СҮХБААТАРЫН ТАЛБАЙД ӨРНӨСӨН ҮЙМЭЭНИЙ ЦААДАХ ҮЙЛ ЯВДАЛ

2021-05-09, 1467

Ардчилсан намын дотоод хуваагдал хэзээ, хаана, юунд хүрээд төгсгөл болохыг таах аргагүй болж байна. Бүр утгаа алдаж, хэзээ ч дахиж эвлэрэхгүй юм шиг л аашилцгааж байна. Сонгуулийн ерөнхий хороо С.Эрдэнийг Ардчилсан намаас дэвших эрх хангасан гээд бүртгэчихсэн. Харин Ц.Тувааны талынхан УИХ-ын гишүүн Н.Алтанхуягийн нэрийг Ерөнхийлөгчид дэвшүүлж байгаа. Даанч түүнийг СЕХ бүртгэж аваагүй. Үүнээс үүдэлтэйгээр Ардчилсан намын бүлгийн гишүүд Сүхбаатарын талбайд өлсгөлөн зарлаад дөрөв хонолоо.

Өлсгөлөнгийн дөрөв дэх хоногт хөл хорионы дэглэм суларч, улбар шар түвшинд орсноор хөл хорионд 20 гаруй хоносон Ардчилсан намын гишүүд өчигдөр төв талбай дээр цугларч эхэлсэн билээ. Ингэснээр үл ойлголцол, үймээн самуун үүсэж, золтой л цагдаа нар хүчээр тараах дээрээ тулсангүй, арай гэж л намжсан юм. Жагсагчдын барьсан уриа, лоозон элдэв үг бичсэн цаас, хулдаасан хэвлэл, олс зэрэг нь цуглаанд идэвхийлэн бэлтгэснийг илтгэж байлаа.

ЦАГДАА НАР ҮЙМЭЭН САМУУН БОЛОХООС СЭРГИЙЛЖ, “ОНЦ БАЙДАЛ” ЗАРЛАВ

Өглөө эртлэн Сүхбаатарын талбайд иргэд цугларсантай холбоотойгоор цагдаа нар хүч нэмэн хамгаалалтад гарч эхлэв. Хаврын марш тактикийн тэмцээнд бэлтгэж байсан цагдаа нарын бүрэлдэхүүнээс эхлээд дүүрэг дүүргийн цагдаагийн алба хаагчдыг хүртэл татсан гэх мэдээлэл байгаа юм. Хоёр өдрийн өмнөөс Бага тойруугийн замыг давхар хамгаалахаас эхлээд бороохой, нулимс асгаруулагч, шилэн бамбай гэх мэтээр үймээн самууны үед ашиглах хамгаалалтын хэрэгслүүдээ ч тэд бэлтгэсэн байлаа.

Сүхбаатарын талбай тойроод зогсоосон автобусанд цагдаа нар өдөржин бэлэн байдалд өнжлөө. Цагдаагийн ерөнхий газрын дарга нар Ардчилсан намаас сонгогдсон УИХ-ын гишүүдийн өлсгөлөн зарласан байдал үймээн самууны эхлэл болох магадлалтай хэмээн үзэж, ийнхүү дотооддоо “онц байдал” зарласан бололтой.

СОГТУУ ИРГЭД ТАЛБАЙ ДЭЭР ҮЙМЭЭН ДЭГДЭЭЖ, Э.БАТ-ҮҮЛИЙГ ҮСДЭЖ, ХӨӨЖ ТУУВ

Ардчилсан намынхны цуглааны үеэр төв талбай дээр хэд хэдэн сонирхол татсан хүмүүс ирцгээсэн юм. Тодруулбал, Талбайд архи үнэртүүлсэн хүмүүс олноороо ирцгээсэн байлаа. Тэд “МАН огцор, С.Эрдэнийг ална. Тэрнийг зайлуул” гээд л бие биенийгээ хөөргөж, хашхирч байв. Яг энэ үеэр Ардчилсан намын үүсгэн байгуулагч Э.Бат-Үүл, С.Эрдэнийн намаас Ардчилсан намын дарга болоод байгаа М.Тулгат, Ерөнхий нарийн бичгийн дарга Ч.Өнөрбаяр нар өлсгөлөн зарласан гишүүдтэй уулзахаар ирцгээсэн юм. Харамсалтай нь, согтуу хүмүүс, МАХН-ын гишүүнчлэлтэй ахмадууд гээд л Ардчилсан намд огт хамааралгүй хүмүүс тэднийг хэдэн талаас нь бүчээд авсан юм.

Тэгээд Э.Бат-Үүлийг үсдэж, цамцны захаас нь боож, “Чи эндээс зайл. Чамд энд байх эрх байхгүй” хэмээн дайрцгааж, өлсгөлөн зарлаж байгаа хүмүүс рүү ойртуулалгүй, хөөсөн юм. Бүр ундааны саванд хийсэн архи хүртэл цацаж, согтуу хүмүүс нь “Чамайг ална” гэж сүрдүүлээд авсан. Ингээд Ардчиллын алтан хараацай Э.Бат-Үүл УИХ-ын гишүүдтэй уулзаж чадахгүй байсаар хөөгдөж, туугдан явсан.

“МӨНГӨ ТАРААНА ГЭХЭЭР НЬ ИРСЭН” ХЭМЭЭН ЯРИГСАД БА ЭСРЭГ НАМЫНХНЫ ХАР ПИ АР

Сүхбаатарын талбай дээрх хүмүүсийн үймээн өлсгөлөн зарласан УИХ-ын гишүүд болоод тэнд байсан Ардчилсан намынхны хяналтаас гарах шинжтэй болов. Энд тэндгүй “Манай Ардчилсан намыг У.Хүрэлсүх муу новш яаж самарч байгаа юм бэ” гэж орь дуу тавин уйлах хижээл насны эмэгтэйчүүд, согтуу иргэд, бүр сэтгэцийн өвчтэй болов уу гэмээр дүр төрхтэй хүмүүсийн уйлж хашхирах нь нэмэгдэж байв. Ардчилсан намынхан “МАН-ынхан зохион байгуулалттайгаар үймээн дэгдээж, өлсгөлөнг татан буулгах гэж байна” гээд л хашхиралдаж байлаа.

Яг энэ үеэр талбай дээр хэд хэдэн “сонин” хүн ирсэн байв. Тэднийг ямар ч логогүй, ямар хэвлэл мэдээлэл вэ гэдгийг нь таних боломжгүй, камер, микрофон барьсан залуус дагалдаж байлаа. Зарим нь тэдний камерын өмнө “Би мөнгө өгнө гэхээр нь энд ирсэн” хэмээн ярих. Мөн “Цар тахалтай үед ингэж хүмүүс цуглуулах нь буруу. Өвчин улам бүр тархана. Ардчилсан намынхнаас болж ковидоор бүгд өвдөх нь” гэх мэтээр ярилцлага өгч байв. Багцаагаар арав гаруй хүн ийнхүү талбай дээрх үйл явдлыг харлуулж, яриа өгчихөөд яваад өгнө лээ. Удахгүй нөгөөх яриа нь сошиал орчинд битүү цацагдсан.

ХОЁР ХУВААГДСАН АРДЧИЛСАН НАМ У.ХҮРЭЛСҮХ РҮҮ ДАЙРЧ, МАН-ЫНХАН ЕРӨНХИЙЛӨГЧӨӨС АЙВ

Ийн хоёр тамгатай, хоёр даргатай Ардчилсан намынхан нэг цагт нэг үзэл санаанд нэгдэж байснаа мартаж, бие бие рүүгээ хэдэн өдөр дайрч байна. М.Тулгат даргатай Ардчилсан намынхан Төв талбайгаас хөөгдөж, “Шонхор” таураасаа өдөржин гомдол мэдүүлсэн бол О.Цогтгэрэл даргатай Ардчилсан намынхан талбай дээр МАН-ынхныг муулав. Тэд ээлж дараалан чанга яригчаар “МАН-ынхан Монгол Улсад дарангуйлал тогтоолоо. Нэг намын үзэл сурталд орох гэж өнөөдрийн ардчиллыг бүтээгээгүй” гэх мэтээр иргэдийг уриалж байв.

Харин МАН-ынхан иргэдийн дунд цуглаан үймээн самуун болж, Ерөнхийлөгчийн талд зогсох вий, 2008 оны долдугаар сарын 1 шиг үйл явдал болох вий хэмээн намын байрандаа шигдэцгээж байлаа. Угтаа бол Ардчилсан намынхан талбайд У.Хүрэлсүхийг муулж, МАН-ынхан Ерөнхийлөгчөөс айж байгаа бололтой.

СҮХБААТАРЫН ТАЛБАЙД ӨРНӨСӨН ҮЙМЭЭНИЙ ЦААДАХ ҮЙЛ ЯВДАЛ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид