Ерөнхий сайд ууртай байна. Төсвийн төслийн хэлэлцүүлгээс Л.Оюун-Эрдэнийн Засгийн газарт улс төрийн шахаа угсраа олон мэхтэй ирж, сүүлдээ төсвөө танах уу, Засгаа унагаах уу гэдэг сонголтыг хүртэл тулгаж эхэлсэн гэнэ. Цаашлаад сайд нараа улаан цээжээрээ хамгаалж, төсвийн төсөлд тусгасан нэг ч саналыг унагаахгүй гэх даалгаврыг хүртэл намынхандаа өгсөнөөр МАН дотоод зодоон өндрөө авч байгаа сурагтай. Тэр тусмаа Соёл, спорт, залуучуудын сайд Ч.Номингийн  18.3 тэрбум төгрөгийн төсөв олны анхааралд өртсөн нь Засгийн газарт ачаа болж, түүнийг нь хамгаалж үлдэхийн тулд Ерөнхий сайд танхимын сайд нартаа хатуухан сануулга өгсөн гэх яриа ч Саарал ордныхон дунд сэм яригдах болов.

           Төслийн хоёрдугаар хэлэлцүүлэг дээр унаж явсан 18.3 тэрбум төгрөгийн ваучер олгох төслийг зарчмын зөрүүтэй саналаар дахин санал хурааж, ингэхдээ гар өргүүлэн дэмжүүлсэн нь намынх нь гишүүдийн дургүйг хүргэжээ.

         Цаашлаад Засгийн газарт тойрогтоо таван тэрбум төгрөгийг тусгуулах санаачлага гаргаж, төсөв дээр бойкот хийж эхэлсэн нь Л.Оюун-Эрдэнийн уурыг хүргэж, Ц.Даваасүрэн тэргүүтэй гишүүдэд хатуухан сануулга өгсөн гэнэ. Хэдий тойргийн төсвийн санал өндрөө аваагүй ч төсвийг АН, ХҮН-тэй хамтран хүчээр батлахаар зүтгэж байгаа нь МАН-ын гишүүдийн дургүйг хүргэж эхэлсэн сурагтай. Улмаар АН-д залуу улстөрчид “Янзага” фракцыг бүрдүүлж эхэлсэн бол МАН дотроо мөн хэд хэдэн шинэ фракц чимээгүйхэн бүрдүүлж эхэлсэн байна.

УРСГАЛ ЗАРДЛЫГ БУУРУУЛАХ УИХ-ЫН ГИШҮҮДИЙН ШААРДЛАГЫН ЦААДАХ УЛС ТӨРИЙН САНУУЛГА

          Цаашлаад өрөм дотроосоо өтдөг гэгчээр МАН-ын хагарал дотроосоо задарч төсвийн төслийг буцаах саналыг ч тэд өөрсдөө гаргаж эхэллээ. Ингэхдээ УИХ-ын гишүүн Г.Тэмүүлэн, Д.Энхтүвшин нар АН-ын нэр бүхий гишүүтэй хамтарч, Засгийн газарт төсвийн төслийг буцааж, 3.6 их наяд төгрөгийн урсгал зардлыг танах шаардлага хүргүүлж байгаагаа мэдэгдсэн.

         Энэ талаар УИХ-ын гишүүн Г.Тэмүүлэн “2025 оны төсвийн төслийг дахин хэлэлцэж, засвар оруулах шаардлагатай байна. Тэгж байж ирэх оны эдийн засгийн сөрөг нөлөөллийг бууруулах боломж бүрдүүлмээр байгаа юм. Төсвийн урсгал зардлыг 3.6 их наядаар бууруулах боломж байна. 2025 оны төсвийн зарлагын хэмжээ 5.3 их наяд төгрөгөөр, Засгийн газрын өр зээл таван их наядаар нэмэгдэж, 40.5 их наяд, урсгал зардал 3.6 их наядаар нэмэгдэж, төсвийн алдагдал 1,9 их наяд төгрөгт хүрч байна. Том 14 мега төслийг бид дэмжиж байгаа. Гэхдээ энэ төслүүдээр халхавчилж, төсвийн ерөнхийлөн захирагч нарын урсгал зардлыг үндэслэлгүй нэмж байгааг эсэргүүцэж байна. Үүнээс болж ард иргэдийн амьдралд нөлөө үзүүлнэ. Төгрөгийн ханш нэмэгдэж, долларын ханш өснө. Монгол Улсын дунд хугацааны эдийн засаг эрсдэлд орох болчихоод байна.

         Тиймээс Засгийн газарт шаардлага хүргүүлж байна. Засгийн газар үүнд ажил хэрэгч хандаасай. Иргэдийн орлогыг хамгаалах акц эхлүүлж байгаа гэдгийг хэлмээр байна. Энэ асуудлыг жижиг эрх ашгийн эрэмбийн хүрээнд сенсацад төөрөгдөж ойлгож болохгүй шүү. Эдийн засагт эрсдлээ бодох цаг болсон” хэмээн мэдэгдсэн. Харин УИХ-ын гишүүн Д.Энхтүвшин “2025 оны төсвийн төслийг дахин хэлэлцэж, засвар оруулах шаардлагатай байна. Тэгж байж ирэх оны эдийн засгийн сөрөг нөлөөллийг бууруулах боломж бүрдүүлмээр байгаа юм. Төсвийн урсгал зардлыг 3.6 их наядаар бууруулах боломж байна. 2025 оны төсвийн зарлагын хэмжээ 5.3 их наяд төгрөгөөр, Засгийн газрын өр зээл таван их наядаар нэмэгдэж, 40.5 их наяд, урсгал зардал 3.6 их наядаар нэмэгдэж, төсвийн алдагдал 1,9 их наяд төгрөгт хүрч байна. Том 14 мега төслийг бид дэмжиж байгаа. Гэхдээ энэ төслүүдээр халхавчилж, төсвийн ерөнхийлөн захирагч нарын урсгал зардлыг үндэслэлгүй нэмж байгааг эсэргүүцэж байна. Үүнээс болж ард иргэдийн амьдралд нөлөө үзүүлнэ. Төгрөгийн ханш нэмэгдэж, долларын ханш өснө. Монгол Улсын дунд хугацааны эдийн засаг эрсдэлд орох болчихоод байна. Тиймээс Засгийн газарт шаардлага хүргүүлж байна. Засгийн газар үүнд ажил хэрэгч хандаасай. Иргэдийн орлогыг хамгаалах акцыг эхлүүлж байгаа гэдгийг хэлмээр байна. Энэ асуудлыг жижиг эрх ашгийн эрэмбийн хүрээнд сенсацад төөрөгдөж ойлгож болохгүй шүү. Эдийн засагт эрсдлээ бодох цаг болсон” хэмээгээд байна.

       Ийн тэд Ерөнхий сайдыг БНХАУ руу томилолтоор явахтай нь зэрэгцүүлэн Засгийн газарт шаардлага хүргүүлсэн нь анхаарал татаж байна. Угтаа бол тэдний энэ шаардлага улстөрчдөөс олны дэмжлэг төдийлөн авахгүй байж мэдэх ч ард түмний дунд оноо болж, чамгүй дэмжлэг авах нь тодорхой харагдаж байна.

        Цаашлаад төсвийн төслийн хэлэлцүүлгээр түрүй барьж, Г.Тэмүүлэн, Д.Энхтүвшин нараар халхавчилсан тойргийн гадна үлдсэн МАН-ын хуучин гишүүд Засгийн газрыг унагаах кампанит ажил өрнүүлж эхэлсэн гэгдэх боллоо. Эрчим хүчний салбар шинэчлэл хийх нэрээр цахилгаан дулааны үнэ нэмэгдэх нь тодорхой болоод байна. Аж ахуйн нэгжүүдээ дампууруулах эрсдэл хүлээж мэдэх энэ шийдвэрийн асаар Засгийн газар улс төрөө дааж чадахгүй гэх таамаг ч улс төрийн хүрээнийхэн дунд яригдах болжээ.

      Гэхдээ эцсийн шийдвэр Ерөнхийлөгчийн гарт бий. Хэрэв зээ Засгийн газар огцрохгүй бол улсын төсвийг танаж, тойргийн төсвүүдийг тусгахаас өөр сонголт Л.Оюун-Эрдэнийн Засгийн газарт үлдээгүй ч байж мэдэх нь.