МАН сонгуульд нэр дэвшигчдийнхээ нэрийг нам дотроо ч зарлаж чадахгүй ихэд нууцалж, боломжит цаг үеэ хүлээж байна. МАН-ын дотоод улс өнөөдөр халуун савны запас шиг хэврэг болчихсондоо хаашаа ч хөдөлж чадахгүй болгоомжтой няхуур гэгч нь ажиллаж байна. Улс төрд итгэх иргэдийн итгэх буурахаас гадан МАН дотроо гомдогсдын бүлэглэл бүрдэх вий гэдгээ үхтлээ айж байгаа гэх.

        Авлига албан тушаалын хэрэгтнүүдээсээ ангижрах амлалтандаа хүрээгүй МАН-ын удирдлагууд муу нэр зүүсэн гишүүдээ хөөх нь битгий хэл ирэх сонгуульд нэр дэвших эрхээр “шагнаж” эхлэх нь бололтлй. Угтаа бол одоогийн Их хуралд суугаа гишүүдийнх нь тэн хагас нь ЖДҮ, Хөгжлийн банк, нүүрсний хулгай, Боловсролын зээлийн сан, ногоон автобусны хэрэгт нэр холбогдсон ч хэнд нь ч хариуцлага тооцож чадалгүй сонгуультай золгов.

        Ингээд намынх нь гол санхүүжүүлэгчид нь аль болж бүтэхгүй нэрийг нь зүүчихсэн нь одоогийн МАН-ынхны дөнгө болж, авлига албан тушаалын хэрэгтнүүдээ нүдээ аниад сонгуульд зүтгүүлэхээс аргагүй болов. Тиймдээ ч нүүрсний хулгайчид гэж зарлаж байсан гишүүдээ буцаагаад царай алдах дээрээ тулчихаад хөгөө чирч байгаа гэнэ. Сонгуульд горилогчдын нэрийг нам дотроо ч нууцлаж байгаа нь ийм учиртай. Өөрөөр хэлбэл, тойрог болгонд мандатын тооноос давсан горилогчид жагсаж байгаа нь МАН-ынхны толгойны өвчин болж байна. Мэдээж өнгөрсөн хугацаанд их нь их, бага нь бага гэлтгүй намдаа хандив өгч, хэрэндээ намаа тордсон гишүүдийнхээ хэнийг нь хэн гэхэв  дээрээ тулж байгаа бололтой.

        Хэдийгээр МАН босоо удирдлагатай ч нам доторх бүлэглэлүүдийн нөлөө өндрөө авсаар байгаа. Тиймээс фракцуудын шахааны төлөөллүүд мандатын тоонд яалт үгүй багтаж, МАН дотор тойргийн хуваарилалтын “зодоон” ч өрнөж байгаа гэх нь бий. Хэн хэнийг нь гомдоовол гомдогсдын том арми бүрдэх бүрэн боломжтой учир сонгуульд горилогчдынхоо нэрсийг бүрэн задлаж чадахгүй намын томчууд ханцуйн дотроо чимээгүйхэн “наймаалцаж” байгаа гэдгийг учир мэдэх хүмүүс жиг жуг гэлцэх болжээ.

      Тэр тусмаа намын гол санхүүжүүлэгчид болсон хуучин гишүүдээ дэвшүүлэхээр бэлтгэлээ базааж, хамгийн боломжит хугацаагаа хүлээж эхэлсэн байна.

       Хуучин ЖДҮ-гийн хэргийг Б.Ундармаа, Г.Солтон, Д.Дамба-Очир дааж, 60 тэрбум төгрөгийн хэргийг Ц.Сандуйд даалгаад гарчихдаг байсан бол одоо хэн нь хэн гэхээргүй болж, туг тахих ч гишүүн олдохоо байтлаа МАН бүлэглэлүүд хүчээ зузаатгасан гэх. Тиймдээ ч хазгай гишгэвэл хальтарч унахаар эмзэг байгаа ийм үед намынхаа гишүүдийн дотор ч мэдээлэл гаргахгүйгээр хатуухан тактиктай үзэж байгаа нь энэ ажээ.

    Үнэндээ ЖДҮХС, бондууд, Хөгжлийн банк тэргүүтэй хамгийн бага хүүтэй, хамгийн их боломжоос ашиглаагүй, хүртээгүй МАН-ын гишүүн, сайд, дарга байхгүй. Өөрийнхөө нэр дээр биш ч үеэл, хаяал, төрсөн ах дүүс, төө зайгүй найз, нөхдөдөө албан тушаал, эрх мэдлээ ашиглан зээл авч өгөөд, хамтран идэж, уугаад, бизнесээ өргөжүүлээд, шан харамжаа авчихсан нь МАН-ынхан. Тиймээс сонгуулийн энэ өдрүүдэд намдаа гал дуудах нь хэн хэндээ ашиггүй учир нүдээ аниад зүтгүүлэхээс өөр аргагүйдэж байна тэд.

    Түүний хамгийн ойрын жишээ нь намаасаа хөөсөн УИХ-ын гишүүн Ц.Анандбазарыг хүртэл намын гишүүнчлэлийг нь сэргээж дахин дэвшүүлэхээр сонгуулийн ажилдаа эргэлт буцалтгүй орсон гэх нь ч бий. Тэрбээр “Сонгуульд би нэр дэвшинэ. Намын гишүүнчлэлээс түдгэлзсэн нь цаг хугацааны асуудал. Хэрэг хийсэн хүнийг түдгэлзсэнд тооцдог. Миний хувьд бүх зүйлд шалгагдаад дууссан. Одоо нэрээ цэвэрлэж авна. Томсгосон тойрог гэдэг ажил хийсэн хүнд зөв бодлого. Монгол Улс дов жалга, аймгийн бодлогоосоо гарч чадахгүй байна. Тэгэхээр томсгосон тойрог хөгжлийн нэг алхам болж байгаа. Надад санаа зовж байгаад баярлаж байна. Хэл амтай, хов жив хийдэг хүнийг сонгоод манай улс хөгжихгүй. Юм хийж чаддаг, бүтээдэг, босгодог хүнийг сонговол их сайн байна. Та нар минь бага хиам идэж, ард түмэнд зөв мэдээлэл өгөх нь чухал юм. Бид орон нутагт ажиллаж байна. Булган аймагтаа би зөндөө ажил хийсэн, 4000 ажлын байр гаргасан. Ажлын байр байхгүйгээс манай улсын иргэд ядуу байна. Ядуу амьдрах аргаас гарах аргыг бид заахгүй бол ядуу амьдарсаар дуусна. Тиймээс ажлын байр бий болгосон” хэмээн хэнэгч үгүй мэдээлэл хийж зогссон. Энэ мэт сонгуульд горилогчдын цуваа өдөр ирэх тусам нэмэгдэж, мөнөөх намынхаа хар жагсаалтад багтсан муу нэртэй гишүүд бүгд ээлж дараалан орж ирэхээс сийхгүй болчихлоо.

       Ингээд харахаар МАН хулгайч, луйварчин гэх хамгийн муу нэр зүүсэн гишүүдээсээ салж чадахгүй нь. Хөгжлийн банк, нүүрсний хэрэг, газрын наймаа, боловсролын зээлийн сан, ногоон автобусны хэрэгт нэр холбогдсон сонгуульд нэр дэвшүүлнэ. Цаашлаад ирэх сонгуулиаар энэ “хэрэгтнүүд” бүүр олуулаа болж улс төрд ирэх нь. МАН-ын үе үеийн удирдлагууд авлига, албан тушаалын хэрэгтнүүддээ хариуцлага тооцох амлалт өгдөг ч үнэн хэрэг дээрээ тэд хулгайч, луйварчдаасаа салж чадахгүй юм байна.