• Өнөөдөр 2026-09-06

Х.БАТТУЛГА ЭРХ БАРИГЧ МАН-ЫН ЭСРЭГ 17 УДАА ХОРИГ ТАВЬЖ, 14-Т НЬ АМ РУУГАА "АЛГАДУУЛЖЭЭ"

2021-05-01,   1206

             -ЕРӨНХИЙЛӨГЧ Х.БАТТУЛГА УИХ-ААС БАТАЛСАН ХУУЛЬ, ШИЙДВЭР ТОГТООМЖИД 17 УДАА ХОРИГ ТАВЬСАН Ч УИХ ЕРДӨӨ ГУРВЫГ НЬ Л ХЭСЭГЧИЛСЭН БАЙДЛААР ХҮЛЭЭН АВЧЭЭ. ӨӨРӨӨР БОЛ, Х.БАТТУЛГА МАН-ЫН ЭСРЭГ ХҮЧТЭЙ "ТОГЛОГЧ" БАЙЖ ЧАДАХГҮЙ БАЙСААР БҮРЭН ЭРХЭЭ ДУУСГАЖ БАЙНА-

             Х.Баттулга Ерөнхийлөгч болсон цагаасаа УИХ-аас гаргасан хууль, шийдвэр, тогтоомжид нийтдээ 17 удаа хэсэгчлэн болон бүхэлд нь хориг тавьжээ. Харамсалтай нь, МАН-аас бүрэлдсэн УИХ Ерөнхийлөгчийн 17 хоригийн ердөө гурвыг нь хүлээн авсан бол, бусдад нь татгалзсан хариу өгч буцаасан байна. Товчхондоо, Ерөнхийлөгч Х.Баттулга бүрэн эрхийнхээ хугацаанд эрх баригч МАН-ын эсрэг хэчнээн зогсоод ч хүчин мөхсөджээ. 
 
           Ерөнхийлөгч Х.Баттулга хамгийн сүүлд Үндсэн хуулийн цэцийн Дунд суудлын хуралдааны 02 дугаар дүгнэлтийг хүлээн зөвшөөрсөн УИХ-ын дөрөвдүгээр сарын 22-ны өдрийн 38 дугаар тогтоолд бүхэлд нь хориг тавьсан. Тодруулбал, “Өмнөх болон одоогийн Ерөнхийлөгч дахин нэр дэвших нь Үндсэн хууль зөрчинө” гэсэн Үндсэн хуулийн цэцийн дүгнэлтийг УИХ олонхоороо хүлээн зөвшөөрч, тогтоол гаргасныг Х.Баттулга эсэргүүцэж, хориг тавиад байсан юм. Энэ бол Х.Баттулгын Ерөнхийлөгчийн сонгуульд дахин нэр дэвших боломжоо авч үлдэх эцсийн арга нь, эрх мэдлийнхээ хүрээнд хийж чадах эцсийн эрх хэмжээ нь байсан юм.  
 
            Ерөнхийлөгчийн энэхүү хоригийг  УИХ-ын чуулганы пүрэв гарагийн хуралдаанаар хэлэлцэж, хүлээж авах боломжгүй хэмээн үзсэн. Ингэснээр Ерөнхийлөгчийн сонгуулийн тухай хуульд “одоогийн болон өмнөх Ерөнхийлөгчийг дахин Ерөнхийлөгчийн сонгуульд нэр дэвшүүлэх боломжгүй” хэмээх шинэ заалтыг УИХ дахь олонхын бүлэг ердөө долоохон минутын дотор оруулаад баталчихсан. Ерөнхийлөгч Х.Баттулгын хамгийн сүүлийнх байж мэдэх хориг нь ингээд УИХ-д нөлөө үзүүлж чадсангүй. 

            Ерөнхийлөгчид зарим шүүгчийг томилох, төрийн дээд одон медаль олгох, уучлал үзүүлэх, УИХ-д хүсэлт гаргах, УИХ-аас баталсан хууль, тогтоомж, шийдвэрт хориг тавих гэсэн цөөн бөгөөд хуулиар олгогдсон эрх мэдэл бий. Эдгээр нь Ерөнхийлөгчийн УИХ-тай тэмцэж болох зэвсэг нь. Бусдаар бол Ерөнхийлөгч нь улс орны аюулгүй байдал, ард түмний эв нэгдлийн бэлгэдэл бүхий л албан тушаал гэдэг нь Х.Баттулгын бүрэн эрхт хугацаанаас харагдав. Өөрөөр хэлбэл, эхэнд дурдсанчлан Ерөнхийлөгч Х.Баттулгын хувьд хориг тавих эрх мэдлээ эрх баригч МАН-ын эсрэг 17 удаа ашигласан боловч, ердөө гурав нь л хэсэгчилсэн байдлаар дэмжигдсэн байна.

Ингээд харвал, Х.Баттулга хориг тавих эрх мэдлээ өөрт ашигтайгаар ашиглаж  МАН-ын эсрэг хүчтэй “тоглогч” байж чадсангүй.  

Товчхондоо, тэр хоригоороо МАН-д нэг ч удаа мад тавьж чадалгүй, эсрэгээрээ өөрийнхөө гадаад дахь оффшор, тойрон хүрээлэгчдийнхээ балаг, мөнгө угаалт, шүүх засаглалд бий болгосон сүлжээ зэргээ дэлгүүлсээр, хэдхэн хоногийн дараа бүрэн эрхийг хугацаагаа дуусгах гэж байна. Цаашид ер нь "хориг тавих" гэдэг эрх мэдэл Ерөнхийлөгчид байгаад хэрэг байна уу. Ялангуяа сөрөг хүчний Ерөнхийлөгчид энэ эрх мэдэл байлаа ч олонхоороо бүрдүүлсэн УИХ нь хүлээж авахгүй, огт тоохгүй гэдэг нь Х.Баттулгын бүрэн эрхийн хугацаанаас илэрхий харагдсан биз ээ. 

 
Өнгөрсөн хугацаанд Ерөнхийлөгч Х.Баттулга МАН-ын олонхоороо бүрдүүлсэн УИХ-ын эсрэг тавьсан 17 хоригийг танилцуулж байна. 
 
2017 оны аравдугаар сарын 26. Засгийн газрын гишүүдийг томилох тухай УИХ-ын 58 дугаар тогтоолд хэсэгчлэн хориг тавьсан. Тодруулбал, Сангийн сайдаар Ч.Хүрэлбаатарыг томилохыг хориглосон ч хүлээж авахаас татгалзсан. 
 
2017 оны арваннэгдүгээр сарын 2. Монгол Улсын 2017 оны төсвийн тухай хуульд өөрчлөлт оруулах тухай хууль болон Нийгмийн даатгалын сангийн 2017 оны төсвийн тухай хууль тус бүрт бүхэлд нь хориг тавьсан ч хүлээж авахаас татгалзсан. 
 
2017 оны арванхоёрдугаар сарын  5. Монгол Улсын 2018 оны төсвийн тухай хуульд хэсэгчлэн хориг тавьсан ч хүлээж авахаас татгалзсан. 
 
2018 оны зургадугаар сарын 13. УИХ-ын 45, 47 дугаар тогтоолууд буюу Д.Гантулга, Д.Мурат нарын УИХ-ын гишүүний бүрэн эрхийг түдгэлзүүлэхээс татгалзсан тогтоолд хориг тавьсанч хүлээж авахаас татгалзсан. 
 
2018 оны арваннэгдүгээр сарын 15. Монгол Улсын 2019 оны төсвийн тухай хууль болон дагалдан батлагдсан хууль, тогтоолуудад бүхэлд нь хориг тавьсан ч хүлээж авахаас татгалзсан. 
 
2019 оны тавдугаар сарын 14. Татварын багц хуульд бүхэлд нь хориг тавьсан ч хүлээж авахаас татгалзсан. 
 
2019 оны тавдугаар сарын 30. Захиргааны ерөнхий хуульд бүхэлд нь хориг тавьсан. УИХ хүлээж авсан. 
 
2019 оны зургадугаар сарын 04. Өөрийнх нь Татварын багц хуульд бүхэлд нь тавьсан хоригийг хүлээж авахаас татгалзах тухай УИХ-ын 51 дүгээр тогтоолд хориг тавьсан. Гэхдээ өөрөө хоригоо буцаан татсан. 
 
2019 оны есдүгээр сарын 20. Ард нийтийн санал асуулга явуулах, Үндсэн хуулийн нэмэлт өөрчлөлтийн эхийг баталсан УИХ-ын 73 дугаар тогтоолд хориг тавьсан. УИХ хүлээж авахаас татгалзсан.
 
2019 оны арванхоёрдугаар сарын 3. Өмгөөллийн тухай хуульд хэсэнчлэн, хамт баталсан Хуульчийн эрхзүйн байдлын тухай хуулийн зарим бүлэг хүчингүй болсонд тооцох тухай хуульд бүхэлд нь хориг тавьсан ч хүлээж авахаас татгалзсан. 
 
2019 оны арванхоёрдугаар сарын 4. Монгол Улсын 2020 оны төсвийн тухай хууль болон Нийгмийн даатгалын сангийн 2020 оны төсвийн тухай хуульд хэсэгчилэн, хамт батлагдсан Ирээдүйн өв сангийн тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуульд бүхэлд нь хориг тавьсан. Үүнээс Нийгмийн даатгалын сангийн 2020 оны төсвийн тухай хуульд тавьсан хориг хүлээж авч, бусад хоригийг хүлээж авахаас татгалзсан. 
 
2020 оны тавдугаар сарын 26. Монгол Улсын Их Хурлын тухай хуулийн 38 дугаар зүйлийн 38.2 дахь хэсэгт хэсэгчлэн хориг тавьсан. УИХ хүлээж авсан. 
 
2020 оны арваннэгдүгээр сарын 25. Монгол Улсын 2021 оны төсвий тухай хууль болон дагалдан гарсан хуулиудад бүхэлд нь хориг тавьсан. УИХ хүлээж авахаас татгалзсан байна.  
 
2021 оны нэгдүгээр сарын 22. УИХ-аас 2020 оны арванхоёрдугаар сарын 31-ний өдөр баталсан Авлигын эсрэг хуульд өөрчлөлт оруулах тухай хуулийн 1 дүгээр зүйлд заасан “Авлигатай тэмцэх газрын даргыг Ерөнхий сайдын санал болгосноор Улсын Их Хурал томилгооны сонсгол хийж 6 жилийн хугацаагаар томилно” гэсэн хэсэгт хэсэгчилэн хориг тавьсан. 
 
2021 оны нэгдүгээр сарын 25. УИХ-аас 2021 оны нэгдүгээр сарын 15-ны өдөр баталсан Монгол Улсын шүүхийн тухай хуульд  хэсэгчилэн хориг тавьсан. Дэмжээгүй. 
 
2021 оны дөрөвдүгээр сарын 2. Үндсэн хуулийн цэцийн гишүүнээр томилох, Үндсэн хуулийн цэцийн гишүүнээс чөлөөлөх тухай УИХ-ын 2021 оны гуравдугаар сарын 26-ны өдрийн 31 дүгээр тогтоолын “Бүрэн эрхийн хугацаа нь дуусгавар болсон тул Шарын Цогтоог Монгол Улсын Үндсэн хуулийн цэцийн гишүүнээс чөлөөлсүгэй” гэсэн 2 дахь хэсэгт хэсэгчлэн хориг тавьсан. Дэмжээгүй. 
 
2021 оны дөрөвдүгээр сарын 29. Үндсэн хуулийн цэцийн 2021 оны 02 дугаар дүгнэлтийг хүлээн зөвшөөрсөн УИХ-ын дөрөвдүгээр сарын 22-ны өдрийн 38 дугаар тогтоолд бүхэлд нь хориг тавьсан. Дэмжээгүй.
 

Х.БАТТУЛГА ЭРХ БАРИГЧ МАН-ЫН ЭСРЭГ 17 УДАА ХОРИГ ТАВЬЖ, 14-Т НЬ АМ РУУГАА "АЛГАДУУЛЖЭЭ"
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.