Ялалтын баярын арга хэмжээнд уригдаж, ОХУ-ыг зорьсон Монгол Улсын Ерөнхийлөгч У.Хүрэлсүхийн айлчлалаас хүлээх хүлээлт их байна. Хэдийгээр  Москва хотноо болох Аугаа их Эх орны дайны ялалтын 80 жилийн ойн баярт оролцохоор Төрийн тэргүүн хойд хөршийг зорьсон ч, томоохон төслүүд хөдлөх чухал ач холбогдолтой айлчлал болохыг мэргэжлийнхэн судлаачид тодотгож байна.

      Тэр чинээгээрээ олон улсын анхааралд орох, эрдэл дагуулах яриа хэлэлцээрүүд хийгдэнэ гэх асуудал сөхөгдөж байгаа юм. ОХУ-ын Ерөнхийлөгч В.В.Путин өчигдөр Монгол Улсын Ерөнхийлөгч У.Хүрэлсүхийг хүлээн авч уулзах үеэрээ талархал илэрхийлж, Аугаа их Эх орны дайны хүнд жилүүдэд Монгол Улс, монголын ард түмэн ЗХУ-д тусламж дэмжлэг үзүүлж байсныг ОХУ-ын төр засаг болон ард түмэн үргэлж өндрөөр үнэлж, чухал ач холбогдол өгч байдгийг тэмдэглэсэн байна.

    Түүнчлэн, уулзалтын үеэр хоёр улсын Ерөнхийлөгч нар Монгол, Оросын уламжлалт найрсаг харилцаа болон худалдаа, эдийн засаг, хөрөнгө оруулалт, хөдөө аж ахуй, эрчим хүч, тээвэр логистик, аялал жуулчлал, байгаль орчин болон хүмүүнлэгийн салбарын хамтын ажиллагааны өргөн асуудлаар санал солилцсон гэдгийг эх сурвалжууд мэдээллээд байна.

Тэгвэл энэ удаагийн айлчлалаар Евразийн эдийн засгийн холбоотой байгуулах Чөлөөт худалдааны түр хэлэлцээрийн явц, Эгийн голын усан цахилгаан станц, Монголын нутгаар дамжуулах Хятадад хий дамжуулах хоолойн төсөл, Дулааны цахилгаан станц-3-ын өргөтгөл зэрэг томоохон төсөл хөтөлбөрүүдийг хөдөлгөнө гэх хүлээлт байна.

Байгалийн хийн хоолой:

     БНХАУ-ын Ерөнхийлөгч Ши Жиньпинийг өчигдөр ОХУ-ын Ерөнхийлөгч В.И.Путин хүлээн авч уулзсан. Тэгвэл гурван улсын Ерөнхийлөгчийн уулзалтаар Монголын нутгаар дамжуулах Байгалийн хийн хоолойн төслийн яриа хэлэлцээр хийгдэнэ гэсэн хүлээлт байна.

     Монголын нутгаар дамжин ОХУ-аас БНХАУ руу жилд 50 тэрбум орчим шоо метр хий тээвэрлэх хүчин чадалтай "Сибирийн хүч-2" байгалийн хийн хоолойн төсөл цар тахлын өмнөхнөөс эхлэн сүүлийн хэдэн жил идэвхтэй яригдаж буй. Уг хийн хоолойн бүтээн байгуулалт нь ОХУ байгалийн хийгээ БНХАУ-аас эхлэн бусад Азийн орон руу чиглүүлэн нийлүүлэлтээ нэмж, Зүүн Хойд Азийн эрчим хүчний диманикийг өөрчлөх чухал ач холбогдолтой төсөл. Гэсэн ч цар тахалтай холбоотойгоор хойшлогдож байсан "Сибирийн хүч-2"-ын бүтээн байгуулалт эцэслэн баталгаажаагүй явсаар ОХУ Украинд цэргийн тусгай ажиллагаа эхлүүлсэнтэй зэрэгцэн гацаанд орсон байдаг.

Эгийн голын усан цахилгаан станц:

     Засгийн газраас хэрэгжүүлж буй “Бүсчилсэн хөгжил” хөтөлбөрийн хүрээнд Хойд бүсийн анхдугаар хуралдаанаар Эгийн голын усан цахилгаан станцын төслийн ажил эхлэхээр болсныг мэдэгдэж байлаа. Тодруулбал, ОХУ-аас байгалийн нөөц, экологийн сайд нар Байгаль нуур болон Сэлэнгэ мөрнийг хамгаалах салбарт хамтран ажиллах тухай санамж бичигт гарын үсэг зурж, мөн санамж бичгийн дагуу хийх ажлын төлөвлөгөөг хэлэлцэн тохирч гарын үсэг зурсан гэдгиййг онцолж байлаа.

       Тэгвэл энэ удаагийн Ерөнхийлөгчийн айлчлалаар Эгийн голын усан цахилгаан станцын төслийг урагшуулах асуудлыг ярилцах бололтой.

 ДЦС-3-ын өргөтгөл:

       Монгол Улсын Засгийн газрын 2024 оны дөрөвдүгээр сарын 17-ны өдрийн хуралдааны 15 дугаар тэмдэглэлийн дагуу Дулааны гуравдугаар цахилгаан станцад түшиглэн цахилгааныг 300 МВт-аар, дулааныг 395 МВт-аар үе шаттай өргөтгөх төслийг эрчимжүүлэх шийдвэр гарсан. Үүнтэй холбоотойгоор хэлэлцээрийн төслийг боловсруулж, өнгөрсөн дөрөвдүгээр сард ОХУ-ын Эрчим хүчний сайдад хүргүүлсэн байна. Харин тус Эрчим хүчний яамнаас хэлэлцээрийн төсөлд холбогдох яамдын саналыг тусгаад, өнгөрсөн долдугаар сард манай талд хариу ирүүлсэн аж. Хоёр улсын Эрчим хүчний яамд харилцан зөвшилцөж, хамтран ажиллах болсон уг хэлэлцээрийн төсөл нийт 11 зүйлтэй. Жишээлбэл, Дулааны гуравдугаар цахилгаан станцын өндөр даралтын хэсгийг 50 МВт-ын (1x50 МВт) блок станцаар өргөтгөх, дунд даралтын хэсгийн 48 МВт-ын (4x12 МВт) блок станцыг буулгаж, сууринд нь 250 МВт-ын (2x125 МВт) блок станц шинээр барих төслийн зураг төсөл боловсруулна. Зураг төсөл боловсруулах ажлын үр дүнд Дулааны гуравдугаар цахилгаан станцын өргөтгөл, шинэчлэлийн төслийн барилга угсралтын нийт төсөвт өртөг, хугацааг нарийвчлан тодорхойлж, цаашид ОХУ-ын Засгийн газрын экспортын зээлийн нөхцөл, барилга угсралтын ажил гүйцэтгэх зэрэг асуудлыг Оросын талтай тохиролцох нөхцөлийг бүрдүүлэх суурь баримт бичиг болох талаар манай тал мэдэгдээд байгаа билээ. Тэгвэл Ерөнхийлөгч У.Хүрэлсүх ОХУ-ын Ерөнхийлөгч В.Путинтай уулзах үеэрээ хэлсэн үгэндээ Дулааны гуравдугаар цахилгаан станцын өргөтгөлийн асуудлыг урагшуулах талаар хөндсөн байна.

      Ийн Ерөнхийлөгч У.Хүрэлсүхийн ОХУ-д хийж буй айлчлалын дараа манай улсын томоохон төсөл хөтөлбөрүүд урагшилна гэсэн хүлээлттэйй байна.