-Л.ОЮУН-ЭРДЭНЭ ОРОН НУТАГТ АЖИЛЛАХ ҮЕЭРЭЭ ДҮНГЭЭ ТАВИУЛЖ, МАН-ЫН БОДИТ ҮНЭНТЭЙ НҮҮР ТУЛЖ ЯВНА-

      Ерөнхий сайд Л.Оюун-Эрдэнэ ууртай байна. Уурласандаа улс төрд гол дүр нь байх гэж улам бүр улайрч, нам дотроо том дайн эхлүүлсэн гэнэ. Ирэх сонгуульд гол дүр нь байх гэж тэр хэрэндээ зүтгэж байгаа нь энэ. Ингэхдээ “ах” нараасаа урваж, “андуудаа” намнаад ч хамаагүй шат ахих ажилдаа ханцуй шамлан орсон гэдэг. Ардын намын дарга нар ирэх сонгуулийн өмнөх эрх мэдлийн төлөөх эд “дайн”-аа энэ намар эхлүүлэх нь.

     Л.Оюун-Эрдэнийн Засгийн газрынхан орон нутагт ажиллах үеэрээ Засгийн газрын үйл ажиллагаагаа танилцуулж, ирэх сонгуульд хэрхэн оролцох зураглалаа гаргахаар аймаг болгон дээр нэг том дэд бүтцийн ажил зураглаад Монгол орноор хөндлөн гулд давхиж яваа.

      Хөдөөгийн иргэдэд Л.Оюун-Эрдэнэ шинэ дүр. Хэнтий аймгийн иргэдтэйгээ л хэдэн удаа уулзаж байсан тэрбээр Ерөнхий сайдаар ажиллах гурван жилийн хугацаандаа ингэж иргэдтэйгээ нүүр тулж байсангүй.  Анхны уулзалтууд амь халуун байгаа нь мэдрэгдэж байна. Харамсалтай нь, МАН-ынхан ч тэр Л.Оюун-Эрдэнэ ч тэр аль аль нь ард түмнээс олигтой үг сонсохгүй, өдөржин толгойгоо эргэтэл загнуулж бодит үнэнтэй нүүр тулж яваа нь илт байна.

       Үүний хамгийн тод жишээ олон нийтэд нийлттэй мэдээллээ цацсан Ховд аймаг байсан. Ховд аймагт ажиллах үеэрээ тэрбээр аймгийн Засаг дарга, ЗГХЭГ-ын дарга, сайд нартайгаа хамт бүгд толгой дараалан загнуулж, хөөгдөхөөс наагуур юм болсон. Тиймдээ ч үүнээс хойш аймгийн төвүүдэд үйл ажиллагаа явуулдаг хэвлэл мэдээллийн байгууллагуудыг өөрийнх нь уулзалтыг шууд дамжуулахыг хориглосон гэх мэдээлэл ч байна. Учир нь, Ховд гэлтгүй 21 аймагт ийм дүр зураг давтагдаж, жинхэнэ дүнгээ тавиулж явна. Өчигдөрхөн гэхэд л Дорнод аймагт очих үеэрээ хоёр цаг тасралтгүй лекц уншиж, түүнээс нь залхсан иргэд эсэргүүцлээ илэрхийлж, үгээ хэлэхийг шаардахад том биетэй хамгаалалтынхан хөгшчүүдийн өмнө даналзаж, чирч гаргахаас наагуур томорч байгаа бичлэг олон нийтэд ил болсон.

      Тэр байтугай Булган аймгийн арван жилийн сурагч Засгийн газрын үйл ажиллагааг зад шүүмжилж, МАН-ын алдааг “Ба, бэ”-гүй хэлж өгч харагдана лээ.

     Ард түмнээс хамгийн муу оноо авсан Ардын намын дарга уурласандаа намынхантайгаа муудаж, өөртэй нь баг болж хамтарч ажиллаж чадахгүй гэсэн аймгийн Засаг дарга нараасаа эхлээд толгой дараалан халаа сэлгээ хийх сануулгууд өгөөд буцаж байгаа сурагтай. Тухайлбал, саяхан Орхон аймгийн Засаг даргыг албан тушаалаас нь чөлөөлөх “шахалт” үзүүлсэн гэх яриа олны дунд гараад эхэлсэн. Олны үг ортой гэгчээр Орхон аймгийн Засаг дарга С.Батжаргал албан тушаалаа хүлээлгэж өгөх гэж байгаагаа нүүр нмын хуудсаараа мэдэгдсэн харагдана лээ.

      Ерөнхий сайд дараагийн тэсрэлтээ УИХ-д хийж, сонгуулийн өмнө том дуулиан тарих бэлтгэлээ базааж эхэлсэн гэх нь ч бий. Ингэхдээ Ардын намын томчуудаасаа нэгийг нь сугалж, Т.Аюурсайхан, Ж.Мөнхбат нараар туг тахисан шигээ дараагийн “бай”-гаа болгон онилсон гэх яриа ч Саарал ордноор яваад эхэлсэн байна. Тэр дундаа Ерөнхий сайд Л.Оюун-Эрдэнэ өнгөрсөн хугацаанд өөрт нь хань болсон хуучин гишүүдээ жийж эхэлснээр МАН-ын дарга нарын зодоон улам бүр эрчээ авч, ширүүсэх бололтой.

      Уг нь бол тэр Ерөнхий сайдын байр сууриа бататгах гэж Ардын намд аль эрх мэдэлтэй, нөлөөтэй хүмүүсээр багаа бүрдүүлсэн. Тэднээсээ ч дэмжлэг сайн авсан. Тэр тусмаа Ерөнхийлөгч У.Хүрэлсүх Л.Оюун-Эрдэнийг тултал крандаж, духан дээр нь үнсээд өөрийнхөө суудлыг хүлээлгэж өгсөн. Гэвч гуравхан жилийн дотор Л.Оюун-Эрдэнэ нутгийн ахтайгаа хэд хэдэн удаа түнжин хагарч, ирэх сонгуулиар Ерөнхийлөгчийн багийг “жийнэ” гэх яриа тасрахаа байсан.

    Өөрөөр хэлбэл, тэр хамтрагчдаа солих, золих ажилдаа нэгэнт орсон гэсэн үг. Энэ үүднээс сонгуулийн өмнөх улс төрийн зураглалаа Л.Оюун-Эрдэнийн багийнхан гаргаж, Ерөнхий сайд Увсын фаркцынхантай хүч хавсран ирэх сонгуульд оролцох төлөвлөгөөтэй гэнэ. Үүний хамгийн том жишээ нь, Л.Оюун-Эрдэнэ танхимын сайд нараа Ч.Хүрэлбаатар, Ж.Ганбаатар, Б.Чойжилсүрэн нараар бүрдүүлсэн. Энэ нь ч учиртай аж. 

Өнгөрсөн хаврын чуулганаар МАН-ынхан Үндсэн хуульд дахин гар хүрч, гишүүдийн тоог 126-д хүргэхээр болсон. Эндээс Л.Оюун-Эрдэнэ хэмжээлшггүй эрх мэдэлд хүрэхийн төлөө улайрч, тэмцэж эхэлсэн нь ч тодорхой харагдаж байгаа юм. Тэр байтугай ирэх сонгуулийн дараа Их хурлын эрх мэдэл нэмэгдэнэ. Энэ үеэр Л.Оюун-Эрдэнэ буурь сэлгэж, Их хурлын дарга болох тооцоололтой сонгуульд бэлдэж эхэлсэн гэх нь ч бий. Энэ зорилгодоо хүрэхийн тулд хэрэгтэй гэсэн хууль болгоныг зогсолтгүй зүтгүүлэх биз. Энэ гэхдээ чухал биш, Ерөнхий сайд ирэх намар хүртэл "ууртай" байх нь, урт хугацааны хамтрагчдаа хэрхэн солих нь л ард түмэнд сонин байна.