Ард түмэн бурхан болоочийн шарил ачсан буяны хөсөгтэй таарахдаа цэрвэхээ ч больж байна, бараг. Түгжрэл дунд яг зэрэгцэж зогсоод, яах ч аргагүй хэсэгтээ тэндээ гацчихвал л “Нэг нь бурхан болж дээ, хөөрхий” гэж зурвас бодоод, бурхны зургаан үсгийг бувтнасан болоод, тэрнээс цааш хэтрэхээ больцгоож байна. Ийм болтол л үхэлтэй дасгалаа, энэ төр засаг. Хөөрхий хэдэн хөгшид нь цар тахлын халдвараар өдөрт 10, 15-аараа “өнхрөөд” өгч байна. Архаг хууч өвчтэй, ахмадуудаа бүгдийг нь нас барахаас нь өмнө ямар нэг арга хэмжээ авахгүй юм уу. Айж, аргаа барсан иргэд өөрсдөө “Хоёр хөгшиндөө халдвар аваад оччихвол төвөг, мэнд л сууцгааж байвал” гэцгээж, аав, ээждээ очихоо ч больцгоосон байна. Утсаар ярьж мэнд мэдээд, унд хоолтой л бол гэрээсээ бүү гар гэж аминчлан захидаг л болж. Үр ач нь эргэж тойрч бужигнахаа байчихаар үр хүүхэдгүй, эсвэл амьдын хагацал үзсэн аятай л сууцгаадаг болсон байна.

          Хөөрхий ахмадууд, энэнээс өөрөөр өөрсдийгөө яаж хамгаалах юм бэ. Цар тахал хөгшдийг ч биш хорь шүргэж яваа залуусыг ч хайргүй авч одож байна. Өнгөрсөн жилийн өдийд их сургуулийн оюутан болчихсон гээд их л додигор хөөрч явсан залуу энэ жил хичээлдээ очоогүй, хэзээ ч очихгүй. Халдвар авсан, хавьтлуудтайгаа тусгаарлагдсан, хүндэрсэн, хэд хоногийн дараа амьсгал хураасан. Хорь нас хүрэх гэж явсан залуу ингэж амьдралынхаа сүүлийн өдрүүдийг халуурч, ханиалгаж өнгөрүүлсэн. Хайран, бас хэтэрхий харамсалтай биш гэж үү. Дундаж насныханд ч ялгаагүй, явсан газар, татсан бариул бүрд халдвар байгаа гэж бодохоор ямар байдаг гэж бодно. Гэрээс гарахгүй, гэдэс алдахгүй суугаад байх санхүүгийн эрх чөлөө бидэнд бий бил үү, гарч, орж, ажиллаж л таарна. Амны хаалтаа давхарлаж зүүгээд, аюул холуур гэж залбираад байхаас сонголтгүй. Гай болж, халдвар авчихвал салан задгай, замбараагүй бөөгнөрдөг иргэдийн өөрсдийнх нь буруу гэнэ. 

 

           Засгийн газар, Ерөнхий сайд, Шадар сайд нь иргэдээ тоохгүй, үнсэнд хаясан шалз шиг хөсөр хаячихсан, сүүлдээ Эрүүл мэндийн яам нь хүртэл “Хууч өвчтэй байсан, халдвартай хавсарсан юм гэнэ лээ” гэх маягтай, үхсэн хүмүүсээ тоохоо ч байлаа. Шадар сайд С.Амарсайханаас дахиад асууя, Өдөрт 20 хүн шатаах зууханд шатаагдаад, 20 гэр бүл шар модон хайрцагтай чандар тэврээд хоцорч байгаа нь харамсалтай биш байна уу.