Г.Занданшатарын хамтарсан  Засгийн газар бүрдээд гуравхан сар болсон ч танхимын сайд нар нь дотроо түнжин муутай байна. Ингэж нэг танхим болж бүрдэж чадахгүй эвээ олохгүй яваа Засгийн газар энэ намар задарч мэдэхээр байна.

       Тэр тусмаа Засгийн газарт уригдаж орсон ИЗЗН-ынхан хамтарсан Засгийн газраас гарах асуудал ч сөхөгдөөд эхэлсэн. Өөрөөр хэлбэл Байгаль орчин уур амьсгалын өөрчлөлтийн яамыг хариуцсан ИЗНН-ын дарга Батын Батбаатар ЗГХЭГ-ын дарга С.Бямбацогттой түнжин хагарсан гэх шуум бий. Өөрөөр хэлбэл, Байгаль орчин, уур амьсгалын өөрчлөлтийн яамны Төрийн нарийн бичгийн даргын албан үүргийг түр орлон гүйцэтгэгчээр Т.Золбаярыг томилсон. Харин энэ албан тушаалд ЗГХЭГ-ын дарга С.Бямбацогтын баз Д.Батцогт ажиллаж байсантай холбоотой аж. Улмаар Төрийн нарийн бичгийн албан тушаалд ЗГХЭГ-ын дарга С.Бямбацогт өөрийн хүнээ зүтгүүлэх хувилбарыг ярьнаар уг томилгоог зөвшөөрөөгүй юм байна. Ингээд ИЗНН-ын дарга хамтарсан Засгийн газраас гарах асуудлыг сөхөж эхэлсэн гэх яриа бий.

       Хэдийгээр  Байгаль орчин уур амьсгалын өөрчлөлтийн сайд Б.Батбаатар албан ёсоор энэ асуудлыг яриагүй ч тус намыг УИХ-д төлөөлж суугаа М.Нара-Нарантуяа цахим орчинд “Нэр төдий засагт хамтрах ажлыг больсон нь дээр гэсэн удаа дараагийн саналыг хүлээн авахаар болсон Иргэний Зориг Ногоон Намын дарга Батын Батбаатартаа баярлалаа. АН засгаас гарлаа л гээд байдаг, дүр эсгэж далдуур хамтраад бүх яаман дээрх чигжээсүүдээ шахсан хэвээр байхад дүр эсгэсэн шинэ хамтарсан Засагт байх шаардлага манай ИЗНН лавтай байхгүй болно” хэмээн мэдэгдсэн. Улмаар түүний энэ мэдэгдлийн Байгаль орчин уур амьсгалын өөрчлөлтийн сайд Б.Батбаатар цахим орчинд дэмжиж байгаагаа илэрхийлсэн удаатай.

       Улмаар ИЗНН-ынхан өнгөрсөн мягмар гарагт Улс төрийн зөвлөлөө хуралдуулсан Ингээд МАН-тай Засгийн газарт хамтарч ажиллах гэрээ байгуулах ажлын хэсэг гаргаснаа зарлаад байна.

        Цаашлаад ИЗЗН-ынхан Засгийн газраас гарахдаа тулбал, УИХ-ын гишүүн Н.Номтойбаярын тэргүүлж буй Үндэсний эсвэлтэй хамтрах асуудал ч сөхөгдөж эхэлсэн байна. Харин Үндэсний эвсэлийнхэн Засагт хамтрах хувилбар яригдвал одоогийн Байгаль орчин уур амьсгалын өөрчлөлтийн яамнаас гадна өөр яам хариуцуулах асуудал сөхөгдөж эхэлжээ.

     Дан ганц ИЗЗН гэлтгүй Засагт засвар орох өөр нэг хувилбар нь одоогийн ХҮН намынханыг гаргах буюу Боловсролын яамыг МАН-ынхан авах хүсэлтээ байгаа. Г.Занданшатарын Засгийн газраас хамгийн их хэл ам дагуулж байгаа Боловсролын сайд П.Наранбаярыг солих асуудал аль эртнээс сөхөгдсөн. Тэр дундаа УИХ-ын Б.Бат-Эрдэнэ тэргүүтэй нэр бүхий гишүүн П.Наранбаяр сайдыг огцорохыг шаардаж, эсэргүүцлээ илэрхийлсэн удаа ч бий. Харин Боловсролын сайд  П.Наранбаярын ард ХҮН намаас гадна УИХ-ын гишүүн  Ж.Галбадрахын оролцоо ч бий гэдгийг улстөрчид удаа дараа сөхөж байлаа.

     Ийн хамтарсан Засгийн газарт дуулиан шуугиантай багтсан ИЗНН болон ХҮН намынхны Засгаас жийгдэж, Ардчилсан намынхан ахиад Засагт хамтрах тухай ч яриа гараад эхэлсэн байна. Ардчилсан намын даргын сунгаанд өрсөлдсөн О.Цогтгэрэл мэтгэлцээний үеэр Засагт хамтрах санал ирвэл намынхаа байр суурийг сонсоно гэх байр суурийг илэрхийлж байсан удаатай.

       Засагт засвар оруул МАН-ынхан хуучин сайд нараа ч сэлгэж магадгүй гэнэ. Тэр тусмаа хоёр Засгийн газарт улирч суугаа сайд нараа сольж магадгүй юм байна. Тухайлбал, Эрчим хүчний сайд Б.Чойжилсүрэн Зам тээврийн хөгжлийн сайд Б.Дэлгэрсайхан нар “давхар дээл”-ээ тайлах цаг болсон гэх яриа МАН-ынхан дунд гарч эхэлжээ. Эрх баригч МАН-ынхны хувьд намын даргаа томилох, Их хурлаа хуралдуулах гээд дотроо эрх мэдлийн “зодоон” чимээгүй хэрнээ ширүүхэн өрнөж байгаа. Тиймээс сайд нарын халаа сэлгээний асуудлыг ИЗНН-аар далимдуулж хийх сураг бий.

      Ийн дотроо зодоонтой Г.Занданшатарын Засгийн газар УИХ-д анхны улсын төсвөө өргөн бариад байгаа. Төсөв хэлэлцүүлж эхэлтэл түр Засгийн газрын бүтцээ задлахгүй байх асуудлыг ч ярьсан гэх мэдээлэл Саарал ордонд жиг жуг гэж байна. Энэ намрын улс төр Засгийн газар халаа сэлгээгээр үргэлжилж мэдэх нь.