурдвал У.Хүрэлсүхийн Засгийн газрын эхлүүлсэн ажил олон. Баруун аймгуудыг хатуу хужилттай замаар нийслэлтэй бүрэн холбох ажлаас эхлээд Тавантолгой ордын IPO гаргах ажил ч эхлүүлж байлаа. Гэсэн ч одоогийн Засгийн газрын үед У.Хүрэлсүхийн эхлүүлсэн бүх л ажил зогсож, “гацаа”-нд орчихоод хэрэгжиж байгаа юм алга. Эхлүүлсэн ажлаас нь ганцыг ч хэрэгжүүлэхгүй байхыг бодоход Л.Оюун-Эрдэнийн Засгийн газар “ах” нараа эсэргүүцэж байгаа бололтой.